Read Wancho Naga Mika 6 Bible Online

Mika 6 - Wancho Naga bible

Mika 6

¹Israel nok zongto tüikya JOWANPA tsetwon to apalax. Ajonglax, o JOWANPA, ilaxle nang tsetwon-zangwün laxkox; haxnu hia haxhuabue nang zangwün nax-apakox.

²Hünzom haxnubu, oshuk chitüikya chaxwannu chifünbu, JOWANPAe tsetwon-zangwün to apalax! JOWANPA ang ma khünaknu füi tsetwon-zangwün tüile. Israel khünaknu ma tsaihux-kaxhux fe angkya tüile.

³JOWANPAe thüi: “Ku khünaknu, kue hünzom to chem oma mokdaopu? Ku kax to lanhüi.

⁴Kue hünzom Ijip nok tokya alaile apüipu; kue hünzom da ang ngokya azünpu; hünzom lomzun ang kue Mosa, Arun hia Mariam hwom akatpu.

⁵Ku khünaknu, Moab wanghompa Balak-e hünzom zan to ka ang chemle wünkya dai tamchu Beor sasün Balam-e ija to chemle lankya dai, ibu texle ataklax. Akasia tokhange Gilgal lom to lekya lom to chempangle changkya dai, ibu texle ataklax. Hünzome ibu texle ataklax ijama hünzom khosün angkya hanpakma kue chempangle mokpuix ibu awanle lax ang kopüi.”

⁶Chix tongshwom ang nguipongma kue zangkangting JOWANPA hato chem apüiüi? Chix hato kue tö tuita ningle zokle ashun angkya hanpakma maihusa tuita apüiüi hia?

⁷Kue chix hato chun hajat-hajat chichangba shuasa ningle olip münga laxlaxle nguiüi hia? Ku ochax tsangthom ang kue chix a kusa somwang nao koxüi hia?

⁸Ile münchang, JOWANPAe chem müipuix ija kem hama apuadaoa. Chixe kem angkya laxse tsukya a ija changle: chem supuix ija mok angkya, chithwon mongkün angkya, ilaxle kem Zang füi puinaikya notom-tusüi ma ngo angkya.

⁹JOWANPA chathua za angkya a hwontüi-jelangkya changpu. Chixe tingnu nyakle akax: “Apalax, hünzom tingnu ma asoxle tüikya khünaknu!

¹⁰Ochax khünakbu homkha ma, hwome kop angkya olom ma chichang homle kopkya tuinabu tüihule. Hwome thüt-zingkya ma müimamale syep-dyeple changle, ilaxle ija thua ku huanuma anule.

¹¹Ile othüt-ozing ma syep-dyeple tüikyabu thaikya kue chemle alaktsuaküi?

¹²hünzom hakpabue zasabu müimamale aduk-athang ang tomle, ilaxle hünzom pangwüi tseloplop wüi changle.

¹³Idaile hünzom pün angkya hia amüt angkya kue owang wangdaoa.

¹⁴Hünzome saxüi, ikoxlechu hünzom ang wok münafwot: itülüi athaxchu hünzom a woknuak ma wüi ngoüi. Hünzome tuina tsuile kople, ikoxlechu hünzome ibu kho-awale thom ang müntho; hünzome tütali sünle thomkyachu kue zanpabu chak to ama ang danüi.

¹⁵Hünzome saxziak saiüi, ikoxlechu saxzüt ang münkop. Hünzome olip angkya münga fyetüi, ikoxlechu ija hünzome chemtuechu lax ang münkop. Hünzome grepti-ju fyetüi ikoxlechu ija hünzome chemtuechu ling ang münkop.

¹⁶Hünzome wanghompa Omri hia sasün, wanghompa Ahap nyie mokkya ochax olom hünzome tokya khoma ija ile chang angkya changpu. Hünzome chizakle hwom mongtex olom tole hüikya khoma kue hünzom hato thama apüiüi, ilaxle pangnusae wüi hünzom a ajao-ahaile changüi. Pangnu khato wüi khünaknue.” Hünzom to ongam füi hwonüi.