Read Wancho Naga Jona 2 Bible Online

Jona 2 - Wancho Naga bible

Jona 2

¹Nyax wok mongkha tokhange Jona-e, JOWANPA chix Zang to jop:

²“Ku maxkya chifün tokhange, O JOWANPA, kue nang nyakpu, nange ku to lanhüi. Tüle zukya amalum panfang tokhange ku to fonghüile akhongpu, nange ku zing atat-hüi.

³Nange ku othongdua to tswonle awütpu, tüle zukya tinu thong to a, ojong khato tinue ku akhople tüipuix. Tüle zongkya nang tichape ku to nutle akhixle.

⁴Kue ku a nang tuntho angkya azangpu le texkya ilaxle nang otsao Zangshwom-Hom tam mün-ngüntoxüile thüt.

⁵Tinu ku to thule hüi ilaxle ku to chwople kop; tinue ku to komkaile chwople kopdaoa, ilaxle tinu-achale ku to khale kopdaoa.

⁶Ku a haxnubu tsingjukya khato jao jupu, otuechu pan ka chidaple hakle thomkya chaxwan to a. Ikoxlechu, O JOWANPA ku Zang, jithong tokya ku ozün ma achatfa.

⁷Chemtue ku khüzün chak angkya putle paokya awanle laxpuix, ipongma, O JOWANPA, kue nang to joppu, ilaxle nang otsao Zangshwom-Hom ma nange ku zangjop atatle laxpu.

⁸Opange laxli chitüikya chapabu to shwomle changpuix, ibue nang tsai-kax ma laxkya dantoxpu.

⁹Ikoxlechu kue nang achuakle tsai ngaiüi; kue nang ang tö tuita koxüi ilaxle kue chem tsaodaopuix ija moküi. Khosün a JOWANPA tokhange hüipu!”

¹⁰JOWANPAe nyax ang fako to Jona fatle alaitox angkya kaxkox, ilaxle ijae ile mok.