Read Wancho Naga Huake Laipex 21 Bible Online

Huake Laipex 21 - Wancho Naga bible

Huake Laipex 21

¹Chemtue Arad angkya Kanan nok wanghompa-e, Israel khünakbu Kanan haxtok shuathong chikao ma Atharim to lekya lomnu makhange hüile ngokya zing atatle laxpuix, chixe hwom to sing ilaxle hwom khünak hidaole kop.

²Ifüima Israel khünakbue JOWANPA füi tsaotsüt: “Nange kwom ang ibu nok to lüt ang jangtom, hwom amütüi ilaxle kwom nang chak to atsaole koxüi.”

³JOWANPAe ija atatle lax ilaxle Kanan nok to lüt angkya hwom to asun. Idaile Israel khünakbue tingnu ibu komkaile olithu ilaxle ikha ang Hormah le nyak.

⁴Edom nok haxsüt akhople le angkya hanpakma Hor Haxnu dantoxlaxle Israel khünakbu tütsak ti ma tüikya Agaba haxtok chitole. Ikoxle lomba to khünaknue adu ang chitho,

⁵ilaxle Zang hia Mosa hokhi ang kaxma thüile ile kaxthup-ngaotün: “Süt nang chitüi, ti nang chitüile woknuak tilan chak ma azik ang büthüikoxle Ijip chaxwan tokya kwom ija faokha to apüipu? Kwome süt chisax homtoxle ngo ang athax münthoüi!”

⁶Ifüima JOWANPAe khünaknu hato oje füikya pu ahüi. Ijae Israel khünakbu to tule huanuma azik.

⁷Khünaknue Mosa hato nguilaxle thüi: “JOWANPA hünkhi zongto chichangle akaxkya ma kwom ochax kopdaoa. Athax ija pu apao angkya hanpakma JOWANPA to zangjop kox.” Ikhoma Mosa-e khünaknu hanpakma zangjop.

⁸Opang to pue tule changdaopuix ibue ija to hulaxle hwom kakmüi angkya hanpakma, noknue hu ang müikya khama, khop-jan makhange pu tuita zing üntoxle ija pünsak ma lale nwon angkya JOWANPAe Mosa füi akax.

⁹Ikhoma Mosa-e khopnan jan füi pu tuita zinglaxle ija pünsak ma la. Pue tudaokya khünak opange ija pu to hulaxpuix, hwom kak müiüi.

¹⁰Israel khünaknu chizakle le ilaxle Oboth ma pom zaile athong.

¹¹Ija onui dantox füima hwom Moab haxsüt zongma handünchi angkya faonu mongto Abarim maxkya tingtam ma hwome pom zai.

¹²Ifüima hwome Zered Haxsha ma pom zai.

¹³Ikha angkya achex laxle chatle chu hwome Arnon shuanu shuakuxchi ma pom zai. Ija fao a Amor nok haxsüt alople tüikya. (Arnon a Moab nok hia Amor nok longzipong changkya.)

¹⁴Idaile JOWANPA Zanhok Laipex ma: “Sufah wankam angkya Waheb tinglong, ilaxle haxnucha, Arnon shuanu,

¹⁵tamchu Moab longzi chitokya Ar tingnu ha alople tüikya haxnuchabu, ibu mo wünle.”

¹⁶Imakhange hwom tüküibu le nyakkya haxtok alople pao. Ikhato JOWANPAe Mosa ang thüi: “Khünaknu pangwüi asox ang tomkox ilaxle kue hwom ang ti faüi.”

¹⁷Ipongma Israel khünakbue ija tsai ngao: “Tüküibu, hünzome ma tibu alaikox; Ilaxle kwome tsai füi ija pwonzaole changüi:

¹⁸Wanghom naosome thokya tüküibu Ilaxle chu khünaknu lompabue, Chongwangpa paxfua hia Hwom kiathoxbu füi thole alaikya tüküibu.” Hwom ija faonu angkya Mattanah to achex,

¹⁹ikha angkya hwom Nahaliel to pao, ilaxle Nahaliel makhange Bamwoth to,

²⁰ilaxle Bamwoth angkya a Moab haxsüt to, Piska Haxnukho süfang ma sak-hax atale ngünkya haxtok to pao.

²¹Ifüima Amor nok wanghompa Sihon hato Israel khünakbue kaxhole akat:

²²“Kwom hünzom haxtok makhange le ang tomhüi. Kwom tamchu kwom müibu lomtang angkya nong-tsax to münkhepu; hünzom zim-hax to tingle münchangpu tamchu hünzom tüküi angkya ti münlingpu. Kwome hünzom longzi akaile machang tanto lomnutang ma küithole aham ngoüihex.”

²³Ikoxlechu Sihon-e Israel khünaknu chix haxtok akaile le ang chitom. Chixe ma süpahibu afoxlaxle Israel khünakbu to sing ang faonu mongto Jahaz alople akat.

²⁴Ikoxlechu Israel khünakbue ibu zan-nok huanuma lang ilaxle Jabok zongto shuakuxchi Arnon shuanu makhange ibu haxtok hwople lax, ija a Amnon nok alople; büthüikoxle Amnon nok a hwom longzi müile ziakop laxle tüikya.

²⁵Idaile Israel khünakbue Amor nok tingkhuabu pangwüi lax; Heshbon ilaxle ija akhople tüikya tingnubu pangwüi, ilaxle ibu ma hwome tingtan-nokzing.

²⁶Heshbon a Amor nok Wanghompa Sihon pongwün tingnu changkya. Chixe itho angkya Moab wanghom füi azanlaxle chix haxtok Arnon shuanu alople pangwüi hwople kop.

²⁷Ikhoma tsaipae ile ngao, “Heshbon to nguihüi, wanghompa Sihon tingnu to! Ija tamchatle zingle achatkya kwome ngünse tsule.

²⁸Hanpak tuita ma ija Heshbon tingnu makhange Sihon süpahibu wünle lailaile pao; Ijae Moab nok angkya Ar tingnu amüt, Ilaxle shuakuxchi Arnon angkya haxnubu zokle ashun

²⁹Moab ma ngokya khünakbu, hünzom zongto ija a chemkuxma zadün changpuix! Hünzom Kemosh baozang to shwomkyabu olithu ang tom! Hünzom baozange lükabu a pünpao ang achang, Ilaxle shekobu a Amor nok wanghompa zanda ang achang.

³⁰Ikoxle athaxpi ibu putong hwom a amütdaoa, Heshbon makhange Debon alople, Nashim makhange Medeba.” Zui angkya Nashim alople.

³¹Idaile Israel khünakbue Amor nok haxsüt ma tingtan-nokzing

³²ilaxle Jazar tingnu tingtakle chang ang sümüikya lomkua to hu ang Mosa-e khünakbu tsanle apao. Israel noke ijakha hwople kop ilaxle ija akhople tüikya tingnubu üntoxle ikhama tüikya Amor nok jwonle apao.

³³Ifüima Israel khünaknu Bashan chikao male. Bashan nok wanghompa Og, süpahibu koplaxle hwom to sing ang Edrüi ma lai.

³⁴JOWANPAe Mosa ang thüi: “Chix thua taxza, kue hünzom ang chix to, chix khünakbu to tamchu chix haxtok to anao ang tomüi. Heshbon makhange apünle ngokya Amor nok wanghompa Sihon to hwonkya lailaile chix to chuwüi hwonkox.”

³⁵Ikhoma Israel khünakbue wanghompa Og, sasün hwom tamchu chix khünakbu lang. Ozün ma owachu chitox; ilaxle hwome ibu haxtok pangwüi hwople kop.