Read Wancho Naga Amos 7 Bible Online

Amos 7 - Wancho Naga bible

Amos 7

¹JOWANPA Khüthak Zang tokhange kue mikngünohün tuita ngün. Ijama kue, wanghompa tsyen tsaxkua zütkya man to hingzang chuile lai ang owang wangpongma kuknubu athople asoxkya ngünle lax.

²Ku mikngünohün ma kue, chaxwantok ma hingle tüikya oli pangwüi kuknubue saxle awütkya ngün, ifüima kue akax: “JOWANPA Khüthak Zang, nang khünaknu thaikya alak-hüi! Chichang thüikoxle hwom ozün ma chemle ngothoüi? Hwom a hidaole wüi tamchu shonaile tüile!”

³JOWANPAchix mong alüix ilaxle thüi: “Nange chem ngünpuix ija a chang ang müntom.”

⁴JOWANPA Khüthak Zang tokhange kue mikngünohün mama ngün. Ijama kue, chix a chix khünakbu to wün füi sikangün ang achwonle ngokya ngünle lax. Ija wüne hax fang to tüikya molo tinu zokle ashun ilaxle haxza zokle ashun ang owang wangle ngün.

⁵Ipongma kue thüi: “JOWANPA Khüthak Zang, zakkox! Chichang thüiningle nang khünaknu chemle azangüi? Hwom a hidaole wüi tamchu shonaile tüile!”

⁶JOWANPAe chix mong alüix ilaxle thüi: “Ija chuwüi changle ngai ang müntom.”

⁷JOWANPA tokhange kue mama mikngünohün tuita ngün. Ija ma kue chix a jandwonsa ashale tüikya füi thütlaxle zingkya katuk tuita zui ma ajongle ngokya ngün. Chix chak ma jandwonsa ashale tüikya.

⁸Chixe ku ma atüi: “Amos, nange chem ngünpu?” Kue lan: “Jandwonsa tuita shashale ngünle.” Ija ma chixe thüi: “Kue ija a, ku khünakbu a katuk ashei le paoünkya ningle tüile le aho ang twonpu. Kue hwom to sikngün fa angkya bama ku mong tamchatle münalüix.

⁹Isak susa hwome shwomle ngokya nui a pünle amaüi. Israel nok otsao nui a amale dantoxüi. Kue Jeroboam wangting a ashuk angkya hato ahüiüi.”

¹⁰Bethel angkya nguapa Amaziah-e ifüima wanghompa Jeroboam hato ija kax hole thüi: “Khünaknu khato Amos-e nang zan to ka angkya olom zingle ngole. Chix zangwün makhange onok amüt angkya changle.

¹¹Chix zangwünbu a ile changle: ‘Jeroboam a zanhok ma maxüi, ilaxle Israel khünaknu a hwom haxtok angkya mixnok chaxwan to zanda ang koplaxle paoüi.’”

¹²Amaziah-e Amos ang thüi: “Ajepa, ija okhonguidaoa! Nang Judah nok to chatlax ilaxle ikhato ija hwon-nwot anolax. Ibue nang ang ija otha naxfa fa.

¹³Ikhato Bethel ma tam taxaje ngo. Ija a wanghompa-e shwomkya onui, onok zangshwom-hom changpu.”

¹⁴Amos-e lan: “Ku a otha kop angkya hanpakma ajekya ajepa münchang. Ku a müizyem füi ngokya mix, ilaxle fupsa pün manzaile alikya mix changpu.

¹⁵Chunnyetpa ang ngokya ku JOWANPAe sele laxpu ilaxle chix khünaknu Israel bama ajele kox angkya chixe ku tsanpu.

¹⁶Idaile athaxpi JOWANPA kax to apalax. Nange ku ang ajele ngokya zak tamchu Israel nok to samale ngokya zak angkya akaxpu.

¹⁷Ikhoma Amaziah, JOWANPAe nang füi akaxle: ‘Nang kakonu a tingnu ma tsangtsa hangkya mixcha tuita ang achangüi, ilaxle nang naosombu a zanhok ma langüi. Nang haxtok a ahak-ahanle changüi ilaxle mix ang koxle apaoüi. Ilaxle nang jao a shuakuxchi nok ma ziüi. Israel khünaknu a hwom chaxwan angkya mixnok chaxwan to zanda ang kople paoüi jaojao.’”