Read Wancho Naga Huake Laipex 22 Bible Online

Huake Laipex 22 - Wancho Naga bible

Huake Laipex 22

¹Israel khünakbu ikha angkya achex ilaxle Jeriko füi atale, Jordan zongma handünchi angkya Moab haxsha ma pom zaile athong.

²Chemtue Moab nok wanghompa sasün Balak-e, Israel khünak alüile ngax chitüikyabue Amor nok to ziamale jao hwonkya atatle laxpuix,

³chix tamchu chix khünakbu pangwüi za.

⁴Moab noke Midi nok lompabu füi akax: “Ochua müishix-zanmabue maihupongpa fum tsünle saxkya lailaile kem akhople tüikya tütalichu bakle ama angkya changa.” Ikhoma wanghompa Balak-e

⁵Beor sasün Balam nyak angkya hanpakma kaxhomixbu tsanle apao. Balam a Amao nok to Eufrat shuanu zui angkya Pethor ma tüikya. Ijabue chix hato Balak kaxho ile apüi: “Ijip nok tokya jat-li tuita nguile tüikya kue awan ang kopdaoa; hwom khünakbu a chaxwan thün jao awangle chiakle tüile ilaxle kwom haxtok lax ang hwome kwom to aza-anale ngole.

⁶Kwom füichu hwom wüi huanuma tüile, idaile chingchalaxle ngui üntoxle nange pi ku hanpak ang hwom to thuakzomle changkox. Owatsing, ile jangchang thüiningle kwome ibu to lüt ang tsuaküi ilaxle kwom haxtok angkya hwom jwonle apao ang thoüi. Kue awan ngopu, chemtue nange mohimanle changpuix, khünaknue mohiman kop, ilaxle chemtue nange thuakzomle changpuix, khünaknue othuak-ozom koppu.”

⁷Idaile Moab nok hia Midi nok lompabue, thuakzomle chang angkya hanpakma omün koplaxle Balam hato khünakbu apao; chixe Balam hama Balak-e fakya kaxho kox.

⁸Balam-e hwom ang thüi: “Aja ima pomdao, ilaxle JOWANPAe chem akaxpuix ija kue ngainop wünle faüi.” Ikhoma Moab nok lompabu Balam hama wünpomle tox.

⁹Zang nguilaxle Balam ma atüi: “Nang füi tomle wünpomle tüikya ibu a owapang?”

¹⁰Chixe lan: “Hwom a Midi nok wanghompa Balak-e akatkya chix khünakbu changle.

¹¹Ijip nok tokya nguikya khünakbue chix chaxwan awangdaoa lüta. Chixe ibu lütlaxle jwonle apao tho angkya hanpakma hwom to thuakzomle changkox lüta.”

¹²Zang-e Balam ang thüi: “Khünak ibu füi tomle nang taxpao, ilaxle Israel khünakbu to thuakzomle taxchang, chemthüikoxle ibu a ku mohiman changle.”

¹³Ofüinop Balak kaxho mixbu hato nguilaxle Balam-e thüi: “Chatlax; JOWANPAe ku ang hünzom füi tomle taxpaole abaxle.”

¹⁴Ikhoma ibu chat ilaxle Balak hama, hwom füi tomle Balam ngui ang chithokya kaxho kox.

¹⁵Ofüimachu Balak-e chix lompabu owangpongkya füi süluile akat. Ibu a owangpongkyabu füichu alixachongbu.

¹⁶Hwom Balam hato ngui ilaxle wanghompa Balak kaxho ija kox: “Tütaningkyae abaxle lechu nang ku hato chinguile taxchang!

¹⁷Kue nang ang hingho mongtex ma nguile koxüi ilaxle nange chem akaxpuix ija mokle faüi. Chingchalaxle nangpi ku hato nguilaxle khünak ibu to thuakzomle changfa.”

¹⁸Ikoxlechu Balam-e lan: “Balak-e ku ang chix wanghom homlo angkya khop hia hun pangwüi faüi thüikoxchu, kue JOWANPA ku Zang kaxtom ahiküsa ngaxchu chilaxle tüi ang müntho.

¹⁹Ikoxlechu otho angkyabu ningle hünzomchu ajapi ima pomdao; JOWANPAe ku füi tamchatle zangwün angkya olom tüichahex, shong-huhax.”

²⁰Ija jachu Balam hato Zang nguilaxle thüi: “Ibu khünakbue nang hwom füito paohaxle tamchatle se ang nguikya jangchang thüiningle nang a hwom füito pao ang achwonlax; ikoxlechu ku kaxtomtom ma wüi moklax.”

²¹Ikhoma ofüinop Balam a mantsak kho ma ngalaxle Moab nok lompabu füi tomle achex.

²²Balam pao ang achexkya to Zang ang mongzom chimüi. Chix füi tomle dapa anyi laxlaxle Balam ang mankho ma ahamle tüipongma, chix lomtsyen angkya hanpakma JOWANPAe kaxtaimix chix lomtang abangle ajong.

²³Chemtue ija mantsake changlo koplaxle kaxtaimix tuita lomtang abangle ajongle ngokya ngünle laxpuix, ija müi a lom-mun to chiakle pao ang azong. Balam-e fitle ija müi tamchatle lom ma wüi apüi.

²⁴Izuma kaxtaimix a lom hitkya kha, pangnyichi ma long katuk füi tüikya, grep haxtok anyi obama ajong.

²⁵Chemtue ija mane kaxtaimix ngünle laxpuix, ija müi long tüikya haxkax chito lele long to Balam cha thule lax. Balam-e tamchatle chuwüi ija müi to fit.

²⁶Tamchatle kaxtaimix thüntho chito achale le; izuma a, nong-tsax to tsiakle le ang chimüikya ziasyen khama ajong.

²⁷Izuma, chemtue mane kaxtaimix ngünle changpuix, ija müi tangle ajong. Izuma Balam ang mongtsik athuk ilaxle ija müi to sansüi füi fit.

²⁸Izuma JOWANPAe man ang zangwün angkya zong kox, ilaxle ija müie Balam ang thüi: “Kue nang to chemthüidaopu? Nange ku to othom azom ma jao fitpu?”

²⁹Balam-e lan: “Nange ku ongat ang zingdaoa! Ku ma changlo asukoxba kue nang langdaose.”

³⁰Ijama mane lan: “Tsünjang masule nang baxlaxle aham ngokya man a ku münchang hexnyi? Kue anyixkya lailaile nang to tühwondaocha?” Balam-e lan: “Mahwon.”

³¹Izuma changlo koplaxle thünthochi ma kaxtaimix tuita ajongle ngokya JOWANPAe Balam ang ngün ang tom, ilaxle Balam-e haxchi to thün ahole akhuxlaxle chix chitong to ma alüile tswonle awüt.

³²Kaxtaimix-e sa: “Nange nang man to iningle othom azom ma büthüikoxle fit? Ku a nang lomtsyen ang nguipu, chemthüikoxle nang a ijachi to pao angkya mwot ojao münchang.

³³Nang mane ku ngünlaxle othom azom majao lom tsiakle pao ang azongpu. Ile chichang thüiningle kue nang mix lang üntoxle man mix a azünse.”

³⁴Balam-e lan: “Ku a thaidaoa. Ku lomtsyen ang nang ku lomtang ma ajongle ngoünpuixle kue chitsing kha; ikoxle athaxchu ku ija lom tole angkya nang zongto thaikya jangchang thüiningle, ku a hom towüi shong-chatüi.”

³⁵Ikoxlechu kaxtaimixe thüi: “Khünak ibu füi tomle paolax, ikoxlechu kue chem akaxkox thüipuix, ijatix akaxlax.” Ikhoma Balam a ibu füi tomle pao.

³⁶Chemtue Balak-e Balam hüile ngokya kax atat ang koppuix, chix a Moab longzi ma tüikya Arnon shuanu kax angkya Ar tingnu alople pongto zale apong.

³⁷Balak-e chix ma atüi: “Kue pongwang ole nang ngui angkya hanpakma se ang khünakbu akat pongma nang büthüikoxle chingui? Kue nang hato hingho chaktwon okhonguile kox ang münthokoxlax le mongaokya hia?”

³⁸Balam-e lan: “Ku oja chingui koxa le hia? Athax ku nguingalehi! Ikoxlechu ku ma Chemtsak-chemzong tüile le? Kue nang JOWANPAe akaxlax le athüithüi tix akax ang thowüi.”

³⁹Ikhoma Balam a Balak füito Huzoth tinglong to tomle pao.

⁴⁰Ikhato Balak-e maihu hia chunbu lang üntoxle Balam hia chix füito nguikyabu ang ibu kox.

⁴¹Ngainop ningle Balak-e Balam a Bamwoth Bal alople pao. Imakhange Balam-e Israel nok haxsüt hidaole ngün ang kop.