Read Wancho Naga Jona 4 Bible Online

Jona 4 - Wancho Naga bible

Jona 4

¹Ija bama Jona ang mong chimüi ilaxle mongtsik dong.

²Ikhoma chixe zangjop: “JOWANPA, kue hom makhange achexüima wüi, nange ilüwüi mok angkya changpule münthüidai hia? Ikhoma kue tsuakkya tukuxle Spain nok to paole azang ang azongpu! Nang a jento adukya, chingchakya, ilaxle sikngün ang chitomle mong alopkya tamchu mongkün chingchae awangle tüikya mix changpule kue awan ngopu.

³Athaxpi, O JOWANPA, ku zi ang tomfa. Ku zongto ozün ma ngokya füi zikya wüi sümüi.”

⁴JOWANPAe lan: “Nang mongtsik angkya nange sukya mwot chem alandaopu?”

⁵Jona a tingnu zongma handün chikao to paolaxle thung. Chixe ma ngo angkya pomsa zai ilaxle tingnu to chemle changchang le ija zangkhung ma ngolaxle hule tan.

⁶Ipongma Jona ang zangkhung kople chixe nazak sümüile kop angkya hanpakma JOWANPAe chix zui ma pün tuita lai tsong ang tom. Ija pün füi Jona ang mong huanuma müi.

⁷Ikoxle ofüinop swomsae, Zang kaxtom ma, chong lailaxle ija pün sax, ilaxle ija zile pao.

⁸Zanghan dongle changkya füi Zang-e handünchi zangwin okham ahüi, ilaxle ija zanghane chix khang ma chietkya ningle huakkya khoma Jona a zaktho-lehale max. Ikhoma chixe chix zikoxwüi müisele sung. Chixe thüi: “Ku ozün ma ngokya füi zikya wüi sümüi.”

⁹Ikoxlechu Zang-e chix ang thüi: “Ija pün bama nang ang mongtsik angkya nange sukya mwot chem mokdaopu?” Jona-e lan: “Ku ang mongtsik angkya olom tüile: zikya kople mongtsik angkya a!”

¹⁰JOWANPAe chix ang thüi: “Ija pün jatakya fang ma tsongpu ilaxle ofüinyix wüi zile paopu; nange ija pün hanpakma chemchu chimok ilaxle ija nange atsünkya chichang: Ikoxlechu ikhoma nang ang mongtsik dongpu!

¹¹Jangchang thüiningle, ija chongkya tingnu, Ninewi nok to kue itokaile chingcha angkya olom tüile. Chemthüikoxle ikhama chemmün chitikkya naosom 120, 000 tamchu müibu tüihule!”