Read Wancho Naga Huake Laipex 11 Bible Online

Huake Laipex 11 - Wancho Naga bible

Huake Laipex 11

¹Hwom sikngün bama khünaknue JOWANPA to jua ang süt. JOWANPAe ija atatkya zuma chix ang mongtsik ilaxle khünak hato wün ajo. Ijae hwom khama wün alai ilaxle hwom pom okao tuita zokle ashun.

²Khünaknue Mosa nyakle chingchahüile akhong; hwome JOWANPA to zangjop ikoxle wün maxle pao.

³Idaile ikha ang Taberah le nyak, thüikoxle ikhama JOWANPA wüne hwom to zok.

⁴Israel khünakbu füi tomle mixnokbu chuwüi züita ahamle tüikya. Hwome müi saxsele huanuma sungle tüikya; ilaxle Israel nokbue ngaxchu jua ang sütle thüi: “Kwom ang hidaole thüingaxchu müisax ang owae koxfahax!

⁵Ijip nok to kwome saxse tsutsuba nyax saxle ngopu. Kwome saxhomkya wum-waobu, maikox mali-mali, otex textho hia texkhibu huanuma atak hompu, ibu hanpakma kwom ang chem tuitaichu chitüihupu.

⁶Ikoxle athax kwom ang chem zong chitüi. Sax angkya süt chemngaxchu chitüi, ikoxle nyixfokya to ija mana-na wüi saxle ngo!” (

⁷Mana a muaküsa tütali pünziak lailaile mik-hu zongma sütho-sünandaole tüikya.

⁸Zangnak ma nyenti füi tomle ija a pom homtho to dütle bang. Ngainop ningle khünakbue ibu tswonle afox, ija thule akhix chichangba an ang zutle akhix, ifüima ti ma atolaxle an ang achangle akhao. Ija a olip-münga füi zingkya ankhao lailaile zaokele tüikya.)

¹⁰Khünaknue hwom thongnui to athom-thomle ajong laxle juale ngokya Mosa-e atat. Chix ang mongma, chemthüikoxle JOWANPA ang hwom füi mongtsik,

¹¹ilaxle chixe JOWANPA ang thüi: “Nange ku-zo büthüikoxle thuppu? Ku füi nang ang chem mongmapu? Nange ku ang ibu khünakbu hanpakma hünlit büthüikya to kox?

¹²Ibu a kue zingkya chichangba kue pux-paile alaikyabu chichang! Hwom hopu hwom füi tsaosaxle tüikya chaxwan alop angkya lomjang-jang ma, naodomsa tuita to honue humekya lailaile ibu khünak kue suakto ma paile aham ang büthüikoxle tsanpu?

¹³Ibibi khünaknue sax ang kue müi okhonguile ojong to ataküi? Hwom a azole ngole tamchu müimamale juale ngole.

¹⁴Ku a ku lailai to ibu khünakbu hanpakma hünlit laxkya mix ang münchang tho; ija a ku zongto huanu changle.

¹⁵Nange ku to ile lüwüi hwon angkya jangchang, ku to chingchalax ilaxle ku mik amütlax, ile changkox tix wüi kue tamchatle nang mongtsik adu angkya müntüi.”

¹⁶JOWANPAe Mosa ang thüi: “Khünakbu lompa ang laxle hüikya e-sele tüikya khünak 70 mixhuak sele asoxlax, hwom ku ngwotnui Nyihom to apüi hüi ilaxle ikhato hwom ku zui ma ajong ang tomkox.

¹⁷Ku juüi ilaxle ikhama kue nang füi zangwünüi ilaxle kue nang ang koxle tüikya chasa züita lax üntoxle hwom ang koxüi. Ifüima hwome ibu khünaknu hanpakma nang füi tomle hünlit hün ang thoüi, ilaxle nange nang tatae hünle ngo angkya münchang.

¹⁸Athax khünaknu füi akaxkox, ‘Ngainyixkya hanpakma hünzom malailai to atsaolax, hünzome sax ang müi ataküi. Hünzom juale hüikya tamchu hidaole thüingaxchu müi saxsele zangwünkya tamchu hünzom Ijip nok towüi sümüile ngopule akaxkya, ibu kax JOWANPAe atatle laxdaoa. Athax JOWANPAe hünzom ang müi koxüi ilaxle hünzome ija sax ang kopüi.

¹⁹Hünzome ija a nyixta hia nyix-anyi hanpak ang saxüi münchang, chichangba nyix aga, chichangba nyix bün chichangba nyixtsa hanpak zaza ang saxüile münchang,

²⁰ikoxle lyetjang tuita hanpakma hünzom imakhange laile mapao tanto tamchu ija makhange hünzome kak-lak kople machang tanto saxle ngoüi. Hünzome hünzom khama ngokya JOWANPA a pongle chikop ikoxle hünzome Ijip nok dantoxse chitsukya mongjua khoma ile changüi.’”

²¹Mosa-e JOWANPA ang thüi: “Ikhoma kue 600, 000 khünaknu lomzunle ngopu, ikoxle nange hwom ang lyetjang tuita sax ang okhonguile müi koxüileo?

²²Hwom mongzom amüile maihu hia chunbu lang ang tholax angma?”

²³JOWANPAe lan: “Kutsak-kuzong ma thathüt tüipia? Kue akaxkya kax chichang hia changpuix nange lebama wüi lop ang kopüi!”

²⁴Ikhoma Mosa paolaxle, JOWANPAe chix hama wünkya, khünaknu hama ngai. Chixe 70 lompabu sele apüilaxle Nyihom akhople ngo ang tom.

²⁵Ifüima JOWANPA zangfwom ju ilaxle chix füi zangwün. Chixe Mosa ang koxle thomkya chasa züizüi lax ilaxle hwom 70 lompabu ang kox. Chasa nguikya zuma, okuilole chingo koxlechu hwome ajebu lailaile akhong.

²⁶70 lompa kha angkya mixsün anyi, Eldad hia Medad nyi a Nyihom to chingui homtoxle pom to ngo. Ija pom khato hokhi hato chuwüi chasa ngui, ilaxle hokhi chuwüi ajebu lailaile akhong ang tom.

²⁷Eldad hia Medad nyi chempangle changpuix, ija apua ang naosün tuita Mosa hato zikle ngui.

²⁸Ipongma Nun sasün Jihusua, owae naosa tokhange wüi Mosa to fongle hüipuix, chixe Mosa ang thüi: “Apu, hwom a zak ang tomkox!”

²⁹Mosa-e lan: “Kue luakya to nang mix aban pia? JOWANPAe chix chasa khünaknu mok ang koxle chang koxle pangnusa wüi ajebu lailaile akhong ang tomle müihuse thüikoxchu!”

³⁰Ifüima Mosa hia 70 lompabu hwom pom to chat.

³¹Allele JOWANPAe zangchei ang tom ilaxle ija zangwine tinu shinthuk kax tokya songsik osabu hax makhange fakpong tsuale pile, pangnuchi tokya ngui ang tom. Ibu Israel nok pombu akhople zimsüt obi-obi tamle pax.

³²Ikhoma, ija nyix, jamütungle ilaxle ofüinyixchu tungle, khünakbue ija osa kop angkya mwot mok. Owaechu tuak ma ojat kho chinguile chitswon. Hwome ibu pom akhople lomle azan.

³³Hwom ang sax angkya müi okhonguile tüipongma wüi khünaknu füi JOWANPA ang mongtsik ilaxle hwom hato kakle ang tom.

³⁴Ija onui ang Kibroth Hattawah le nyak (ija a zik sungkya nui le thüikya kax), chemthüikoxle hwome ikhama müi saxlaxle kak kop ilaxle zikyabu mang huanuma akhün.

³⁵Ija makhange khünaknu a Hazeroth to achex; ikha to hwome pombu zai.