Read Wancho Naga Joel 3 Bible Online

Joel 3 - Wancho Naga bible

Joel 3

¹JOWANPAe thüile: “Ija tuk ma kue Judah hia Jerusalem tamchatle ahak-alua ang tomüi.

²Ku jat-libu pangwüi asox ang tomüi ilaxle hwom a kaxfün lax angkya haxsha to apüiüi. Ikhama kue hwom bama kax fünüi hwome ku khünakbu to hwondaokya pangnu bama kaxfün faüi.

³Hwome zandabu opupue kopüihexle chizing tswon ang nantak. Hwome sheko naosom hia lüka naosombu da ang hang, mix füi chinunchakkaikya hia ju tsangthom ang kox angkya hanpakma.

⁴“Tair, Sidon, ilaxle Filistia nokbu, hünzome ku to chempang mok ang azong ngopu? Tütali bama hünzome ku to olüix achatle kox ang azong ngopia? Hünzome ile azong ngokya jangchang, kue lebama müi achatle koxüi!

⁵Hünzome ku kux, khop-jan hia hun tamchu ku tuinabu huanuma hünzom baozang shwomkya nüibu to paole thomdaoa.

⁶Hünzome Judah hia Jerusalem angkya khünaknu tsui paolaxle ochu tokya Grik nokbu ang hwom hangdaoa.

⁷Athax kue, hünzome hwom hangle koxle apaokya nok tokya nok tokya hwom chatle apüiüi. Hünzome hwom to chemle hwondaopuix, ija kue hünzom to hwonüi.

⁸Kue hünzom sasün hia sacha hwom hangle Judah nok chak to kox ang tomüi. Hwome ibu tsailo tokya Sabi nok ang hangle koxpaoüi. Ija a, JOWANPA, kue akaxdaoa.

⁹“Jat-libu hato ija kaxho apuk ang tomkox: ‘Azan ang achwonlax; hünzom naomüibu sele asoxlax; hünzom süpahi pangwüi selax ilaxle zan to ka ang achexlax!

¹⁰Hünzome hanbai pongma laxkya jankhaobu a changlobu ang thuplax ilaxle hünzome fumkho han ang twonkya changsabu a paxlobu ang thuplax. Zang ojao müntüi lükya khünak ngaxchu azan angkya changpu.

¹¹Momlax ilaxle nguilax, hünzom tomzi nokbu pangwüi, ilaxle haxsha ma asoxhüi.’” O JOWANPA, hwom to sing ang nang süpahibu ajo hüi!

¹²“Kaxfün haxsha to ngui angkya hanpakma, pangnu nok wüi achwon angkya oli changpu. Tomzi nokbu pangnu to kaxfün fa ang JOWANPA, ku, ikhama thung angkya changle.

¹³Hwom a huanuma chichang-chizangkyabu changle; tsaxtu pongma tsax zütkya ningle hwom zütle anguak dao; oti jenle laile machang-machangle, grep ziak awangle sholaxle fyetkya ningle hwom komle fyetle asumdao.”

¹⁴Hajat hajat makhange kaxfün fakya haxsha ma tüile. JOWANPA hanpak chwonle ngui angkya a ikhama changle.

¹⁵Lyetnu hia zanghan nakle paoüi, lyettsibue nyankya chitüiüi.

¹⁶Zaion Haxnu makhange JOWANPA akhongle; Jerusalem makhange chix kaxzing atsak-adungle; zangding hia chaxwannu abünle. Ikoxlechu chixe chix khünaknu kho awaüi.

¹⁷JOWANPAe thüi: “Izuma, Israel, ku a hünzom Zang changle le hünzome awanle laxüi. Ku a, ku otsao haxnu Zaion ma ngole. Jerusalem a otsao tingnu tuita ang changüi; mixnokbue tamchatle ija tingtakle lax ang münthoüi.

¹⁸Ipongma haxnubu a grep manzaie awangle changüi, ilaxle haxhua pangnu khato osu-maihu ngün ang kopüi; Judah nok pangnu hanpak ang ti okhonguile tüiüi. JOWANPA Zangshwom-Hom tokhange shuasa tuita jenüi, ilaxle ijae Akasia haxsha ang ti koxüi.

¹⁹“Ijip nok a sak haxtok ang achangüi, ilaxle Edom nok a laxli chitüile oma ang changüi, chemthüikoxle hwome Judah nok tingtak ilaxle ikha angkya chemmün-chitsingkya khünakbu langle awüt.

²⁰Kue mik max ang tomdaokyabu hanpak jannong-alüiüi; thaikyabu kue shanle müntoxüi. Ikoxle Judah hia Jerusalem a jento khünak ngwotnui ang chang ang tomüi, ilaxle JOWANPA, ku a Zaion Haxnu ma ngoüi.”