Read Wancho Naga Huake Laipex 36 Bible Online

Huake Laipex 36 - Wancho Naga bible

Huake Laipex 36

¹Jusep sasün Manasseh zongto hosu Makir sasün, Gilid saxthom okax-okhobu Mosa hia mama lompabu hato ngui.

²Hwome thüi: “JOWANPAe nang ang chizing tswonlaxle Israel khünaknu ang haxtok ahanle kox angkya akaxpu. Kwom haxnu-homsa Zelofehad tuina chix sacha hwom ang ahanle kox angkya chuwüi chixe nang ang kaxtom koxpu.

³Ikoxlechu mong ma koplax, hwome mama homjen to tuiju-nasomle jangchang thüiningle, ibu tuina a hwom homjen kux ang achangüi, ilaxle kwom ang koxkya othom kha angkya kwom tuina ahikle awütüi.

⁴Achatle koxkya zanglao nguikya zuma, chemtue hang daokya tuina komkaile hopu hato chatüihex, Zelofehad sacha hwom tuina a tamchichatle hwom tuiju-nasomle paokya homjen khato athütle changdaoüi, ikoxle kwom homjen tuina a amütkya ang changüi.”

⁵Idaile Mosa-e Israel khünaknu ang JOWANPA kaxtom ibibile kox. Chixe thüi: “Manasseh homjene akaxkya kax otsing tomtata changle,

⁶idaile JOWANPAe kax a: Zelofehad sacha hwom a hwom mong tsupupu ma tuiju-nasomle changüi, ikoxlechu hwom homjenjen ma wüi changüi.

⁷Israel nok tuina a ma homjen chakchak towüi ngo angkya oli.

⁸Idaile sheko opange ma homjen tuina koplaxle tüipuix, she a ma homjen kha angkya khünak ma wüi ating-anokle chang angkya changpu. Ile Israel khünak pangnusa mapu-mapapa tuina mantswon ang kopüi,

⁹ilaxle ija tuina a homjen tuita angkya ata homjen to tailaile münpaoüi. Homjen pangwüi ma tuinana mantswonle ngoüi.”

¹⁰Idaile Mahlah, Tirzah, Hoglah, Milkah, üntoxle Noa, Zelofehad sacha hwom, hwom pangnusae wüi JOWANPAe Mosa ang koxkya kaxtom ma mok, ilaxle hwome mali-manaonao füi tuiju-nasomle hüi.

¹²Hwome Jusep sasün Manasseh homjen angkya ma linao hwom-hwom mawüi tuiju-nasomle chang ilaxle hwomtüi-hwomnao komle hopa hwom homjen ma wüi ngo ang tom.

¹³Ibibi a JOWANPAe Mosa makhange Israel khünakbu, Jeriko makhange Jordan shuanu talaxle Moab haxsha to fakya wanlombu changle.