Read Wancho Naga Huake Laipex 10 Bible Online

Huake Laipex 10 - Wancho Naga bible

Huake Laipex 10

¹JOWANPAe Mosa ang thüi:

²“Khünaknu pangwüi nyakle asox ang tamchu pom pün angkya hanpakma twon ang khop-jan makhange nyazong anyi zinglax.

³Chemtue ija nyazong anyi okuilole mütüihex, ku ngokya Nyihom homtho ma nang akhople noknusa nguiüi.

⁴Ikoxle chemtue nyazong tuita wüi mütüihex, nang zui akhople homjen lompabu tata nguiüi.

⁵Chemtue ozu moxle mütüihex, handünchi angkya pom ma athongkya saxthom laile paoüi.

⁶Chemtue ozu moxmoxle anyi ma chatle mütpuix, shuathongchi ma athongle tüikya homjen laile paoüi. Ozu moxmoxle mütkya a pom pün angkya kaxho changle,

⁷ikoxle khünaknu pangwüi tomle se angkya hanpakma a okui lowüilole mütüi.

⁸Nyazongbu a Arun sasün hwom nguapabue tix müt angkya changle. “Ibibi wanlombu a othuithui hanpak ang twonle ngo angkya changle.

⁹Chemtue hünzom haxtok ma zan laile, hünzom to single hüikya zanpa chak tokya ma khosün ang azongle ngopuix, ipongma chaxkhong-zankha apukle ibu nyazong mütkox. JOWANPA kue hünzom a ochax-ozan pangnu chak tokya azün ang hünzom to asuüi.

¹⁰Ilaxle mongmüi-pwonla pongmachu, Lyetngai to pua pongma ilaxle mama-mama hünzom zanglom Pangpwon sax pongma: hünzome zokle ashunkya tö koxpongma hünzome nyazongbu müt angkya changle. Ipongma kue fongüi, Ku a JOWANPA hünzom Zang changle.”

¹¹Khünaknue Ijip dantox füima zanglao anyi lükya to lyetjang anyi angkya nyixtsa to, JOWANPA ngwotnui Nyihom angkya zangfwom ding to dong,

¹²ilaxle Sinai haxnu angkya laile Israel khünaknu aham ang achex. Paran faonu mongto ija zangfwom nazakle tang.

¹³JOWANPAe Mosa ang fakya kaxtom lailaile hwom achex ang lai,

¹⁴ilaxle achex fofo to hwom a amipongkya lailaile homjen-homjen ma athomle aham. Ahankya ma Judah homjene zunkya nyiluak fang ma ahamkyabu tunpa ma laile, saxthom-saxthom ma süilaxle Aminadab sasün Nahshon lomzun ma achex.

¹⁵Zuar sasün Nathanel a Isakar homjen lompa changkya.

¹⁶Helon sasün Eliab a Zebulun homjen lompa changkya.

¹⁷Ifüima Nyihom pünle adütlaxle ibu hün angkya Gershon hia Merari saxthom laile achex.

¹⁸Ifüima Reuben homjen nyiluak fang ma tüipupu, othom-othom ma süile, Shedeur sasün Elizur lomzun ma laile achex.

¹⁹Zurishaddai sasün Shelumiel a Simeon homjen lompa changkya,

²⁰ilaxle Deuel sasün Eliasaf a Gad homjen lompa changkya.

²¹Ifüima. Otsao tuinabu koplaxle Liwi hwomkha angkya Kohath saxthom laile achex. Mama pom zai angkya onui aloplaxle hwome Nyihom chatle ajong.

²²Ifüima, Efraim homjen nyiluak fang ma tüipupu, othom-othom ma süile, Amaihud sasün Elishama lomzun ma laile achex.

²³Pedahzur sasün Gamaliel a Manasseh homjen lompa changkya,

²⁴ilaxle Gideon sasün Abidan a Benjamin homjen lompa changkya.

²⁵Oshuk ma Dan homjen nyiluak fang ma tüipupu, othom-othom ma süilaxle, Amishadai sasün Ahiezar lomzun ma laile achex.

²⁶Okran sasün Pagiel a Ashar saxthom lompa changkya,

²⁷ilaxle Enan sasün Ahira a Neptali saxthom lompa changkya.

²⁸Chemtue Israel khünakbue pom pünlaxle hozün zai ang achexle paoüihex, hwome othom-othom ma ahanlaxle ija olom tole aham.

²⁹Mosa-e hohochong Jethro sasün Hobab, Medi nok, chix hotüichong füi akax: “Kwom a JOWANPAe kwom ang faüihex-ole tsaokya haxtok alop ang achexüi khakha. Chixe Israel khünaknu tüle ahak-aluale chang ang tomüile tsaodaoa, idaile kwom füito oman, kwom ahak-aluakya kwome hünzom füi tom-hanle changüi.”

³⁰Hobab-e lan: “Münchang, ku a mating-mahax towüi chatüi.”

³¹Mosa-e thüi: “Chingchalaxle kwom danle taxtox, faokha to pom chemningkya onui ma zingüihex nangetix awanlax ngopu, ilaxle nang a kwom lomwanpa ang achang ang tsuak.

³²Nang kwom füito janghüi thüiningle, JOWANPAe kwom afafa mohiman komkaile nang füi tom-hanle changüi.”

³³Chemtue khünaknue otsao haxnu Sinai danle toxpuix, hwom chizakle nyix-azom aham. JOWANPA Tsaotsüt Suak jento hwom tunthoma aham ilaxle hwom ang pom zai angkya onui atakle kox.

³⁴Hwom pom tuita angkya ata pom to tailaile aham pongma, JOWANPA zangfwom a anyixningle hwom khangkho ma tüile ngo.

³⁵Chemtue Tsaotsüt Suak alaile achexpuix, Mosa-e thüi: “Ajongkox, JOWANPA; nang zanpabu afale pao ang tomkox ilaxle nang to miktsakkyabu zikle pao ang tomkox!”

³⁶Ilaxle chemtue ija nazakpuix, chixe thüi: “Chat-hüi, JOWANPA, ojat-ojat Israel khünaknu hato chat-hüi.”