Read Wancho Naga Huake Laipex 24 Bible Online

Huake Laipex 24 - Wancho Naga bible

Huake Laipex 24

¹Athax a JOWANPAe chix ang Israel khünakbu to mohimanle chang angkya Zang mongtex awanle lax, idaile izuma Balam-e ongo-ziawan lomle chipao. Chixe sak-hax chito atale hukoxle

²Israel khünaknu ngün. Hwom a homjen-homjen ma athütlaxle pomzai üntoxle athongle tüikya. Zang Chasae chix to fünthole twon

³Ifüima chixe ija jekax akax: “Beor sasün Balam makhange hokya kaxho, Owae tsaothale ngün ang tsuakpuix ija khünak zangwün.

⁴Owae Zang kax atat ang tsuak puix. Mike hungo-ngale mikza ma kue wünmang ngün ang tsuakle Khüthak Zang tokhange mikza ma ale lea.

⁵Israel nok nyihombu osün tüle müi,

⁶Tsyenthüile tsuatha tüikya pam-pünbu ningle chichangba shuakax ma tüikya küisa ningle, JOWANPAe küikya aloi-khix ningle Chichangba tikax angkya Sedar-pünbu ningle.

⁷Hwome zangwat okhonguile kopüi Ilaxle ti okhonguile tüikya haxtok ma hwome manzaile changüi. Hwom wanghom a Amalek nok wanghom Agag füichu süchongüi, Ilaxle chixe ochu-ochu kople apünüi.

⁸Zang-e hwom Ijip nok tokya apüi; Shixkya maihupongpa tuita ningle hwom hanpakma chix ahok-azan. Hwome hwom zanpabu jok-ling, Hwom zabu thuple akhix, hwom sanhap fitle awüt.

⁹Ija jat a chax shix tuita ningle; Ija jiple ngopongma azwot angkya owa angchu mong chichong. Israel nok to mohimankya mix mohiman changüi, Israel nok to thuakzomle changkya mix thuakzom changüi.”

¹⁰Balak ang mongtsik laxle chak atom, ilaxle Balam ang thüi: “Kue nang a ku zanpabu to thuakzom angkya hanpakma sewüi, ikoxle hwom to thuakzomle changse tsyen to nange hwom to ija-ole othom azom ma mohimanüna.

¹¹Athaxpi hom to chatlax! Kue nang ang hingho-chaktwon koxüile tsaopu, ikoxle ibu hingho-chaktwon kop angkya hanpakma JOWANPAe nang to abax ngüna.”

¹²Balam-e lan: “Nange ku hato akatkya kaxho mixbu füi,

¹³nange ku ang nang wanghom homlo angkya khop hia hun bakle koxkoxchu, ku mongtextex to moklaxle kue JOWANPA kaxtom chilaxle chang angkya münmüiüi. JOWANPAe ku ang chem akaxlax thüipuix ija tix kue wünüiwüi, le thüidaokya a.”

¹⁴Balam-e Balak ang thüi: “Athax ku a ma khünakbu hato chatüi, ikoxlechu ku chatüima, athax füichima Israel khünakbue hünzom to chemle moküihex, ija bama kaxkhün koxle toxfang.”

¹⁵Ifüima chixe ija jekax akax: “Beor sasün Balam kaxho, Tsaothale ngün ang thokya, khünak tuita zangwün,

¹⁶Owae Zang-e chem akaxpuix ija atat ang tsuak puix Ilaxle Khüthak Zang tokhange hüikya pongle koppuix. Shimang chito kue akhinle hupongma ngün Khüthak Zang tokhange mikngün-ohün tuita.

¹⁷Kue mahüikya thochi to achale hu, Ilaxle kue Israel jat-li ngünlelax. Wanghompa tuita, nyankya lyettsi ta ningle, lai angkya ija jat-li tu ma. Lyettsi chongkya tuita ningle chix a Israel tu angkya laiüi. Chixe Moab angkya lompabu to hongüi Ilaxle Seth khünaknu pangwüi fitle anguaküi.

¹⁸Chixe Edom nok ma chix zanpabu to lütle tsuaküi Ilaxle hwom Chaxwan chix haxtok ang zingüi, Ilaxle Israel noke chizakle zan to lütle ngoüi.

¹⁹Israel jat-li a hwom to chifa fang ma thomüi Ilaxle okia ma ngokya khünak tuita ngaxchu ozün ma chitoxle wyakle awütüi.”

²⁰Ifüima chix mikngün ma Balam-e Amalek nok ngün ilaxle ija jekax ngai: “Amalek nok a pangnu füi tsak-zongle tüikya nok, ikoxlechu oshukma othuithui hanpak ang maxle paoüi.”

²¹Chix mikngün ma chixe Ken nok ngün, ilaxle ija jekax ngai: “Nang ngokya kha tokdomdale tüile, Longzakzyen to azopkya osazop lailaile chem chaza chitüile,

²²Ikoxle hünzom Kin nok a amüt angkya changle Asiria noke hünzom kople paokya zuma a.”

²³Balam-e ija jekax ngai: “Shuakux chima asoxle tüikya khünakbu a owapang?

²⁴Saipras tokya tingtak mix khua ma hüiüi; Ibue Asiria hia Ebnar tingtakle kopüi, ikoxlechu hwom wüi alüile omüt alanle maxüi.”

²⁵Ifüima Balam achwon ilaxle hwom to chat, ilaxle Balak chuwüi mahom to chat.