Read Wancho Naga Huake Laipex 23 Bible Online

Huake Laipex 23 - Wancho Naga bible

Huake Laipex 23

¹Chixe Balak ang thüi: “Ikhama ku hanpak ang tö-tsap anüt zinghüi, ilaxle ku hato maihupong anüt üntoxle chunla anüt le apüihüi.”

²Balak-e chix füi akaxkya ningle mok, ilaxle Balam hokhie tö-tsap ma tiale maihupong hia chunla tompong-tompong tö kox.

³Ifüima Balam-e Balak ang thüi: “Nang ija zokle ashunkya nang tö zui ma ajongle ngothün; ku a JOWANPA apong ang cha ang paohax. Chixe ku hama chempang ahopuix ibu kue nang hama wünüi.” Ile chix haxnukho to chix tata dong,

⁴ilaxle chix füi Zang apong. Balam-e chix ang thüi: “Kue tö-tsap anüt zinglaxle ibu ma maihupong hia chunla tompong-tompong pangnu mawüi tö koxle changdaoa.”

⁵JOWANPAe chempang akax angkya hex ija zangwün koplaxle Balam a Balak hato chat ang tom.

⁶Ikhoma chix chat ilaxle Balak a, Moab nok lompabu füi tö koxle tö-tsap zui ma wüi ajongle ngokya ngün.

⁷Balam-e chix jekax akax ang süt: “Ku a Moab nok wanghompa Balak-e apüipu Siria tokya, handünchi haxnu to ngokya a. Chixe thüi: ‘Oman ku füi akaxlax. Israel khünaknu to thuakzomle akaxkox.’

⁸Zang-e thuakzomle chichangkya to kue chemle thuakzom ang thoüi, Chichangba Zang-e chiakax khato omüt-ozik kax kue chemle akaxüi?

⁹Tsuathakya longnubu kho tokhange kue hwom ngün ang thole; Haxhuabu tokhange kue hwom to hungo ang thole. Hwom a matata ngokya jat-li tuita changle; Mama jat-libu to kaile hwom to mohimankya hwome awan ngole.

¹⁰Israel nok sixli hwom a haxbu lailaile: Hwom a akiak ang jao chithole tüile. Kue ku hanpak Zang khünakbu lailaile ahom ang tomhüi; Otsao khünak tuita ningle ku mongsom ma zi ang tomhüi.”

¹¹Ifüima Balak-e Balam ang thüi: “Nange ku to chem hwonpu? Nang kue ikhato ku zanpabu to thuakzom ang sepu, ikoxle nange chem mokpuix ibu pangwüi hwom to mohimankyakya wüi.”

¹²Chixe lan: “JOWANPAe chem akaxlax thüipuix ija tix kue akax ang tsuak.”

¹³Ifüima Balak-e Balam ang thüi: “Oman, ku füito mama khato achexhax. Etokhange a Israel nok hidaole wüi ngün ang thoüi. Etokhange ku hanpak ang hwom to thuakzomle changkox.”

¹⁴Piska Haxnu ma tüikya Zofim haxtok to chixe Balam pao. Ekhato chuwüi tö-tsap anüt zinglaxle ibu ma chuwüi tiale maihupong tompong tamchu chunla tompong langle tö kox.

¹⁵Balam-e Balak ang thüi: “Zokle ashunkya ija nang tö zui ma ajongle nuithün; ku a chukha alople Zang füi apong ang paohüi ang.”

¹⁶JOWANPAe Balam apong ilaxle chixe chemle mok angkya hex ija apua, ifüima ija kaxho fa ang Balak hato achat.

¹⁷Chix chatkya thoma Balak a chix tö zui ma ajong lüwüi nui. Chix füi tomle Moab nok lompabu chuwüi tüikya. Balak-e, JOWANPAe chemle akaxpuix, le atüi.

¹⁸Ifüima Balam-e ija jekax akax: “Zippor sasün Balak, oman, Ilaxle ku kax to na thale apalax.

¹⁹Zang a khünak lailaile atsekya mix münchang, Chix a khünak tuita ningle monglüile ngokya mix münchang. Chixe chem tsaopuix, ijatix mokpu. Chixe chem akaxpuix, ija a tsuakpu.

²⁰Ku ang a mohiman ang adangle fadaoa, Ilaxle Zang-e mohimanle changdaokya füima, kue ija achatle lax ang müntho.

²¹Israel khünaknue füichima Shoma hia sikngün münapongüile kue ngünle tsuakle. JOWANPA hwom Zang a hwom füi tüile; Hwome chix a hwom chongwangpa changpule khuapule.

²²Ijip nok tokya hwom Zang-e apüipu, Shixkya maihupongpa tuita ningle chixe hwom kho awa ang azan.

²³Israel nok zongto chisumüile hwontsuak angkya Okhun-okhe ikhama chemchu müntüi. Athax khünakbue Israel nok bama akaxüi, ‘Hwom hanpakma Zang-e mokkya to hulax!’

²⁴Israel jat-li a tuita mailang ningle changle; Ijae jok-lingle machang tanto mong nazakkya chitüi, Chixe langkya ajibu maling tanto a.”

²⁵Ifüima Balak-e Balam ang thüi: “Nange Israel nok to thuakzomle chichang-tsuakbachu mohiman koxle tomtata a taxchangünfa!”

²⁶Balam-e lan: “JOWANPAe chem akaxpuix, kue ijatix zex angkya le münakax dai hia?”

²⁷Balak-e thüi: “Oman, ku füito, kue nang mama khato paofang. Owatsing, ku hanpakma, etokhange ibu Israel khünakbu to thuakzomle chang angkya Zang mongchu tsu ang tsuak.”

²⁸Ikhoma sak-hax atale ngünkya Peor Haxnukho to chixe Balam dün.

²⁹Balam-e chix ang thüi: “Ku ang tö-tsap anüt zingle fahüi ilaxle maihupong anüt tamchu chunla anüt apüile fahüi.”

³⁰Chix füi akaxkya ningle Balak-e mok, ilaxle tö-tsap ibu ma tiale maihupong hia chunla tompong-tompong tö kox.