Read Wancho Naga Amos 3 Bible Online

Amos 3 - Wancho Naga bible

Amos 3

¹Israel khünaknu, ija kaxho, oja JOWANPAe hünzom hanpak ang akaxle tüipuix, ija to apakoplax, Ijip nok tokya chixe apüikya khünaknu pangnusae wüi a:

²“Zangfang angkya jat-li pangnu kha angkya, kue awankya tamchu humele hüikya a hünzom tix changpu. Hünzom ochaxe ipongpong ziama ang tompu, ikhoma, ibu hama, kue hünzom ang sikngün fa angkya wüi changle.”

³Katzua chitüi homtoxle mixhuak anyi tomtomle wünham ang laizai chami?

⁴Chixe osüt atakle machang tanto faokha to mailang ahung zai chami? Hwom longkun to, tütali koplaxle lüwüi chichangthüi: mailang hosa twom-twom-hale füt zai chami?

⁵Khapdak thale chitox khato khapdak ma osa chemle manüi hexmi? Khapdak lingsa to tütalie chipo thüiningle khapdak chemle thaiüi?

⁶Khünaknu chaza ang chitomle tingnu ma zan-khong nyazong mütle chang ang chami? JOWANPAe ahüile lüwüi chichang, tingnu tuitae kaknu-laknu thama apongle chang ang chami?

⁷Khüthak JOWANPAe ajebu, chix dabu hato ngaile chiaho kop homtoxle tütali chu münmok.

⁸Chemtue mailang ahungle changüihex, chizale owa ngothoüi? Chemtue khüthak JOWANPAe zangwünle changüihex, ija kaxho chingaile owae mongto thom ang thoüi?

⁹Ijip hia Ashdod nok wanghom homlobu to ngokyabu hato tsingang tomkox: “Samaria haxnu akhople tomle asox kox ilaxle ikha angkyabue mokle tsuakkya chongkya tuma-wanshix hia zikmüt-mangkhobu to hulax.”

¹⁰JOWANPAe thüi: “Ibu khünakbue mahom-mahax, mix lang mix mixhuak laxle hia pa-lole kopkya tuinabu füi awangle thomle. Hwome chemle su-angkya hex, ija ojao müntik.

¹¹Ijaningle hwom haxtok a zan noke akhop-khakle kopdaoüi. Ibue hwom zanhu ziakopnui pangwüi amatoxüi ilaxle tüpong müikya hwom hom-haxbu pün-pakle amatoxüi.”

¹²JOWANPAe thüile: “Chun-nyetmixe mailang süt-ta chun ochak anyi hia omik tuita wüi atak ang thokya ningle, Samaria nok changtwon-nyiwun wanmüi le ngokya Israel khünakbu a, toxnyitua muale tamchu lya cha tuipong wüi koplaxle hidaole wüi azang ang thoüi.

¹³Athax apakoplax, ilaxle Jakop su-sa hwom ang kaxkhün laxkox.

¹⁴Hwom ochax khoma kue Israel khünaknu to fuxtsüi ang tomkya nyix, kue Bethel angkya tö-tsapbu pünle amaüi. Tötsap tüikya ozong a pünle amaüi ilaxle ija hax to nguak ang tomüi.

¹⁵Kue zangwa hom hia tsonu hombu amaüi. Luakzongbu füi aza-apuale tüikya hom-haxbu a pünle amaüi; homnu-pungnunu komkaile amaüi, le Khüthak JOWANPAe thüile.”