Read Wancho Naga Huake Laipex 12 Bible Online

Huake Laipex 12 - Wancho Naga bible

Huake Laipex 12

¹Mosa-e chix kako ang Kush cha lax, ija khoma Miriam hia Arun nyie chix ajao.

²Okhie thüi: “JOWANPAe Mosa tata makhange tix zangwünpia? Chixe kwom makhange zangwünle münchang hexnyi?” Okhie chem akaxpuix ija JOWANPAe atatle lax. (

³Mosa a puinaikya mix, chaxwannu ma chix lailaile puinaikya mix chitüi.)

⁴Allele JOWANPAe Mosa, Arun hia Miriam hwom ang thüi: “Hünzom azom a ku ngwotnui Nyihom to nguihüi.” Hwom ngui,

⁵ilaxle JOWANPA a thong lailaikya zangfwom ma ju, Nyihom pomtho ma ajong, ilaxle nyakle thüi: “Arun, Miriam!” Okhi thüntho chito hüi,

⁶ija ma JOWANPA akax: “Athax kue chem akaxüihex, ija to na thale apalax! Chemtue hünzom khama ajebu tüipuix kue ku sün hwom hato mikngün-ohün ma aho ilaxle wünmang ma zangwünle changpu.

⁷Ikoxle kue chemtue ku dapa Mosa füi zangwünpuix, ija a chixlili changpu; kue chix ang ku khünaknu Israel nok to hume angkya hünlit koxle thompu.

⁸Idaile kue chix füi thün-khang asaole tamchu tsaisong-kaxnong ma chichang homtoxle ngaithole zangwünpu; chixe kusün-kujo ngaxchu wüi ngünle laxdaoa! Ikoxle ku dapa Mosa zongto chichangle zangwün ang hünzom ang chem mongchong laxpu?”

⁹Okhi füi JOWANPA ang mongma ikhoma chix cha achexüi ma

¹⁰tamchu zangfwome Nyihom dantoxüi ma, Miriam tsangtsa ma ngwon mak laile tsangtsa khwon bakle pakai lailaile tho. Arun-e she to hupongma she tsangtsa a ija kak füi awangle ngün.

¹¹Arun-e Mosa ang thüi: “Kwom ongat ang achang laxle thaikya ochax khoma ipongpongle kukhi ang sikngün taxfaünfa.

¹²She tsangtsa hak tomtomle saxle sumkya füi she a mang ma puxpupule taxachangünfa.”

¹³Ikhoma Mosa-e JOWANPA to nyakle akhong: “O JOWANPA, she kak müi ang tomkox!”

¹⁴JOWANPAe lan: “Hopae she thün to thuake thuakle chang koxba, she-e ija zakkop thajao nyix anüt bama adule alyet-se, idaile she a nyix anüt hanpak ang pom tokna to kun ma naxngo, ifüimatix she pomkha to chatle dün ang thoüi.”

¹⁵Miriam a nyix anüt hanpak ma pom tokna to hakle thom, ilaxle she tamchatle homkha to dong ang matsan tanto khünaknu owachu chiaham.

¹⁶Ifüima Hazeroth dantoxlaxle hwome Paran faonu mongto pom zai.