Read Wancho Naga Huake Laipex 35 Bible Online

Huake Laipex 35 - Wancho Naga bible

Huake Laipex 35

¹Jeriko makhange Jordan shuanu tale lelaxle Moab haxsha ma JOWANPAe Mosa ang thüi:

²“Israel khünaknu füi akaxkox, hwome kopkya tingtok kha angkya tuita-anyi Liwi hwom tingtok ang laxkox ilaxle ibu tingnu akhople müitsomnui faochu laxkox.

³Tingnu ibu a Liwi hwom kux ang changüi, ilaxle hwom ibu ma ngoüi. Akhople tüikya wun a hwom maihu hia mama tsom-pom fumtsütnui ang ngoüi.

⁴Ija müitsomnui wun a tingnu panja makhange fak 450 pong khaole tingtui akhople tüiüi.

⁵Tingnu a tanti ma toxlaxle pangnuchi ma wüi fak 900 pong-pong bangüi.

⁶Hünzome Liwi hwom ang tingnu azok kox angkya changle; owawae chakchax-jansax ma mix mik amütle chang koxle, ija khünak paole azangüi. Ibomachu hwom ang tingnu punyi laxkox.

⁷Ikhama müitsomnui wun chuwüi tüi angkya oli; pangnu athütlaxle tingnu punyi achyet ang changüi.

⁸Homjen foto Liwi hwom tingnu opongle zing ang koxüihex, ija a haxka khaokya to hulaxle changüi.”

⁹JOWANPAe Mosa ang

¹⁰Israel khünaknu füi ile akax ang tom: “Chemtue hünzome Jordan shuanu talaxle Kanan haxtok to nguiüihex,

¹¹hünzome pünpao zaknui tingnubu zünle kop angkya changle; khünak tuitae chakchax-jansax ma owawa mik amütle jangchang, ija khünak ikhato paole azangüi.

¹²Ekhato chix, chixe mik amütdaokya haxnu-homsabu, opange jannong-alüi ang hule ngotüipuix, ibu chak tokya azangle ngo ang tsuaküi. Mix mik amütkya bama kaxhux-fekya khünak a noknu khua ma zangwün otua chikom homtoxle mik max ang müntomüi.

¹³Tingnu azok zünlax.

¹⁴Tingnu azom a Jordan zongma handünchi ma ilaxle azom a Kanan haxtok ma.

¹⁵Tingnu ibu a, Israel nok wüi changlax chichangba mixnok wüi changlax, chichangba nokpu wüi changlax, onox ma ngole toxkya mix wüi changlax, pünpaobu nguile azang angkya onui ang achangüi. Owawa chakchax-jansax ma mix mik amütle changkya khünak ibu tingnu tütapu ma wüi changlax, paole azang ang tsuaküi.

¹⁶“Ikoxle owawae mix mik amüt ang jan, long hia pün, iningkyabu jangtwon, chix a ija mikmüt bama thaipu, ilaxle chix mik chuwüi max ang tomüi.

¹⁹Ija mix mik amütkya mix lang angkya bama, ziünkya mix zongto pasa-tüinao owawae chakmokle lang angkya oli changpu. Chixe ija khünak ojongma atakpuix ikhama langle tox angkya wüi.

²⁰“Khünak tuitae owawa to miktsak laxle ija khünak chixe thwomle adüt chichangba tütali füi thuple lang,

²¹chichangba chix chaktom füi thule lang, ija khünak a mix mik amütkya bama thaipu; idaile chix a mik max ang tom angkya wüi changpu. Ziünkya mix pasa-tüinao owawae ija mix lang mix mik amüt angkya wüi changpu. Chemtue chix thoma bangpuix, chixe ija khünak lang angkya wüi.

²²“Ikoxlechu chaktung ma chichang homtoxle, chixe miktsakle chingokya khünak tuita, thwomle adütle wüi changlax chichangba tütali füi thuple wüi changlax, mik max ang kox.

²³Thütba, khünak tuitae long tswonle awüt, ijae chixe langüile texle chingokya mix chichangba chix zongto zanpa chichangkya khünak owawa mik amüt.

²⁴Iningkya zangwün to noknue, ziünkya mix pasa-tüinao hwom opang olüix khom ang lomle ngopuix, hwomchi ma chise homtoxle owae mix mik amütdaopuix, chix chima sele kaxfün fa angkya oli changle.

²⁵Noknue, mix mik amüt laxle pünpao tingnu to paole azangünkya khünak khose laxle chix a pünpao tingnu towüi tamchatle paole ozün ma ngo ang tom angkya oli. Ekhato chix epongma tüile asukya Nguakho zikya kople ngoüi.

²⁶Mix mik amütkya ma thaikya khünak, chix paole azangkya pünpao tingnu angkya paole jangchang,

²⁷ilaxle chixe langle toxkya khünak pasa-tüinao hwome chix atak laxle langle jangchang, ija jannong alüikya a mix mik amütkya ang münchang.

²⁸Mix mik amütkya ma thaidaokya khünak tuita a epongma tüile asukya Nguakho zikya kople, chix paole azangkya pünpao tingnu ma ngo angkya changle. Ikoxle nguakho zile changkya füima chix a ma tingsho to chatle chat ang tsuak.

²⁹Wanlom ibu hünzom tamchu hünzom su-sabu pangnusae hünzom angongo khato tole ngo angkya changpu.

³⁰“Mix mik amütkya bama kaxhux-fekya khünak a thaile chu bangtüilax ikoxlechu ngünmix mixsün anyi angkya mikngün kaxngai lax ilaxle tix lang ang tsuak; chemthüikoxle khünak mik maxkya bama kaxhux-fekya to fong ang mikngün kaxngai lanlan a münngui

³¹Mix mik amütdaokya khünak a mik max ang tom angkya wüi. Chix a ngun koxle tsangthom laxle azangle pao ang müntsuak.

³²Ikoxle ija mixsün a pünpao tingnu to paole jangazang, epongma tüile asukya Nguakho mazi tanto tamchatle ma tingsho to achat ang chix ma otha taxju.

³³Hünzome ile jangmok thüiningle, hünzom ngole hüikya haxtok a chitsaokya ang achangpu. Khünak mik amütkya haxtok a okhu-omu ang achangdaoa, idaile mix mik amütkya khünak zikya ma wüi chichang, khünak tuita langdaokya haxtok atsaole zomzing angkya olom chemchu müntüi.

³⁴Hünzom ngole nuikya haxtok chitsaokya ang taxachang, chemthüikoxle JOWANPA, ku a Israel khünakbu füi tomle ngole.”