Read Wancho Naga Huake Laipex 28 Bible Online

Huake Laipex 28 - Wancho Naga bible

Huake Laipex 28

¹JOWANPAe Mosa ang

²otutu ma Zang ang chixe, Zang zongma müikya sütling tö kox angkya bama Israel khünaknu ang adangle fa angkya kaxtom kox.

³Ibu a JOWANPA hato apüile kox angkya sütling töbu changpu: nyixfokya to zokle ashunkya tö hanpak ang zanglao kho nguidaokya chun ola ofwot chemchu chitüikya anyi.

⁴Tuita a anopningle töüi ilaxle ata mix a hansong ma töüi.

⁵Pangnyi wüi müikya olip münga pe tuita füi awon saxziak tö ang koxkya ankhix füi kox angkya changle.

⁶Ija a pangwüi zokle ashunle nyixfokya to kox angkya tö changpu. Ija a Sinai Haxnu ma sütling tö tö ang koxle owang wangkya changpu. Ija ongan a JOWANPA zongto tüle müikya ongan changpu.

⁷Pongwang angkya chun hosa füi, grepti-ju tö hanpak ang, tö ang koxle grepti-ju pe tuita thokle awüt.

⁸Anopningkya tö lailaile hansongechu tuita tüikya chun hosa tö kox; ija füi tomle grepti-ju tö chuwüi kox. Ija chuwüi JOWANPA zongto ongan müikya süt tö changle.

⁹Sabath nyix hwome zanglao tuita nguidaokya, ofwot chemchu chitüikya chun anyi füi saxziak tö kox. Hwome tuak anyi an olip münga füi awon kox, ilaxle grepti-ju chuwüi kox.

¹⁰Zokle ashunkya tö Sabath foto, nyixfo to koxkya tö hia obo ang grepti-ju tö koxüi.

¹¹Lyetkua foto lyetwangwang ma JOWANPA ang zokle ashunkya tö kox angkya changle; ija tö ang maihupongsa anyi, chun ola tuita, zanglao nguidaokya chunlasa anüt, ojao ofwot chitüile müikyabu kox angkya changle.

¹²Saxziak tö hanpak ang olip münga füi awon ankhix laxkox; maihupong tuipong foto an tuak azom pong; chun ola füi tuak anyi pong;

¹³ilaxle chun tuipong foto tuak pong kox angkya changle. Ija zokle ashunkya tö a süt tö ang koxkya changle. Ija ongan a JOWANPA zongto tüle müile.

¹⁴Grep-ti koxkya olom a maihupong tuipong to grepti-ju pe anyi pong, tsoxta okao a chunla füi tomle ilaxle chun hosa tuipong füi tomle grepti-ju tsoxpong. Ija a lyetkua owang nyix-nyix zanglao atatle koxkya zokle ashunkya tö hanpak ang mok angkya olom.

¹⁵Nyixfokya to koxkya zokle ashunkya tö hia grepti-ju tö, ija nyito bole, zwonpong tuita chuwüi ochax tö hanpak ang kox angkya changle.

¹⁶Pongwang lükya lyetkua nyixbün anyi nyixkha JOWANPA to münchong koxle Kaitox Pangpwon sax angkya changle.

¹⁷Nyixbün aga lükya to Zanglom Pangpwon owang wangkya nyix anüt kople nuiüi. Ibaba ma twonkhax chiawon homtoxle zingkya ankhao zaza saxüi.

¹⁸Pangpwon ma pongwang lükya nyix hünzom zangshwom ang asox angkya changle, idaile ija nyix mwot chemchu chimoküi.

¹⁹Süt tö hanpak ang zokle ashunle tö ibibile laxkox: tö koxkya ma maihupongsa anyi, chun ola tuita, ilaxle zanglao nguidaokya chunlasa anüt, ibu ofwot chemchu chitüikyabu zünlaxle laxkox.

²⁰Saxziak tö hanpak ang ankhix olip münga füi awon ibibile laxkox: maihupong tuipong füi tomle tuak azom pong, tuak anyi pong a chunla füi tomle,

²¹ilaxle tuak tuipong a chun tuipong füi tomle laxkox.

²²Ilaxle zwonpong tuita chuwüi ochax tö hanpak ang laxkox. Ile khünaknu hanpakma hwom khongai angkya zom zingle laxkox.

²³Ibu a nopfokya to koxkya zokle ashunkya tö obo ang laxkox.

²⁴Ija olom tuitata wüi tole, nyix anüt lükya to JOWANPA ang süt tö laxkox. Ija a JOWANPA zongto ongan tüle müikya changle. Ija a nyixfokya to koxkya zokle ashunkya tö hia grepti-ju to obo ang laxkox.

²⁵Nyix anüt lükya to zangshwom ang asoxlax ilaxle ija nyix mwot chemchu taxmok.

²⁶saxcha-wün asuikya nyix, chemtue hünzome saxzün tö JOWANPA hato apüile koxüihex, hünzom a zangshwom ang asox angkya changle, idaile ija nyix mwot chemchu chimoküi.

²⁷Ongan müile ngankya tö tuita ang JOWANPA ang zokle ashunkya tö laxkox: maihupongsa anyi, chun ola tuita, ilaxle zanglao nguidaokya chun olasasa anüt, ojao ofwot chitüikyabu laxkox.

²⁸Saxziak tö ang an ma olip münga awon ibibile laxkox: maihupong tuipong füi tomle tuak azom pong, chun ola füi tomle tuak anyi

²⁹ilaxle chun tuipong füi tomle tuak apongle laxkox.

³⁰Anaole zwonpong tuita chuwüi ochax tö hanpak ang laxkox, ija ningle hünzome khünaknu khongai ang zomzingle tsuakkox.

³¹Ija tö tamchu grepti-ju tö a nyixfokya to koxkya zokle ashunkya tö tamchu saxziak tö obo ang laxkox.