Read Wancho Naga Huake Laipex 20 Bible Online

Huake Laipex 20 - Wancho Naga bible

Huake Laipex 20

¹Pongwang lükya lyetkua ma Israel khünaknu pangwüi Zim faonu mongto ngui ilaxle Kadesh ma athong. Ikhato Miriam zilaxle akhün.

²Hwom athongkya khama ti ojao chitüi, ikhoma khünaknu pangwüi Mosa hia Arun nyi zui ma asoxlaxle

³hokhi to kaxthup-ngaotünle thüi: “Kwom chuwüi Israel khünak kwomtüi-kwomnao hwom füi tomle JOWANPA Nyihom pomtho ma zidao koxwüi müihuse.

⁴Hünkhie kwom ija faokha to omalax ang apüipu? Kwom chuwüi müibu füi tomle ikhama naxzi naxmax ang apüikya hia?

⁵Kwom Ijip haxtok tokya iningkya tütali ali-akan ang chimüikya haxzan to büthüikoxle apüipu? Tsax-nang chitüi, fupsa-nang chitüi, grep-nang chitüi, pomegrenet pünziak nang chitüi; ikhato ling angkya ti tangtang ngaxchu chitüi!”

⁶Mosa hia Arun nyi khünaknu ha angkya atsaile pao ilaxle Nyihom Fülom ma ajong. Okhie thün haxchi to hule akhux, ifüima JOWANPA womle tüikya zangchangjep wünzung hokhi hato laile aho.

⁷JOWANPAe Mosa ang thüi:

⁸“Tsaotsüt Suak tunthoma tüikya kiathox laxlax, ilaxle Arun hünkhie Israel khünaknu nyakle asoxlax. Chukha to noknusa pomtho ma ija long füi akaxkox, ipongma ija angkya ti fuakle laiüi. Ile hünkhie long mong tokya ti, khünaknu hia müibu pangnue tilan müile ling angkya hanpakma okhonguile alai ang thoüi.”

⁹JOWANPA kaxtom ningle Mosa dong ilaxle ija kiathox alaile lax.

¹⁰Mosa hia Arun nyie ija longnu tunthoma khünaknu komle sele asox. Ipongma Mosa-e thüi: “Apale koplax, hünzom alünle ajongkyabu! Kukhie ija longnu angkya ti alaile hünzom ang kox ang thosecha?”

¹¹Ifüima Mosa-e kiathox ajong laxle ija longnu to anyi ma fit. Ija longnu angkya chongkya tümik tuita fuakle lai. Khünaknu hia müibu pangnue ikha angkya ti ling.

¹²Ikoxlechu JOWANPAe Mosa hia Arun nyi füi mongmale ahe. Chixe thüi: “Israel khünaknu tuntho to ku tsak-zong angaile aho angkya hünkhi ma mongong okhonguile chitüikya khoma, kue hwom ang koxüihex-ole tsaokya haxtok to ngui ang hünkhie hwom lom münazuiüi.”

¹³Ija a Meribah ma ile chang. Ejongkha ma Israel khünakbue JOWANPA to kaxthup ngaotünle chang ilaxle JOWANPAe hwom hama chix a otsao changpule aho.

¹⁴Mosa-e Kadesh makhange Edom nok wanghompa hato kaxhole apao. Ibu kaxho mixbue thüi: “Ija kaxho a hünzom zongto ma-mix, Israel jat-li tokhange fakya changle. Kwome chempangle sikngün apongle hüipuix, ija hünzome awanle ngopu.

¹⁵Chemle kwom pupa hwom Ijip nok to kakyahex, ojong khato hwom zangpua obi-obi ngole hüidaopuix; Ijip noke kwom pupa hwom to tamchu kwom tochu chisumüile chemle hwondaopuix,

¹⁶ilaxle kwome chingcha jule JOWANPA hato fong angkya lomle chemle akhongpuix; chixe kwom sopkya atatlaxle chemle kaxtaimix kwom to fong ang tsanle ahüipuix; tamchu Ijip nok tokya laile pao angkya hanpakma chixe chemle kwom lom azuipuix, ibu pangwüi hünzome atatle ngopu. Athax kha kwom a Kadesh ma tüile. Ija a hünzom haxsüt longzipong ma tüikya tingnu tuita changle.

¹⁷Chingchalaxle kwom hünzom haxtok akaile le ang tomhüi. Kwom khünaknu tamchu müibu pangwüi lomnu fole tangthole leüihex; hünzom saxtho hia grep haxtok tom khe-wyale münchangpu, tamchu hünzom tüküibu tokya tichu münlingpu. Hünzom longzi akaile machang machangle kwom lomnu ma tangthole ahamle leüi.”

¹⁸Ikoxlechu Edom noke lanle thüi: “Kwome kwom chaxwan makhange hünzom le ang müntompu! Hünzome le ang azongle jangchang thüiningle, kwome hünzom to achuale singüi.”

¹⁹Israel khünakbue lan: “Kwom a lomnu ma tangthole leüi, ikoxlechu kwome tamchu kwom müibue hünzom tilua tokya ti lingle jangchang, kwome ija otha thomüi; kwom angle angkya hanpak zaza shong-shan fa.”

²⁰Edom noke kaxnong ile achat: “Kwome hünzom a lyetlom münfapu!” ilaxle hwom a Israel nok to sing ang süpahibu huanuma koplaxle lai.

²¹Ile Edom noke hwom chaxwan makhange küithole le ang chitomkya tokhange Israel khünakbu mama lomkua tokhange akwonle pao angkya hato hüi.

²²Israel khünaknu pangwüi Kadesh angkya achex ilaxle Hor Haxnu to ngui.

²³Ija a Edom nok longzipong ma changkya. Ikhama JOWANPAe Mosa hia Arun nyi füi akaxle thüi:

²⁴“Kue Israel khünaknu ang koxüihex-ole tsaokya haxtok to Arun a mün-nguiüi; chix a zi angkya hato nguile; ija a Meribah ma hünkhi pangnyie ku kax ma chilaxle tüidaokya khoma changpu.

²⁵Arun hia chix sasün Eliazar nyi Hor Haxnukho to dünkox

²⁶ilaxle ikhato Arun angkya zompu-zangpa nyi-za siklaxle Eliazar ang awunle laxkox. Arun a ikhato zi angkya changle.”

²⁷JOWANPA kaxtom ma laxle Mosa-e ile mok. Noknue ngünle hwom a Hor Haxnukho to dong.

²⁸Ikhato Mosa-e Arun angkya zompu-zangpa nyi-za siklaxle ibu Eliazar ang awunle kox. Arun a ija haxnukho to zi, ikoxle Mosa hia Eliazar nyi a ikhatokya chatle ju.

²⁹Khünaknue Arun a zidaoa le awan, ilaxle hwom pangwüi nyix 30 chix mang sople nui.