Read Wancho Naga Amos 8 Bible Online

Amos 8 - Wancho Naga bible

Amos 8

¹JOWANPA Khüthak Zang tokhange kue mama mikngünohün ngün. Ija ma kue pünziak füi awangkya tsong tuita ngün.

²JOWANPAe ku ma atüi: “Amos, nange chem ngünpu?” Kue lan: “Pünziak awangle tüikya tsong tuita ngünle.” JOWANPAe ku ang thüi: “Ku khünaknu Israel nok hato oshuk hüidaoa.

³Ija nyix wanghom hom ma ngaokya tsai a mangsop tsai ang changüi. Pangnu khato wüi khünak mangbu tüiüi. Ibu a dangjajakya.” Khato tswonle awütüi.

⁴Hünzom opange chitüi-chinangbu to tingle afang thompuix tamchu haxtok angkya mixshix-zasabu amüt ang azongle ngopuix, ija to apalax.

⁵Hünzome ma füi alüile ile akaxlax: “Kwom saxziak hangle tsuak angkya hanpakma kwome atsaole nuikya nyix atsangpa le tanle nui ang thoüi. Kwome saxziakbu hangle chang angkya kuxma Sabath a chemtue ashuküi? Ofüima kwome otha achen ang tamchu othüt ma thaile shakmixbu dyenle chang ang thoüi.

⁶Keme laxli chitüikya saxziakbu otha lixle hang ang tsuaküi. Ija thashe achatle kox ang chithokya, thüikoxle chisox tuita tha achatle kox ang ngaxchu chithole maxkya chitüi-chinang khünak keme owawa apongüi, keme chix a da tuita ang shakle lax ang tsuaküi.”

⁷JOWANPA, Israel nok Zang-e tsaodaoa: “Kue hwom ochax mwot ibu otuechu alakle awüt ang müntho.

⁸Ikhoma chaxwan sile aloxüi, ilaxle haxtok ma tüikya pangnusa khosam ashukle changüi. Onok chaxwan bakle sile aloxüi, ija a Nail Shuanu tichap ningle dongtox jutox le changüi.

⁹Kue tungto khato zanghannu düt ang tom tamchu anyixning to chaxwannu zangnak ang tom le chang angkya hanpak nguile hüile. JOWANPA Khüthak Zang, kue ija kax akaxpu.

¹⁰Kue hünzom pangpwon a mangtsakya ang achangüi ilaxle hünzom mongmüi tsai ang mongma tsai ang achangüi. Kue hünzom khang ongle tamchu nyikhwon apongle chang ang tomüi, ilaxle hünzom a, nao tuita wüi tüikya zile paokya nu-pa hwom ang achangüi. Ija nyix a oshuk kople tüle khax wüi khaxle changüi.

¹¹“Kue haxtok hato otui-onuak ahüi angkya hanpak nguile hüile. Khünaknu ang wok anokya tüiüi, ikoxle süt saxsele münchang; khünaknu ang ti alankya tüiüi, ikoxle ti lingse le münchang. Hwom a JOWANPA chito khange hüi angkya kaxho bama wokno-tilankya tüiüi. JOWANPA Khüthak Zang, kue ija kax akaxpu.

¹²Mediterenian tinu makhange Omang tinu alople khünaknu samle ahamüi ilaxle shuakux chitokhange handünchi alople anguile ahamüi. JOWANPA lomle hwome pangnu chito lomle huüi, ikoxle hwome ija münataküi.

¹³Ija nyix a tsaktan-zongtan tüikya naocha hia naosün hwom ngaxchu tilan ma maxüi.

¹⁴Opange Samaria angkya chapabu, Dan angkya baozang mün ma chichangba ‘Bersheba angkya baozang mün ma’ tsaosaxlaxle changpuix, hwom a nguakle paoüi ilaxle tamchatle chizole changüi.”