Read Wancho Naga Amos 4 Bible Online

Amos 4 - Wancho Naga bible

Amos 4

¹Samaria angkya mixchabu, hünzom opang Bashan angkya sütkho nguikya maihubu ningle haxnut-zangfex le tüipuix, opange zong chitüikyabu to ajao-adale changpuix, mixshix-zasabu to afangle thompuix, ilaxle hünzom kakopabu ang ju-sax apüile koxngo angkya kaxtom koxle tüipuix, hünzome ku kax apalax!

²Chemle JOWANPA Khüthak Zang otsao hex, ijaningle chixe tsaosaxle: “Hwome hünzom a jankuixbu füi lin angkya hanpak tuita nguile hüiüi; hünzom pangwüi jankuix jok le thomkya nyaxbu ningle changüi.

³Süsoxle katuk wo le tüikya khato hwome hünzom linle paoüi ilaxle homtho to tswonle awütüi.”

⁴JOWANPA Khüthak Zang-e thüi: “Israel khünaknu, hünzome ochax lyen angkya wüile jangchang, Bethel angkya otsao nui to paolax ilaxle ochax lyenlax! Gilgal to paolax ilaxle hünzome tsuakkya tukuxle ochax lyenlax! Iningle chizakle mokle le-kox ilaxle nopfokya to tö kox angkya müibu apüikox, ilaxle nyix azom lükya to chithaile hünzome ma bünfong apüile changkox.

⁵Chizakle ile mokkox ilaxle Zang ang münchong fale hünzome an tö laxkox, ilaxle hünzome töbu onüi apüikya bama tsaichong-kaxbongle changkox! Hünzome moksele tsukya a ijaningkya changle.

⁶“Hünzom tingnu hato otui-onuak ahüikya a ku changpu, ile changkoxchu hünzom a ku hato mong alople chihüi.

⁷Hünzom tsaxsa-hikhae ti lomtukhae ti tsyenle tuikya a ku changpu. Kue tingnu tuita to zangwat ajo ikoxle mama tingnu to a chiajo. Haxtok tuita ma zangwat ti düt ikoxle mama haxtok a zanle zi ang tom.

⁸Tilan ma ashole max, mama-mama tingnu tokyabu tingnu tuita to ti ataküile onglaxle ngui, ikoxle ling ang ngaxchu okhonguile chikop. Ikoxngaxchu hünzom ku hato chichat.

⁹“Hünzom saxziak azanle ama tangle kue zangwin makya ahüipu. Hünzom tsawat kha hia grep haxtokbu, hünzom fupsa pün hia olip pünbu komkaile kukbue saxle awütpu.

¹⁰“Kue hünzom hato Ijip nok hato ajokya ningle thama-thomshix ajopu. Kue hünzom naosün hwom zanhok ma zi ang tompu ilaxle hünzom manbu kue tsuile paopu. Kue hünzom nakua ma hünzom pom angkya khünak mangbue mut ang tompu. Ikoxlechu hünzom a ku hato mongchatle chihüipu.

¹¹“Kue hünzom züizüi a Sodom hia Gomorah nok amütpupu le max ang tompu. Hünzom opang azangle tüilaxpuix ibu chuwüi wünkha tokya alaile laxkya wünchua füikya hatua tuita ningle changle. Ikoxle ngaxchu hünzom a ku hato mongchat le münhüipu.

¹²Ikhoma, Israel khünakbu, kue hünzom to sikangün angkya changle. Kue ile mok angkya chang koxle, ija ku kaxfün füi apong ang achwonlax”, le JOWANPAe thüile.

¹³Zang a tuita haxhuabu zingkya mix changpu ilaxle chixe zangwinbu zing. Chixe chix mongtex khünaknu ang awan ang tom; chixe anyixning a awünning ang achang. Chix a chaxwannu pangnu füi sütsua le aham. JOWANPA Khüthak Zang: Ija a chix mün!