Read Wancho Naga Huake Laipex 32 Bible Online

Huake Laipex 32 - Wancho Naga bible

Huake Laipex 32

¹Reuben hia Gad homjen ang tsom-pombu tüle tüikya. Chemtue hwome Jazar hia Gilid haxtok müitsom ang müikya haxtok changle le ngünle lax,

²hwome Mosa, Eliazar hia mama onok lompabu hato nguilaxle thüi:

³“JOWANPAe Israel khünaknu to tingkop-haxzingle hüi ang asunle hüikya ibu—Ataroth tinglong, Dibon, Jazar, Nimrah, Heshbon, Elialeh, Sibmah, Nebo, ilaxle Beon—ibu a müitsom ang müikya haxtok changle, ilaxle kwom ang tsom-pom huanuma tüile.

⁵Chingchalaxle kwom tingtok ang lax ang ija haxtok kwom ang koxhüi; Jordan shuanu talaxle tachi to hom-hax zinglaxle ngohüi le kwom sütax-atsangünfa.”

⁶Mosa-e lan: “Hünzom, ma füikya Israel khünakbu zan to kapongma, hünzom a ikhato nuise texpia?

⁷JOWANPAe hwom ang koxle thomkya Kanan Haxtok to ngui ang Jordan shuanu tale le angkya bama hünzome Israel khünaknu mong ahiksele büthüikya to tsulaxpu?

⁸Kue Kadesh Barnia tokhange ija haxtok to hu ang akat pongma hünpa hwomechu ilüwüi hwonpu.

⁹Hwome Eskol Haxnucha kople hüilaxle chaxwan to hule lax, ikoxle chatüntoxle a, JOWANPAe hwom ang koxle thomdaokya haxtok to ngui ang khünaknu mong ahik.

¹⁰Ija nyix JOWANPA ang mongtsik laxle tsaosax:

¹¹‘Kue tsaopu, hwome ku kax ma laxle chitüikya khoma, hwom Ijip nok tokya hüikyabu, zangtsa makhange thakchichi owaechu, kue Abraham, Isak hia Jakop hwom ang koxle thomkya ija haxtok to ngui ang müntom.’

¹²Ikhama Ken homkha angkya Zefunneh sasün Kaleb hia Nun sasün Jihusua nyi, opange JOWANPA kax ma laxle hüipuix, hokhi tata ikhama chiwom.

¹³JOWANPA ang khünaknu füi mongtsik ilaxle chix mong amakya tsünthom bakle zile mapao-mapaole zanglao punyi hwom a faokha to asamle thom.

¹⁴Ilaxle, athax hünzome hünpa hwom man ma, ochaxe awangkya tsünthom hozünbue JOWANPA ang tamchatle mongtsik adün ang azongpu.

¹⁵Athax hünzom Reuben hia Gah homjen anyie chix füito münazuipu jangthüi: chixe ibu khünaknu tamchatle faokha to asam ang dantoxüi; ile chang koxle hwom hanpak hünlit hünzom khangkho ma dütüi.”

¹⁶Hwome Mosa hato hüilaxle thüi: “Pongwang ma ikhato kwom chunbu hanpakma long makhange kunbu zing ilaxle kwom ngwotnui hanpak ang chaxwan ziakople zingle shong-kop hüiang.

¹⁷Ifüima kwom ma tüinao Israel khünaknu füi tomle, hwome kop angkya haxtok to nguilaxle, zan-nokbu to lütle jwonle apaolaxle hwom hanpakma tingkop-haxzingle dantox angkya kwom achwonle tüile. Ile changpongma kwom tuinabu a, ito tüikya khünakbu chak tokya, ija ziakople thomkya tingshobu ma azangle ngo ang thoüi.

¹⁸Mama Israel khünakbue hwom tingtok kople tingtan nokzingle oshing mamong tanto kwom ikhato chat angkya münchang.

¹⁹Kwome Jordan shuanu atale hwom füi tomle ikhato ma haxtok münkop, chemthüikoxle kwom tsyen ija Jordan shuanu zong ma handün chito kopdaoa.”

²⁰Mosa-e lan: “Hünzome otsingtsing ma akaxkya jangchang, athax ikhama JOWANPA womle tüipongma zan to ka ang achwonlax.

²¹Hünzom zankat naomüibu pangwüi Jordan shuanu tale le angkya ilaxle JOWANPA lomzun fang ma, kem zanpabu to bakle lütlaxle

²²chaxwan kople machang tanto, hwome kem zanpabu to sing angkya changle. Ifüima, hünzome JOWANPA to tamchu mamix Israel khünaknu hanpakma hünzome mokse mwot tsuakle jangchangdaoba hünzom a chat ang tsuak. Ifüima JOWANPAe ija Jordan shuanu zongma handünchi haxtok a hünzom kux hex-ole awan ang tomüi.

²³Ikoxle hünzome ija hünzom kaxtsao chithom thüiningle, kue hünzom ang kaxkhün fapu, hünzome JOWANPA zongto ochax lyenle changüi, hulax. Ija bama hünzom thaile taxkopünlax; hünzom ochax khoma hünzome sikngün apong angkya laiüia.

²⁴Idaile hünzome ma hanpak ang tamchu chunbu hanpak ang tingnu hia longhombu zingle shong-koplax, ikoxle hünzome kaxngaile changdaokya a mokwüi mokkox!”

²⁵Reuben hia Gad homjen angkya khünakbue thüi: “Alixachong, kwome nang kax ma laxle moküi.

²⁶Kwom kako hia naosombu tamchu maihu hia chunbu a ija Gilid tingnu ma wüi naxnui.

²⁷Ikoxle kwom bibi a JOWANPA kaxtom fang ma zan to ka ang achwonle tüile. Nange akax daokya ningle kwom Jordan shuanu tale leüi ilaxle azanle toxüi.”

²⁸Idaile Mosa-e Eliazar, Jihusua hia mama Israel nok lompabu ang ibu kaxtom kox:

²⁹“Gad hia Reuben khünakbue Jordan shuanu talaxle JOWANPA kaxtom ma zanbu füi azan ang achwonle jangchang, ilaxle hwome asunkya füi hünzome chaxwan kop ang tsuakle jangchang; ile jangchang thüiningle Gilid haxtok a hwom haxtok ang koxdao.

³⁰Ikoxle hwome Jordan shuanu chita tamchu hünzom füi tomle zan to kale chichang thüiningle, hwomechu hwom tsyentsyen haxtok, hünzom füi tomle Kanan haxtok ma wüi kopüi.”

³¹Gad hia Reuben khünakbue lan: “Alixachong, kwome JOWANPA kaxtom kax ma laxle moküi.

³²Chix kaxtom ma kwome Jordan shuanu tale Kanan haxtok to nguiüi ilaxle ikhato zan to kaüi, ikoxle tix ija Jordan shuanu zongma handünchi haxtok kwome kop ang tho angkya daile.”

³³Idaile Mosa-e Gad hia Reuben homjen boma Manasseh homjen angkya süifi khünak ang Amor nok wanghompa Sihon wangting ilaxle Bashan nok wanghompa Og wangting, ibu akhople tüikya tingnu hia chaxwan bakle kop angkya atsyenle kox.

³⁴Gad homjene pan zailaxle ziakople tüikya Dibon, Ataroth, Aroar,

³⁵Atroth Shofan, Jazar, Jogbehah,

³⁶Beth Nimrah, hia Beth Haran, ibibi tinglongbu azünle zinglaxle ngo.

³⁷Reuben homjen angkya khünakbue a Heshbon, Elialeh, Kiriathaim,

³⁸Nebo, Bal Meon (ija mün mama le kox), ilaxle Sibmah, ibibi tinglongbu azünle zinglaxle ngo. Hwome azünle zingkya tinglongbu ang hwome mün mamale kox.

³⁹Manasseh sasün Makir homjene tingtak laxle Gilid haxtok lax, ija hwome amle kop, ilaxle ikhato tüikya Amor nokbu jwonle apao.

⁴⁰Idaile Mosa-e Gilid haxtok a Makir homjen ang kox, ilaxle hwom ikhama ngo.

⁴¹Manasseh homjen angkya Jair saxthome tingkhua hidaole kop ilaxle ibu ang Jair le mün kox.

⁴²Nobah-e tingtak laxle Kenath hia ija tingshobu kop, ilaxle chixe ija a chix mün ma Nobah le mün kox.