Read Wancho Naga Huake Laipex 16 Bible Online

Huake Laipex 16 - Wancho Naga bible

Huake Laipex 16

¹Izhar sasün Korah, Liwi homjen, Kohath saxthom angkya mixsüne Mosa lomzun füi alünle ajong. Chix füito Reuben homjen angkya mixsün azom: Eliab sasün Dathan hia Abiram nyi, Peleth sasün On ilaxlechu mama Israel khünaknu 250, noke awanle ngokya tamchu noknue zünle kopkya lompabu, ibu chix füito azüi.

³Hwom Mosa hia Arun nyi zui ma asox ilaxle thüi: “Hünkhi a müimama lüwüi ziakaile leüna! Tunu angkya noknusa wüi JOWANPA kux changle, ilaxle JOWANPA a kem pangnusa füi tüipu. Jangchangba, Mosa, nange, JOWANPA khünakbu thakma akhokya nang tata wüile büthüikya ma texlaxpu?”

⁴Chemtue Mosa-e ija kax atatle laxpuix, chixe ma alüile hax to tswonle awüt ilaxle zangjop.

⁵Ifüima chixe Korah hia chix füito azuikya khünaknu ang thüi: “Ngainop swomsae, kem opupu chix kux changpuix, ija JOWANPAe ahoüi! Chixe owa chix kux changpuix, thüikoxle chixe zünle kopkya khünak opupuhex, ija khünak a chix tö-tsap hato ngui ang tomüi.

⁶Ngainop swomsae nang üntoxle nang füito azuikyabu, wündix hok-khua koplaxle nguilax, ijama wün füikya wünhandix ilaxle ongan müikya so ibu dingma danlax, ilaxle ibu a tö-tsap hato apüikox. Ipongma kem khama JOWANPAe zünle kopkya mix opupu changpuix, ija ahoüi. Müimamale ziakaile lekyabu a hünzom Liwibu changle!”

⁷

⁸Chizakle Mosa-e Korah füi akaxle thüi: “Hünzom Liwi hwome apakoplax!

⁹Israel nok Zang-e hünzom a noknu tu angkya zünle koplaxle chix zui to sox ang tsuakle, Nyihom ma JOWANPA thotha angkya hia noknu nuazingle, hwom mwotmokle kox angkya a ahixkya le thütpia?

¹⁰Nange üntoxle hünzom Liwi pangnusa chathua zakya kop angkya chixe panpu ikoxle athaxchu hünzome nguapabu ang achang angchu azongle ngopu!

¹¹Chemtue hünzome Arun to kaxthup-ngaotünle changpuix, ija a, nang tamchu nang füito azuikyabue küithole JOWANPA füi alünkya ang changpu.”

¹²Ifüima Mosa-e Dathan hia Abiram nyi se ang apao, ilaxle hokhie thüi: “Kukhi a münngui!

¹³Ijip nok tokya haxzao füikya haxtok dantoxlaxle ikhato iningkya faonu mongto lang ang apüikya, ibibi ma okho mangui hia? Nange kwom thakma chu apünse tsupia?

¹⁴Otsingtomtata ma nange kwom haxzao füikya haxtok to chiapüi chichangba manzai haxtok hia grep haxtokbu kwom kux hex-ole kop ang chitom, ilaxle athaxchu nange kwom dyen ang azong ngopu. Kwom münhüipu!”

¹⁵Mosa ang mongtsik ilaxle JOWANPA füi akaxle thüi: “Khünak ibue koxkya tö tütachu pongle taxkop, kue hwom to chemchu thaile chimok; kue hwom kux mantsak tuita ngaxchu chilax.”

¹⁶Mosa-e Korah ang thüi: “Ngainop nang ilaxle nang füito azuikya 250 khünak JOWANPA ngwotnui Nyihom to ngui angkya wüi; Arun chuwüi ikhama tüiüi.

¹⁷Hünzom pangnusae wüi makuxkux wündix hok-khua laxlaxle toxlax, ija ma ongan müikya so dankox, ilaxle ija tö-tsap ding ma tö koxüi.”

¹⁸Idaile pangnusae wüi ma kuxkux wündix hok-khua laxlaxle, ima wün füikya wündix dan ilaxle ija ma ongan müikya so dan ilaxle Mosa hia Arun nyi füi Nyihom tunthoma ajong.

¹⁹Ifüima Korah-e khünaknu pangwüi sele asox ilaxle hwom a Mosa hia Arun nyi chito hule Nyihom tunthoma ajong. Allele JOWANPA womle tüikya zangchangjep wünzung khünaknu tu ma ngai,

²⁰ilaxle JOWANPAe Mosa hia Arun nyi ang thüi:

²¹“Ibu khünakbu tuntho angkya hwom nuakfüi to chatün; kue ibu athaxwüi amütüi!”

²²Ikoxlechu Mosa hia Arun nyie thün haxchi to akhuxlaxle thüi: “O, Zang! Nang a pangnu khüzün otong. Khünak tuitae achaxle le khünak pangwüi füi mongmale hi?”

²³JOWANPAe Mosa ang thüi:

²⁴“Khünaknu ang: Korah, Dothan, hia Abiram hwom pom angkya laile paoün thüikox.”

²⁵Ifüima Mosa, Israel nok lompabu füi tomle, Dothan hia Abiram nyi hato ngui.

²⁶Chixe khünakbu ang thüi: “Ibu ochax khünakbu pom füi atsaile ochu to ajonglax ilaxle hwom kux chemli tochu taxlyet. Ile chichang thüiningle hünzom chuwüi ibu ochax khoma hwom füi tomle wüi thule max ang tomüi.”

²⁷Idaile hwom Korah, Dothan, hia Abiram hwom pom füi atsaile pao. Dothan hia Abiram nyi lailaxle hwom pom fülom ma ajongle tüikya; hokhi füi tomle kakonu hia su-sa hwom chuwüi tüikya.

²⁸Mosa-e khünaknu ang thüi: “Hwom to kue ku küntsu-monglua ma hwonkya münchang ikoxle ibu ile mok angkya hanpakma ku a JOWANPAe tsanle apaokya changpule hünzome awanle kop angkya oli changpu.

²⁹JOWANPA chito khange sikngün chemchu chitüile haxmüi zangmale ibu zi ang jangtom thüiningle ku a JOWANPAe tsanle ahüikya ang münchang.

³⁰Ikoxle JOWANPAe achale tütali mokle jangchang, ilaxle chaxwannue akalaxle hwom tuina pangwüi füi afomle hwom jokle jangchang, khünak ibue JOWANPA chilaxle awütkya changdao-koxngünle tsing angkya oli changpu; ija a hwom amalum to ozün ma naxkalax ang hwonkya changle.”

³¹Chixe ija kax ashukkya füi tomle, Dathan hia Abiram hokhi chitong hax kangle hüi,

³²ilaxle hokhi hia kakobu pangwüi jwom. Korah füito azuikyabu hia hwom tuinabu komkaile ima wom.

³³Ikhoma hwom amalum to ozün ma ka. Hwom füi tomle hwom tuinabu chuwüi komkaile koplaxle ka. Hwom tokfüi ma chaxwannu chatle apum ilaxle hwom a omüt ang achang.

³⁴Hwom sopkya zing atatkya zuma, ikhama tüikya Israel khünakbu pangwüi zikle pao. Hwom akhong: “Paoün! Chaxwane kem chuwüi joküi tüile!”

³⁵Ifüima JOWANPAe ajokya wün chuale lai ilaxle ongan müikya tö apüile tüikya 250 khünaknu pangwüi zokle ashun.

³⁶Ifüima JOWANPAe Mosa ang thüi:

³⁷“Nguapa Arun sasün Eliazar füi, zokle ashun füima dantoxkya khünakbu kux wündix hok-khua, khopnan khuabu awüt ang akaxkox. Ija khua angkya wündixbu ojongjong khato chiakle awütdao, chemthüikoxle khua ibu a otsao changle.

³⁸Hwome tö-tsap ma ibu koxkya füi tomle hwom a otsao ang achangdaoa. Idaile hwom ochax khoma mix mik-amüt daokya khünak, ibu kux wündix hok-khuabu koplax ilaxle pakdangkya khuabu ang achangle thuplax ilaxle tö-tsap to chwopkya ohux ang achanglax. Ija a, Israel khünaknu hanpakma tsaikhax-kaxkhün ang ngoüi.”

³⁹Ikhoma nguapa Eliazar-e wündix hok-khuabu lax ilaxle tö-tsap okahux ang lax angkya hanpakma pakdangkya khuakhao ang thuple afe.

⁴⁰Ija a, Israel khünaknu hanpakma, Arun sasün hwomkha angkya lüwüi chichang jangthüiba, owawa JOWANPA tö-tsap hato nguilaxle ongan müikya so zokle JOWANPA ang tö kox angkya oli münchang lükya tsaikhax-kaxkhün ang ngoüi. Chichang thüiningle chix a Korah hia chix füikya khünakbu ningle mik max angkya ataküi. Ibu pangwüi a JOWANPAe Mosa makhange Eliazar ang kaxtom koxkya ningle mokle tsuak.

⁴¹Ofüinyix Israel khünaknu pangwüie Mosa hia Arun nyi ang kaxthup-ngaotünle akax: “Hünkhie JOWANPA khünak züita mik max ang tomdaoa.”

⁴²Hwom pangwüi Mosa hia Arun nyi füi apüile ajong ang asoxlaxle hwom Nyihom chito hüi ikoxle ija a zangfwom füi chwoplaxle ngün tamchu ikhama JOWANPA womle tüikya aho ang zangchangjep ningle wün ngaikya ngün.

⁴³Mosa hia Arun nyi nguilaxle Nyihom tunthoma ajong,

⁴⁴ilaxle JOWANPAe Mosa ang thüi:

⁴⁵“Ibu khünaknu ha angkya füito chatün, hwom kue athax ile onui ma amütüi!” Okhi pangnyi wüi haxchi to hule akhux,

⁴⁶ilaxle Mosa-e Arun ang thüi: “Nang wündix hok-khua koplax, ikhama tö-tsap angkya wün füikya wünhandix danlax, ilaxle ija wünhan dingma ongan müikya so hidaole danlax. Ija koplaxle khünaknu hato nonokhaile hüikox ilaxle hwom otsao ang achangle zomzingkox, momlax! JOWANPA ang athukle mongtsiküna ilaxle okak-olak pwonle le chang angkya owang wangüna.”

⁴⁷Arun-e ija kax ma laxle ma wündix dankya khua lax ilaxle khünaknu asoxle tüikya osungkha ma zikle nop. Chemtue chixe khünaknu ma kak paxkya ngünpuix, chixe ongan müikya so wündix hok-khua angkya wündix danlaxle khünakbu atsao ang zomzing.

⁴⁸Ijae ija kak abax, ilaxle chix a omang hia ozün nyi bama danle tox.

⁴⁹Zikya khünakbu akiak koxle 14, 700 bang, ikhama Korah-e alünkya khoma zikyabu mang a münakiak.

⁵⁰Kaknu lekya zak füima Arun a Nyihom fülom to Mosa hato chat.