Read Wancho Naga Mika 4 Bible Online

Mika 4 - Wancho Naga bible

Mika 4

¹Athax füichi ma Zangshwom-Hom ajongle tüikya haxnu a pangnu füi sütsuakya ang changüi, haxhuabu pangnu to kaikya homthün a. Jat-libu tüle-tüle ija hato abünle nguiüi,

²ilaxle hwom khünakbue thüiüi, “Oman, kempi JOWANPA haxkho to donghax, Israel nok Zang Zangshwom-Hom to. Keme chem naxmokse thütpuix ija chixe kem hama anwot-anole faüi; chixe zünle kopdaokya lomtang ma kem ahamüi. Chemthüikoxle JOWANPA hwon-nwot a Jerusalem tokhange hüile; Zaion makhange chixe chix khünaknu füi zangwünle.”

³Chixe jat-libu ba angkya ala-shakya zangwün fünle faüi, chongkya janzüi füikya tsailo tokya hia soxle tüikyabu bama. Hwome ma changlobu haxkhut kho ang thuple zingüi ilaxle hwom paxbu fumham chang ang jaoüi. Jat-libu tamchatle zan to münkaüi, achax-azan ang tamchatle tha-nyemle chichangüi.

⁴Pangnusa wüi tumüi-lomkhaole ngoüi ma grep haxtok hia fupsa pünham khato a, ilaxle owaechu hwom aza-anale chichangüi. Ija kax JOWANPA Khüthak Zang-e tsaodaoa.

⁵Pangnok jating towüi ma baozang-zang to shwomle ilaxle kam ma laxle, ikoxlechu kwome JOWANPA kwom Zang to othuithuima shwomüi.

⁶JOWANPAe thüile: “Kue sikangünle mixnok chaxwan zanda ang ngokya ku khünaknu kue chatle asox angkya hanpak nguile ngole.

⁷Hwom a cha-chak faile tamchu hom füi atsaile ngole, ikoxlechu atale toxkyabu füi kue jali ozün ang achangle zingüi, ilaxle hwom a chongkya jat-li tuita ang achangüi. Hetuk makhange Zaion Haxnu ma kue hwom to apün-adale changüi.”

⁸Üntoxle nang, Jerusalem, ojongkha ma Zang-e, sailya kho tokhange chun-nyetmix tuita ningle, chix khünaknu to hule nyeüi, ilaxle hünzom kux ang ngokya a pongwün tingnu ang tamchatle achangüi.

⁹Hünzom büthüikoxle akhongle sop? Sheko mixnu nao ngün wok-kak pupu le hünzom ang chem sikngünle ngo? Ija a tuita wanghom chitüikya khoma changpia, hia hünzom mong achenle ngokyabu a zile paokya khoma changpu?

¹⁰Kwom-kwomlanle wotle, Jerusalem angkya khünakbu, mixnu tuitae nao ngünüi ninglea, chemthüikoxle athax hünzom tingnu dantoxlaxle kothofa to ngo angkya changle. Hünzom a Babilon to pao angkya changle, ikoxlechu JOWANPAe ikhato zanpabu chak tokya hünzom khosünle kopüi.

¹¹Jat-libu tüle-tüle hünzom to sing ang asoxüna. Hwome thüile: “Jerusalem a ama angkya wüi changpu! Kwome ija tingnu komkaile male paokya to huüi!”

¹²Ikoxlechu jat-li ibue JOWANPA mongto chemle thütünpuix chitik. Tsax nak angkya hanpakma sax zütle afoxkya ningle sikngün apong ang tom angkya hanpakma hwome sele asoxkya hwome chitik.

¹³JOWANPAe thüi: “Jerusalem angkya khünaknu, paokox üntoxle hünzom zanpabu to sikangünkox! Kue hünzom a jan ozong hia khop chisok füikya maihupong tuita ningle tsak-zongle chang ang tomüi. Hünzome jat-libu huanuma olithule changüi, ilaxle hwome changnong-pünthomle kopkya tuinabu hünzome ku Chaxwannu Jowanpa ang kox angkya changpu.”