Read Wancho Naga Huake Laipex 6 Bible Online

Huake Laipex 6 - Wancho Naga bible

Huake Laipex 6

¹JOWANPAe Mosa ang

²Israel khünaknu ang adangle fa angkya ibibi kaxtom kox. Lüka wüi changlax sheko wüi changlax, owawae ma tsün komkaile JOWANPA hanpakma atsaole dansele tsaosaxkya mix jangtüi,

³ju-khan lili füi atsaile ngo angkya oli changpu. Chixe grepti-ju, grep oziak chichangba grep ozan chemchu chisax-chilingüi.

⁴Chix a Nazarait thomkya ang ngokya kople grep zu makhange hüikya tütalichu chisax-chilingüi, grep-otsang chichangba okhwon ngaxchu chisax-chiling angkya oli.

⁵Chix Nazarait ang thomkya tsaotsüt fang ma ngokya kople chixe puxpong tokya kho ojao chisexle thomüi. Athaxpi chix a JOWANPA hanpak ang tsaotsüt daokya wanlome othuithuima ziakople thomüi ilaxle chixe kho hia kaxmai mun panle thomüi.

⁶Chixe kho a, ma tsün komkaile JOWANPA ang koxle thomkya münwan panüi, idaile müimang, manu-mapa kux wüi changlax chichangba mana-manao kux wüi changlax, ibu hato hüilaxle ma chitsaokya ang achang ang chitomüi.

⁸Chix Nazarait ang thomkya ang ngokya kople, chix a komkaile JOWANPA ang koxle thomkya khünak tuita changpu.

⁹Owawa osün to zikya zikmüt-mangkho zui ma asulaxle atsaole panle thomkya kho akhu ang koxle jangchang thüiningle, chixe nyix anüt tan le nuilaxle ija kho hia kaxmai mun ongle awütüi; ilaxle zanglom ma chix a atsaole ngoüi.

¹⁰Nyix achyet lükya to chixe JOWANPA ngwotnui Nyihom to osu anyi chichangba jua-o anyi koplaxle nguapa hato nguiüi.

¹¹Ija mixsün mang hato soxle changdaokya khoma, ija atsao ang, tuita a ochax tö ang ilaxle ata a zokle ashunkya tö angle koxüi; ile chix a zanglom ma otsao ang achang angkya zom zingle koxüi. Ija nyix makhange ija mixsüne chix kho atsaole panle thomüi.

¹²Ilaxle chix hanpak tuita Nazarait ang thomkya ningle tamchatle JOWANPA ang atsaole koxüi. Chixe atsaole thomkya kho chitsaokya ang achangkya khoma thochi angkya hanpak-zanghan chieüi. Otha thomkya tö ang chixe zanglao nguidaokya chun tuita apüiüi.

¹³Chemtue Nazarait ang thomkya tuitae chix tsaotsüt tsuakle hüipuix, chixe zanglom ma zomzingle changüi. Chix a Nyihom fülom to nguiüi.

¹⁴Ojao ofwot chitüikya müi azom JOWANPA ang koxüi; zanglao nguidaokya chun hosa tuita zokle ashunkya tö ang koxüi, ilaxle chun ocha tuita a ochax tö hanpak ang koxüi. Chun ola chongkya tuita a notom-tusüi tö hanpak ang koxüi.

¹⁵Chixe twonkhax chilax homtoxle zingkya an khong tuita ma awangle tö koxüi; an a olip-münga füi awon zingkya, olip-münga füi atswomle zingkya, tamchu ibibi laxüile tüikya to bole saxziak hia grepti-ju tö kox angkya changle.

¹⁶Nguapae ibu pangwüi JOWANPA ang ochax tö hia zokle ashunkya tö ang koxüi.

¹⁷Notom-tusüi tö hanpak ang chun ola tuita chixe an tsong tuita füi koxüi; chixe saxziak hia grepti-ju tö chuwüi koxüi.

¹⁸Nazarait ang thomkya tuitae Nyihom fülom ma chix kho ongüi ilaxle ija kho a notom-tusüi tö hanpakma takkya wünkha to zoküi.

¹⁹Ifüima, chemtue chunla osuak müi lumle changüihex, nguapae ija saxüi ilaxle ankhao tütle zingkya hia tsong-kha angkya ankhao Nazarait ang thomkya chak to koxüi.

²⁰Ifüima, nguapae ibu a ataxkya tö tuita ang JOWANPA ang koxüi; ibu a wanlom ma nguapa tsyen hex-ole tüikya, chun ola otsom hia ochak to obo ang, nguapa zongto ibu a otsao tö changle. Ifüima Nazarait ang thomkya-e grepti-ju ling ang tsuak.

²¹Ibu a Nazarait ang thomkya hanpakma wanlombu; ikoxlechu Nazarait ang thomkya tuitae chix tsaotsüt to kaile tö kox angkya jangtüi, chixe tsaodaokya abakle moktsuak angkya oli changle.

²²JOWANPAe Mosa ang,

²³Arun hia chix sasün hwom füi, Israel khünaknu to mohiman pongma ibibi zangwün twon angkya kaxtom kox:

²⁴JOWANPAe hünzom to mohimankya naxtüi tamchu humele naxchang.

²⁵JOWANPA a hünzom zongto chingcha hia jajale naxchang.

²⁶JOWANPAe hünzom to khosele naxhu tamchu mongsom naxfa.

²⁷Ilaxle JOWANPAe thüi: “Israel khünaknu to mohiman ang ku mün lünle jangchang kue hwom to mohimanüi.”