Read Wancho Naga Huake Laipex 27 Bible Online

Huake Laipex 27 - Wancho Naga bible

Huake Laipex 27

¹Mahlah, Noa, Hoglah, Milkah, hia Tirzah hwom a Zelofehad, owa Hefar sasün changkya hex, chix sacha hwom changkya. Hefar a Gilid sasün, chix Makir sasün, chix a Manasseh sasün, chix a Jusep sasün.

²Hwom nguilaxle Mosa, nguapa Eliazar, lompabu tamchu Israel khünaknu pomtho ma JOWANPA ngwotnui Nyihom tunthoma ajong ilaxle thüi:

³“Kwom apa a lüka miktsang tuita chitoxle faokha towüi zile paopu. Chix a Korah, owae JOWANPA füi alün-aloxle changpuix, chix füito azuikya khoma womkya mikmüt chichang; chix a chix huak ochax khoma zile paopu.

⁴Kwom apa ang lüka miktsang chitüikya khomale Israel homjenbu kha angkya chix mün büthüikoxle amütüi? Kwom ang chuwüi apa füikya haxnu-homsa hwom füi tomle tingtok laxhüi.”

⁵Mosa-e hwom zangwün JOWANPA hato apüi,

⁶ilaxle JOWANPAe chix ang thüi:

⁷“Zelofehad sasün hwome chem jupuix ija zangwün otsingtsing changle; hwom hopa füikya haxnu-homsabu khato hwom ang chuwüi tingtok laxkox. Ija mantswon hwom thoma bang ang tomkox.

⁸Lüka miktsang chitox homtoxle owawa zile jangchang thüiningle, chix tingtok man, chix sacha owawae tswon angkya oli changpu, le Israel khünaknu hama akaxle laxkox.

⁹Chix ang sacha hwom ngaxchu chitüi thüiningle ija a hotüi-honao hwome tswonüi.

¹⁰Chix ang hotüi honao owachu chitüi thüiningle ija a hopa füikyabue tswonüi.

¹¹Chix ang hotüi-honao hwomchu chitüi tamchu hopa hwom füikyachu owa chitüile jangchang thüiningle, ija a hwom haxnu-homsa khama owa süsoxle tüipuix, chix ang tswon ang tomüi, ilaxle chixe mating matok ang achangle thomüi. Israel khünaknue ija a wanlom athui tuita ang thom angkya changpu; chemthüikoxle JOWANPA kue ija kaxtom hünzom ang koxpu.”

¹²JOWANPAe Mosa ang thüi: “Abarim Haxnukho to donglax, ilaxle kue Israel nok ang kox angkya haxtok to atale hulax.

¹³Nange ija ngünkya füima nang chuwüi hüntüi Arun lailaile zile paoüi,

¹⁴chemthüikoxle Zim faonu mongto hünkhi pangnyie wüi ku kaxtom füi alünle changdaoa. Chemtue Israel khünaknue Meribah ma ku to kaxthup-ngaotünle akaxpuix, nange ibu khünaknu hama ku tsak-zong angaile aho ang chitsu.” (Meribah a Zin faonu mong tokya Kadesh ma tüikya shuasa changle.)

¹⁵Mosa-e jop,

¹⁶“JOWANPA Zang, khüzün pangnu otong, ibu khünaknu lomzun ang asukya mix tuita kamhüi;

¹⁷azan pongma hwom lom azüi ang thokya khünak, ile changkox tix wüi nang khünaknu, nyetmix chitüikya chunbu ningle chichangüi.”

¹⁸JOWANPAe Mosa ang thüi: “Nun sasün Jihusua kamlax. Chix a tsuak angkya mix changle, ilaxle nang chak a chix khangkho ma dankox.

¹⁹Chix a, Israel khünaknu noknue ngünle nguapa Eliazar pomtho ma ajong ang tomkox ilaxle pangnusa mikngün ma chix a nang lüi angkya mix changpule ngaikox.

²⁰Chix ang züizüi nange apünkya zong laxkox, ile Israel khünaknue chix kax ma laxle tüi angkya hanpakma.

²¹Chixe nguapa Eliazar to mongongkya tüiüi, chemthüikoxle Urim hia Thummim twonlaxle chixe ku mongtex awanle tsuaküi. Ile Eliazar-e Jihusua tamchu Israel khünaknu pangnusa to pangwüi lom ma adangle fa ang thoüi.”

²²Mosa-e chix füi JOWANPAe akaxkya lailaile mokle kox. Chixe Jihusua a nguapa Eliazar hato apüi ilaxle Israel khünaknu tunthoma ajong ang tom.

²³JOWANPAe fakya kaxtom ningle Mosa-e Jihusua khangkho ma chix chak dan ilaxle chix man ma lompa ang achang angkya chix changpule ngai.