Read Wancho Naga Huake Laipex 25 Bible Online

Huake Laipex 25 - Wancho Naga bible

Huake Laipex 25

¹Akasia haxhua ma Israel noke pom zailaxle ngopongma, ikhato tüikya Moab shekobu füi Israel nok lükabue chinunchakkaile chang.

²Ibu shekobue, Moab nok baozang ang tö koxle pangpwon sax pongma ibu khünakbu ahyen. Israel khünak ibue ikhato fongsax ilaxle Peor angkya baozangbu to shwom.

³Ikhoma JOWANPA ang hwom füi mongma

⁴ilaxle Mosa füi akaxle thüi: “Israel nok lompabu pangwüi koplax ilaxle ku kax ma laxlaxle khünak ibu a anyixningkya zangngai to langle awütdao, ifüimatix ku khünaknu füikya ku mongma zaküi.”

⁵Mosa-e Israel nok homjen lompabu füi akax: “Hünzom pangwüi ma saxthomthom angkya khünakbu, opang Peor angkya Bal baozang to shwomkyabu ang achangle paolaxpuix, ibu lang angkya changle.”

⁶JOWANPA Nyihom tunthoma hwom mang sople ngopongma, Israel nok mixsün tuitae Midi nok sheko tuita, Mosa hia Israel khünaknu noke ngünle chix pom khato anop.

⁷Chemtue Eliazar sasün, nguapa Arun susün Finehas-e ija ngünle laxpuix, chixe khünaknu tusox dantoxlaxle ikha angkya ajongle pao. Chixe pax tuita lax,

⁸ilaxle ija mixsün hia mixcha nyi achuale nyihom mongto dong ilaxle hokhi pangnyi apatle pax füi top. Ile Israel khünaknu othom ma amütle ngokya ochax okak-olak zak ang tom,

⁹ikoxlechu ija chak ma 24000 khünak mik amütle tsuakdaokya.

¹⁰JOWANPAe Mosa ang thüi:

¹¹“Finehas-e chem mokdaolaxpuix, ikhokho ma athaxpi Israel khünaknu füikya ku mongtsik müntüiüi. Chixe ku to shwomkya boma owawa to shwomkya adu ang chitho, ikhoma kue hwom ku mongtsik thama ma max ang chitom.

¹²Idaile kue chix füi ojento lax angkya kaxfün to longzüt-sele tsukya chix hama wünle laxkox.

¹³Chix tamchu chixsu chixsabu a othuithuima zompu-zangpabu ang zingle thomüi, chemthüikoxle chixe ku zan to kakya adu ang chitho ilaxle khünaknu ang ochax thailak atak ang tom.”

¹⁴Israel khünak owa Midi nok mixcha füi tomle langle awütpuix chix a Salu sasün Zimri changkya. Salu a Simeon saxthom ma lompa tuita changkya.

¹⁵Ija mixcha mün a Kozbi changkya. Zur, she hopa a Midi nok saxthom khama lompa tuita changkya.

¹⁶JOWANPAe Mosa ang kaxtom koxle thüi:

¹⁷“Midi nok to singkox ilaxle hwom amütkox,

¹⁸chemthüikoxle Peor ma hwome hünzom dyenlaxle chichangkya mwot mokkya tamchu Peor ma kakle pongma langkya mixcha Kozbi-e mokkya mwot, ibu khoma hwom tingtak ang tompu.”