Read Wancho Naga Huake Laipex 4 Bible Online

Huake Laipex 4 - Wancho Naga bible

Huake Laipex 4

¹JOWANPAe Mosa

²Liwi homjen angkya Kohath saxthom, kako-kako ma süile,

³lüka sühuak zanglao 30-50 zanglao bama chemtukux tüipuix, mün zale akiak angkya akax. Ibu a JOWANPA ngwotnui Nyihom ma mwotmok ang asukyabu chang angkya oli.

⁴Ataxkya otsao mwot a hwome tix mok angkya changle.

⁵JOWANPAe Mosa ang ibibi mwot adangle fa. Chemtue pom pünle changtu nguile hüipuix, Arun hia chix sasün hwom Nyihom to nopüi. Tsaotsüt Suak ha angkya tuknyi ajoüi ilaxle ija füi Suak to chwopüi.

⁶Ija otok ma hwome müikhwon chwopnyi müikya füi chwopüi, ija otok ma nyihing füi chwopüi ilaxle ija ma azya angkya dang zwotle koxüi.

⁷JOWANPA ang süt tö koxkya tsap-khua otok ma nyihing nomüi ilaxle ima sütling, ongan müikya so atsopkya khua, tö koxkya khua, tö koxkya khua, grepti-ju tö koxpongma twonkya pe, ibu pangwüi danüi. Tsap-khua ding ma an a jento tüingo angkya oli.

⁸Ibu pangnu to chwople hwome nyikhik füi fuüi, ija to müikya müikhwon chwopnyi füi chwopüi, ilaxle ija azya angkya dang zwotle koxüi.

⁹Hwome nyihing laxlaxle wüntik lotsap to chwopüi, wüntik, khap, khua, olip münga pe, ibu pangwüi ima tüiüi.

¹⁰Hwome ija, ikhama laxli tuinabu pangnu füi tomle ashyepüi, ija to müikhwon nyi müikya füi chwopüi ilaxle azya ang tsap ma danüi.

¹¹Ifüima hwome hun tö-tsap to nyihing füi chwopüi, ija to müikya müikhwon chwopnyi füi chwopüi, ilaxle ija azya ang dang zwotle koxüi.

¹²Ataxkya Otsao Nui ma twonkya tik-lak komle hwome alaiüi, ibu nyihing ma ashyepüi, müikya müikhwon chwopnyi füi ibu to chwopüi, ilaxle azya ang tsap ding ma ibu danüi.

¹³Tötsap chitong angkya labu hwome züile afoxlaxle ija to baxnat nyinu füi chwopüi.

¹⁴Hwome tö-tsap ma laxkya tuina ibibi ima danüi: wün-khua, jankuix, hok-khua, hia tik-khe ibibi. Ifüima hwome ija to müikya müikhwon chwopnyi füi chwopüi ilaxle azya ang dang khale koxüi.

¹⁵Chemtue thongnui püntu nguipuix, Arun hia chix sasün hwome ibu otsao mwot-kat to chwop-zingle tsuak füimatix Kohath saxthom ibu pao ang nguiüi, ikoxle hwome wüi ija otsao tuina to münlyetüi, janglyet thüiningle hwom a ziüi. Nyihom achexle changfofo Kohath saxthome mok angkya mwot a ibibile changle.

¹⁶Arun sasün nguapa Eliazar a, Nyihom pangwüi ilaxle wüntik angkya münga, ongam müikya so, saxziak tö, kamle atsao ang likya münga, üntoxle JOWANPA ang atsaole koxdaokya Nyihom ma atüitüi, ibu pangwüi bama hünlit laxmix changpu.

¹⁷JOWANPAe Mosa hia Arun nyi füi akax,

¹⁸“Ibu ataxkya otsao tuina hato namle hüikyae,

¹⁹Kohath homjen zi ang taxtom. Ile hwom kho awa angkya hanpakma Arun hia chix sasün hwom hommong to donglaxle owae chemningkya azya angkya hex apuale laxkox.

²⁰Ikoxle Kohath homkha angkya owawa Nyihom to noplaxle nguapabu paoüima otsao tuinabu hünzingle ngokya ngünle jangchang, hwom a ziüi.”

²¹JOWANPAe Mosa ang,

²²Liwi homjen angkya Gershon saxthom kako-kako ma süile khünak huak akiaklax,

²³ilaxle JOWANPA ngwotnui Nyihom ma mwot mokle tsuaktangkya zanglao 30-50 ba angkya khünakbu mün zale koplax.

²⁴Hwome ibibi tuina hün angkya hünlit laxüi:

²⁵Nyihomnu, omong ma tukkya tuknyi, kotok ma tukkya tuknyi, homtok ma chwopkya müikya müikhwon chwopnyi, fülom angkya tuknyi,

²⁶Nyihom hia tö-tsap akhople tüikya khwa hanpakma tüikya tuknyi hia zubu, khwa fülom angkya tuknyi ilaxle ibibi mwot-kat athut-apongle zing angkya hanpakma laxkya oli pangwüi. Ibu hanpakma chem moksehex, ibu pangwüi hwome moküi.

²⁷Arun sasün hwome mok ang tsankya komkaile mokcha le Mosa hia Arun nyie Hershon to homjen to huüi.

²⁸Ibibi a Nyihom ma Gershon hwome mok angkya mwot changle; hwome ibu a nguapa Arun sasün Ithamar-e azuikya ningle mok angkya changle.

²⁹JOWANPAe Mosa ang Liwi homjen angkya Merari saxthom kako-kako ma khünak akiak angkya kaxkox;

³⁰ilaxle JOWANPA ngwotnui Nyihom ma mwotmok ang tho tang tüikya 30-50 zanglao mong angkya lüka sühuak mün zale akiak ang tom.

³¹Nyihom homtsa, oto-zualo, thong-ta ilaxlechu Nyihom thong to komkyabu,

³²ilaxle thong-ta, thong to komkyabu, lakbu, ilaxle Nyihom akhople tüikya kha angkya zubu, ibu pangwüi athut-apongle zing angkya mwot-kat pangwüi. Khünak mixhuak pangwüi ang mamwot-mamwot tüiüi.

³³Ibu a Nyihom ma hwom mwot ang Merari saxthome mok angkya mwot changle; hwome ibibi mwot a nguapa Arun sasün Ithamar lomzun ma mokle leüi.

³⁴JOWANPA kaxtom kopkya füima, Mosa, Arun hia Israel nok lompabue Liwi homjen: Kohath, Gershon, hia Merari saxthom angkya khünak huak akiak. Hwome ija kako-kako ma tamchu homkha-homkha ma süile mün zale akiak. Khünak 30-50 zangpua mong ma JOWANPA ngwotnui Nyihom ma mwotmok ang tho tangkyakya akiak, ija ile: [Saxthom] — [Huake] Kohath — 2, 750 Gershon — 2, 630 Merari — 3, 200 Athüt koxle: — 8, 580

⁴⁹Mixhuak pangwüi JOWANPA Mosa ang kaxtom fakya ningle mün zale kop; tamchu JOWANPA Mosa ang fakya kaxtom tole mixhuak pangwüi ang ma mwot-mwotle hünlit ahanle kox.