Read Wancho Naga Obadia 1 Bible Online

Obadia 1 - Wancho Naga bible

Obadia 1

¹Ija a, JOWANPA Khüthak Zang-e Edom nok hanpakma akaxkya kax bama Obadiah-e ajekya changpu. Chaxwannu onokbu hato JOWANPAe kaxhomix apaodaoa, ilaxle kwome chix kaxho ile atatle: “Achwonlax! Kempi Edom nok zan to kahax!”

²JOWANPAe Edom nok ang thüi: “Kue nang shonaile chang ang tomüi; noknusae nang thajaoüi.

³Nang mongngame nang dyendaoa. Nang pongwün tingnu a longnu füi zingkya zanhunui changle; nang hom a tsuathale haxnukho towüi, ikhoma nange nang füi alüile akax, ‘Ku a owae bele ajo thoüi?’

⁴Nange nang hom a lawang zop ningle ding to zingkoxchu, ibu lyettsibu tham to ngünle changkoxchu, kue nang a fang to bele ajoüi.

⁵“Chemtue zangnak ma ahuxmix nguipuix, hwome laxsele atsutsu laxwüi. Chemtue khünake grep ziak tswonle asoxüihex, hwome ota-otua hidaopong jento toxle. Ikoxle hünzom zanpabue hünzom a oli chitoxle amüt.

⁶Esau sixli hwom, hünzom tuina komkaile tsuitsuak.

⁷Hünzom zankat üithobue wüi hünzom dyenle tsuak; hwome hünzom a hünzom haxtok angkya jwonle apao. Hünzom füi tumüi ma ngokyabue wüi hünzom tingtak tsuakpu. Hünzom füi tomsax-tomling ngokyabue wüi hünzom tsünle amanpu; hwome hünzom ang thüi: ‘Chixtsing-chixtsang omaxün puix?’

⁸“Kue Edom nok to sikngün fakya nyix, kue huxtsing-loptsang füikya hwom khünakbu amütüi hwom jetüi-hwonlangkyabu komle kue amütüi.

⁹Teman angkya zankat naomüibu tüle abütle changüi, ilaxle Edom nok ang süpahibu komkaile langüi.

¹⁰“Hünzome papalo le tüikya tamchu hünzome ma haxnu-homsa, Jakop susün hwom mik amütkya khoma, hünzom a amütüi ilaxle chemtuechu e-sele tüi ang müntom.

¹¹Ija nyix nang a kaochima ajong zanpabue hwom panbu atsunle dongkya nyix a. Nang a, Jerusalem angkya tuina tsui laxle tom-hanle laxkya zanpabu füi tomwüi oma changkya.

¹²Judah angkya hünzom mamixbue shoma apongkya to hünzom tsaichong-kaxbongle chichanghaxkux. Hwom-max hwom-samle changkya nyix hünzom ang nga chidong haxkux. Hwome nuzaole changpongma hünzome hwom cha chinyi haxkux.

¹³Ku khünaknu ngwotnui tingnu to hwom wanjai ang hünzom chingui haxkux. Hwome thama apong pongma hwom-tüi hwom-nao tsui pao ang a.

¹⁴Lompongsox ma hünzom ajongle chibang koxle müihaxkux paole azang ang laikyabu kop angkya hanpakma a. Hwome thama apong pongkhae le hünzome hwom zan-nokbu chak to chikox koxle müihaxkux.

¹⁵“JOWANPA, kue jat-libu hanpakma kaxfün fa angkya otu nguile hüile. Edom, nange chemle mokdaopuix ija nang to mokle faüi. Nange chem koxdaolaxpuix ija nange chatle kopüi.

¹⁶Ku khünaknue tüle khaxkya fuxtsüi ti ling ang kopdaoa ku otsao haxnu ma a. Ikoxlechu tomzi nokbue ifüi sütsexle khaxkya fuxtsüi ti ling ang kopüi; hwome ija pangwüi lingüi ilaxle omüt ang achangüi.

¹⁷“Ikoxlechu Zaion Haxnu ma züizüi paole azang thoüi, ilaxle ija a otsao nui ang changüi. Amipong tokhange wüi hwom kux hex-ole panle thomkya haxtok Jakop khünaknue kopüi.

¹⁸Jakop hia Jusep khünakbu a wün ningle tüiüi; wün füi tsaxkua zokle ashunkya ningle hwome Esau khünakbu amütüi. Esau sixli owachu ozün ma müntoxüi. JOWANPA, kue akaxdaoa.

¹⁹“Shuathongchi Judah angkya khünakbue Edom haxtok kopüi; hannopchi haxnucha ma ngokyabue Filistia haxtok kopüi. Efraim hia Samaria haxtok a Israel noke kopüi; Benjamin khünakbue Gilid haxtok laxüi.

²⁰Shuakuxchi Israel nok zanda ang ngokya süpahibu chatlaxle shuakux chu Zarefat alople Foinesia nok tingtakle dongüi. Jerusalem angkya zanda ang paokyabu opang Sarah-e to tüipuix hwome shuathongchi Judah angkya tingnubu tingtakle kopüi.

²¹Zan to lütlaxle tüikya Jerusalem angkya khünakbue Edom nok to singüi ilaxle hwom to apünüi. Ilaxle JOWANPA chix jaojao wanghom ang changüi.”