Read Wancho Naga Huake Laipex 19 Bible Online

Huake Laipex 19 - Wancho Naga bible

Huake Laipex 19

¹JOWANPAe Mosa hia Arun nyi füi,

²Israel khünaknu a ibibi wanlom kox angkya kaxtom kox: Ofwot chitüikya tamchu mwot to mahüikya hukhinu tuita Mosa hia Arun nyi hato apüile laxkox.

³Okhie ija nguapa Eliazar chak to koxüi. Ija a pom homtho ma alailaxle chix thüntho ma lang angkya changle.

⁴Ifüima Eliazar-e ikha angkya aji hidaole lax üntoxle chix chakkhi makhange ija Nyihom chito othom anüt ma saküi.

⁵Ija omüi pangwüi, okhwon chu, ohak chu, aji chu ilaxle okhax-omong chu, nguapa tunthoma komle zokle ashun angkya oli changpu.

⁶Ifüima chixe Sedar pün hidaole laxüi, haisop angkya okangsa tuita, ilaxle zükhik tuita, ibu wünkha to awütüi.

⁷Ifüima, chixe ma nyi-za soüi ilaxle ma to alüile chixe ti füi liüi; ilaxle tix chix a pom to dong ang thoüi, ikoxlechu zanglom ma chitsaokya ang hansong kople ngoüi.

⁸Owae maihu zoklaxpuix, chixe chuwüi ma nyi-za so ilaxle ma to alüile ti füi li angkya changle, ikoxle chix chuwüi hansong kople chitsaokya ang ngoüi.

⁹Ifüima zanglom ma tsaole ngokya mixsün tuitae maihu zokle lajuak afoxüi ilaxle ibu a zanglom ma tsaothale tüikya onui, pom tokna to danüi. Ijongkha ma Israel khünakbue zanglom ma chitsaokya atsao ang ti achwon pongma ikhato awon ang ija ima thomüi. Ija zom a ochax awüt ang mokpu.

¹⁰Ija lajuak athünkya mixsüne chuwüi chix nyi-za sole changüi, ikoxlechu chix a hansong kople chitsaokya ang nuiüi. Ija wanlom a Israel nok tamchu hwom khato ngole hüikya mixnokbu pangwüi hanpak ang ngoüi.

¹¹Opange müimang to twonle changdao laxpuix hwom a nyix anüt atsao-alangle ngoüi.

¹²Hwome ma alüile atsao angkya ti füi nyix azom lükya to hia nyix anüt lükya to atsaoüi, ifüima chix tsaokya ang achangüi. Ikoxle chixe nyix azom lükya to chix atsaole chichang thüiningle chix a tsaokya ang chichangüi.

¹³Owae müimang-mixmang to twonle laxpuix üntoxle ma alüile atsaole chichangpuix, chix a chitsaokya ang ngoüi, chemthüikoxle atsao angkya tie chix to mali. Chixe JOWANPA Nyihom chitsaokya ang achangpu, ilaxle chix a chemtuechu JOWANPA khünak tuita ang e-ma chilaxüi.

¹⁴Owawa Nyihom mong ma zile jangchang, owawa chix zipongma Nyihom ma tüile asukya mix jangtüi chichangba nople hule jangchang, chix a nyix anüt hanpakma chitsaokya ang ngoüi.

¹⁵Nyihom angkya tiklak-khuakhe chempang ma okahux chitüile changlaxpuix ibu chuwüi chitsaokya ang achangpu.

¹⁶Owawae langkya khünak to chichangba zikmüi-kualo to zikya chang koxlechu homtho to zikya khünak to owawae twonle jangchang chichangba khünak za to hia zuk to twonle jangchang, chix a nyix anüt chitsaokya ang ngoüi.

¹⁷Atsao-alangkya khongai angkya hanpakma, ochax atsaole awüt ang zokle ashunkya hukhinu wünjuak hidaole lax üntoxle tik ma sho ilaxle titsao awutle chang angkya oli.

¹⁸Pongwang lükya ma, owawa zanglom ma tsaole tüikya mixe haisop pünkang tuita laxüi, ija ti khama somüi, ilaxle Nyihom to tamchu ima atüitüi tuinabu to üntoxle chu ikhama tüile asukya khünak pangnusa to saküi. Anyi-lükya ma, owawa zanglom ma tsaole tüikya mixe, khünak za to, mang to chichangba zuk to twonle changkya khünak to ti füi saküi.

¹⁹Nyix azom lükya to tamchu nyix anüt lükya to zanglom ma tsaothale tüikya khünake chitsaokya mix to ti füi saküi. Nyix anüt lükya to chixe ija khünak atsaoüi, ilaxle ma nyi-za so ilaxle tie ma to alüile lile chang füima chix a zanghan dütkya füi tomle otsao ang changüi.

²⁰Owa zanglom ma chitsaokya ang achangpuix ilaxle ma alüile atsaole chichangpuix, chix a chitsaokya ang ngoüi, chemthüikoxle atsao angkya ti füi chix to mali. Chixe JOWANPA Nyihom chitsaokya ang achangle idaile Zang khünak tuita le chieüi.

²¹Hünzome ija wanlom a othuithuima twonle ngo angkya changle. Khünak owae atsao angkya tie lile koxpuix, chixe chuwüi ma nyi-za so angkya changle; owae ti to twonlaxpuix, chix a hansong kople chitsaokya ang ngoüi.

²²Chitsaokya khünake atwontwon pangwüi chitsaokya ang achangpu.