Read Wancho Naga Huake Laipex 15 Bible Online

Huake Laipex 15 - Wancho Naga bible

Huake Laipex 15

¹JOWANPAe Mosa ang

²ibibi wanlom, JOWANPAe hwom ang kox angkya haxtok to hwome twon angkya hanpakma Israel khünaknu ang kox.

³Maihupong tuita, chun ola tuita, chun tuita chichangba zwon tuita le JOWANPA ang zokle ashunkya tö chichangba tsaosaxdaokya thathom ang koxkya tö chichangba küntsu-monglua to koxkya tö chichangba hanpak-hanpak to koxle hüikya zanglom pangpwon tö ningle apüile kox ang tsuak. Ibu süt tö koxkya ozing-olong a JOWANPA zongto ongan tüle müikya changle.

⁴Owapange zokle ashunkya tö hanpak ang JOWANPA hato chun tuita chichangba zwon tuita le apüile koxüihex, chixe müi tuipong füi tomle olip münga laihwon tuita füi awon ankhix tuak tuipong saxziak tö hanpak ang apüiüi, ifüi tomle grepti-ju chuwüi laihwon tuipong apüiüi.

⁶Chemtue chun ola tö koxle changüihex, olip münga laihwon azom ma ahanlaxle, thom tuita ankhix tuak anyi füi awon saxziak tö hanpak ang koxüi,

⁷ifüi tomle grepti-ju chuwüi laihwon tuita azom ma ahankya thomta koxüi. Ibu tö koxkya ongan a JOWANPA zongto tüle müikya ongan changle.

⁸Chemtue maihupong tuita JOWANPA ang zokle ashunkya tö chichangba tsaosaxdaokya tsangthom tö chichangba notom-tusüi tö koxpuix,

⁹olip münga laihwon anyi awon ankhix tuak azom chu apüile kox angkya changle,

¹⁰ifüi tomle grepti-ju laihwon anyi chuwüi kox angkya changle. Ibu tö koxkya ongan a JOWANPA zongto tüle müile.

¹¹Ibu olom a, maihupong, chun ola, chun chichangba zwon, ibu müitom tuipong tö koxkya foto twon angkya olom changpu.

¹²Chemtue müitom tuita füi onüi müi tö koxle changüihex, ibu füi oshem ang koxkya töbu chuwüi zuizuile alui angkya changle.

¹³Israel khünak nokpu pangwüi süt tö koxpongma ile mok angkya changpu. Ija ongan a JOWANPA zongto tüle müile.

¹⁴Ilaxle tütatue wüi changlax, hünzom füi tomle ngokya mixnok sün tuitae, onox hanpak ang wüi changlax othuithui hanpak ang wüi changlax, JOWANPA zongto ongan müikya süt tö koxle jangchang, chixechu wanlom ma chemle tüipuix ile wüi mok angkya changpu,

¹⁵chemthüikoxle, athax füichi hanpakma chu, ija wanlom tuitata wüi, hünzom tamchu hünzom füi tomle ngokya mixnok pangwüi to ziakople thomle. JOWANPA miksho ma hünzom hex tamtüi, hwom hex tamtüi, tuitata wüi;

¹⁶hünzom hanpak angchu anaole hwom hanpak angchu wanlom a tuitata wüi twonüi.

¹⁷JOWANPA Mosa ang

¹⁸Israel khünaknu hanpak ang ibibi wanlom kox. Ibu wanlom JOWANPAe hwom ang koxle thomkya haxtok to twon angkya changle.

¹⁹Chemtue ikhato ali-akanle changkya süt saxüihex, ikha angkya hidaole JOWANPA hanpak ang ataxle tö koxkya tuita ang süile kopüi.

²⁰Chemtue hünzome an ashik-ahanle changpuix, puatak sax makhange zingkya pongwang angkya an a tuita ataxkya tö ningle JOWANPA ang koxüi.

²¹Chemthüikoxle athax füichima chuwüi hünzome puamün sax füi zingkya an koxkya lailaile ataxkya tö ang kox angkya changle.

²²Ikoxlechu namthütba owawae chaktung ma chichangle, JOWANPA Mosa ang koxkya ibu wanlom thom ang chithole chang,

²³namthütba athax füichi ma noknu jaojaoe, Mosa makhange JOWANPAe koxkya kaxtom thom ang chithole chang,

²⁴ilaxle noknue chitsingkya khoma ija thaikya jangchang, hwome zokle ashunkya tö ang maihupong tuita kox angkya changle, ifüi tomle JOWANPA zongto ongan müikya saxziak hia grepti-ju wanlom ma tüipupule tö kox angkya changle. Ija to bole ochax tö hanpak ang hwome zwonpong tuita kox angkya changle.

²⁵Nguapae noknu hanpakma zanglom ma tüikya zomzingle atsao koxle hwom khongai ang tomüi, ifüima hwom ang thailak tüiüi, chemthüikoxle thaikya a chaktung chichang ilaxle hwome ochax tö hia süt tö JOWANPA hato apüile koxdaoa.

²⁶Israel khünak noknu ang tamchu hwom khato ngole hüikya mixnokbu ang chuwüi thailak tüiüi, chemthüikoxle thaikya ma hwom bibi pangwüi womle changdao koxle.

²⁷Owawa mixhuakke, chaktung ma chichangle ochax lyenle jangchang, chixe ochax tö ang zanglao nguidaokya zwoncha tuita kox angkya changle.

²⁸Tötsap ma nguapae ija khünak chix ochax tokya atsao ang, zanglom ma tüikya khongai zomzingle koxüi, ifüima chix ang thailak tüiüi.

²⁹Israel khünak nokpu wüi changlax chichangba hwom khato ngole hüikya mixnokpa wüi changlax, chaktung ma chichangle ochax lyenkya pangwüi hanpakma wanlom zomzing a tuitata wüi twon angkya changle.

³⁰Ikoxlechu, nokpu Israel khünak wüi changlax chichangba hwom khato ngole hüikya mixnokpa wüi changlax, chaktung ma ochax lyenle jangchang thüiningle, mongtsutsule chixe JOWANPA zongto thaile changdaokya hanpakma, chix a mik max ang tom angkya wüi changle,

³¹chemthüikoxle chixe JOWANPA kax ma chilaxle tüi tamchu chaktung ma wanlom tuita lyenle ama. Chix mik maxkya bama owamachu tsaitox-kaxfe angkya müntüi.

³²Hanpak tuita ma, Israel khünaknu faonu mongto ngotanto wüi, khünak tuitae Sabath nyix ha afoxle bang.

³³Chix a Mosa, Arun hia khünaknu pangwüi tuntho to apüi,

³⁴ilaxle chix nyele thom, chemthüikoxle chix to chemle chang angkya hex, ija bama hwom ang khosam.

³⁵Ifüima JOWANPAe Mosa ang thüi: “Ija mixsün a mik max ang tom angkya wüi changle; chix a pom tokna to noknue long füi thuple lang angkya oli changpu.”

³⁶Ikhoma, JOWANPA kaxtom ningle, noknue ija mixsün pom tokna to alailaxle long füi thuple lang.

³⁷JOWANPA Mosa ang

³⁸Israel khünakbu füi akax angkya kaxtom koxle thüi: “Hünzome hünzom nyitua ma osutua fün ilaxle osutua pangwüi ma zühing füi fünlax. Athax füichimachu hünzome ija ile wüi moklax.

³⁹Ija sutuae hünzom ang texle atak ang tomüi, ilaxle chemtue hünzome ibu ngünpuix, ku kaxtombu texle ataküi ilaxle ibu kax ma laxle tüiüi; ifüima hünzome ku hato tok ahole tamchu hünzom mongtex hia mongtsukyabu füito azuile münchangüi.

⁴⁰Osutua-e hünzom ang ku kaxtombu texle atak ang tomüi, ilaxle hünzom a komkaile ku kux ang achangle ngoüi.

⁴¹Ku a JOWANPA, hünzom Zang changle; kue hünzom Ijip nok tokya alaipu, ku hünzom Zang ang ngo angkya hanpakma. Ku a JOWANPA changle.”