Read Wancho Naga Huake Laipex 33 Bible Online

Huake Laipex 33 - Wancho Naga bible

Huake Laipex 33

¹Mosa hia Arun nyie zunlaxle Israel khünaknu Ijip nok tokya laile pao pongma hwome homjen-homjen ma athom laxle ma pompom zaile athongle hüikyabu onui münbu a ikha ma tüile.

²JOWANPA kaxtom ma Mosa-e hwom pom zaile athongle hüikya onui mün pangwüi zale kop.

³Ilaxle pongwang angkya lyetkua nyixbün aga lükya to Israel nok Ijip haxtok angkya laile pao; pongwang lükya Kaitox Pangpwon füinyix, JOWANPA khosün fang ma hwome Rameses tingnu danle tox.

⁴JOWANPAe langkya tüichongpabu mangzu ang nuikya Ijip nok pangnusae wüi ija ngün. Ile changkya makhange Ijip nok baozangbu füi JOWANPAe chix wüi tsak-zongkya changpule aho.

⁵Israel khünaknue Rameses dantoxlaxle achexle paokya hwom Sukkoth ma athong.

⁶Ikhato thom anyi-lükya hwom pom zaikya a sak-hax tua angkya Etham ma zaile athong.

⁷Ija makhange hwom Pi Hahiroth chito chatle chat ilaxle Migdol zui ma pom zaile athong.

⁸Pi Hahiroth dantoxlaxle hwom Tütsak Tinu akaile Shur sak-hax to le; nyix azom ahamkya füima hwome Marah ma pom zaile athong.

⁹Imakhange hwom Elim to pao, ikhato pom zaile athong, chemthüikoxle ikhato shuasa bün anyi pam pün puzom bün bang.

¹⁰Hwom Elim dantoxlaxle paokya Suiz angkya tinu shinthuk zui ma pom zaile athong.

¹¹Ifüi angkya hwom pom a Sin sak-hax ma zai.

¹²Ifüima hwome Dofkah ma pom zai le athong.

¹³Ifüima Alush ma zaile athong.

¹⁴Ifüi angkya pom a Rifidim ma zai, ikhato hwom thoma lingti ang lax ang ngaxchu ti ojao chibang.

¹⁵Refidim makhange Hor Haxnu alop ang hwome pom ibibi ma zaile athong: Sinai Sak-hax ma, Kibroth Hattawah (chichangba “Zongbakle mongtsukya zuktingbu”), Hazeroth, Rithmah, Rimon Perez, Libnah, Rissah, Kehelathah, Shefar Haxnu, Haradah, Makheloth, Tahath, Terah, Mithkah, Hashmonah, Moseroth, Bene Jakan, Hor Haggidgad, Jotbathah, Abronah, Ezionzebar, Zin faonu (ija a Kadesh changle), ilaxle Hor Haxnu, ija a Edom haxsüt chamtua ma.

³⁸JOWANPA kaxtom ma nguapa Arun a Hor Haxnukho to dong. Zanglao 123 ma chix ikhato, Israel noke Ijip haxtok dantox füima zangbün ali lükya lyetkua aga angkya owang nyixkha zile pao.

⁴⁰Shuathong Kanan angkya Arad nok wanghompa-e Israel nok nguile ngokya zing atatle lax.

⁴¹Hor Haxnu makhange Moab Haxsha alopkya mong ma Israel noke ibibi haxmik ma pom zaile athong: Zalmonah, Punon, Oboth, Moab haxsüt ma Abarim maxkya tamting, Dibon Gad, Almon Diblathaim, Nebo Haxnu zui angkya Abarim Haxnubu ma, Jeriko makhange Jordan shuanu tale lelaxle Moab haxsha ma, Beth Jeshimoth hia Akasia Haxsha obama.

⁵⁰Jeriko makhange Jordan shuanu talaxle ikhato JOWANPAe Mosa ang

⁵¹Israel khünaknu hanpakma ibibile adangle fa: “Chemtue hünzome Jordan shuanu tale Kanan haxtok to nguiüihex,

⁵²ija haxtok ma tingtan-nokzing laxle tüikya khünak pangwüi jwonle apao angkya changle. Hwom kux, long hia jan füi zingle tüikya chapabu hia hwom baozang to shwomkya onuibu pangwüi amale awüt angkya changpu.

⁵³Ija haxtok koplax ilaxle ima tingtan nokzingle ngolax, chemthüikoxle kue ija hünzom ang koxdaoa.

⁵⁴Chizing tswonlaxle haxtok a homjen pangwüi ang, saxthom-saxthom ma daole ahanle laxlax. Khünak huak süluile tüikya saxthom ang haxtok sükhao le laxkox, khünak huak sühi le tüikya saxthom ang haxtok sühi le laxkox.

⁵⁵Ikoxle hünzome ikhato ngole nuikya khünakbu jwonle chiapao thüiningle, atale dantoxkyabu a hünzom zongto tuita mik-ma ningle tamchu sam ma süt tüikya ningle tuita poxpa ang ngole nui angkya changle, ilaxle hwome hünzom füi azanle changüi.

⁵⁶Hünzome hwom jwonle chiapao thüiningle, kue hwom amüt ang thütpupu le hünzom mix amütüi.”