Read Wancho Naga Mika 7 Bible Online

Mika 7 - Wancho Naga bible

Mika 7

¹Monghom angkya ojao müntüi! Ku a, fupsa pün ma pünziak tuita chiatak ilaxle grep zu ma grep ziak tuita chiatakle woknuak maxngokya mixsün tuita ningle. Grep hia ipong müikya fupsa ziakbu a komkaile khaibang daoa.

²Ija haxtok ma, Zang kax ma laxle tüikya sukya khünak tuita danle müntox. Pangnusasa wüi mik amüt angkya hanpakma ziasyen thatan ngole. Noknoke wüi ma-mix zan to kale ngole.

³Ochax mwot mok ang pangnusa wüi tüle anaxle. Nguakax wangkhobu hia kaxfünpabue zuizunbu jule. Tsaipu-kaxpabue ibu hama hwom mongtex wünle koxle, ilaxle ija ningle hwom notom laxle katzua tsuakle.

⁴Hwom khama ataxle sukya mix to lünle hingzang tukux thatha ngaxchu münchang. Chixe hwom nyetmix, ajebu makhange kaxkhün koxle hüikya ningle, Zang-e chix khünaknu to sikngün ang tom angkya hanpak nguile hüile. Athax hwom a khosam ma tüile.

⁵Nang tomzi hia zuikhuibu to mong taxong. Kakonu hia kakopa nyi bama ngaxchu, tata füi zang chemle wünpuix, ija bama khünzailax.

⁶Ija tuk ma sasün hwome hopa to ongat ningle hwonüi, sacha hwome honu füi alaüi, ilaxle nomcha hwome ma-nyenu hwom füi ahele changüi; hünzom zanpa ang a hünzom homkha khünak wüi lüile changüi.

⁷Ikoxlechu kue a JOWANPA hanpakma nyele ngoüi; ku khosünle kop angkya Zang bama kue mongao chitüile tanle nuiüi.

⁸Kem zanpabu ang kem bama ngadong angkya chemchu müntüiüi. Kem a nguakdaoa, ikoxlechu kem a chatle zoüi. Athax kem a zangnak fangto ngopu, ikoxlechu JOWANPAe kem ang zangngai koxüi.

⁹Keme JOWANPA zongto ochax lyendaoa, ikhoma keme noxtakya hanpakma keme kem füikya chix mongtsik adu angkya changle. Ikoxlechu oshuk ma chixe kem kho-awaüi ilaxle kem to thaile mokdaokyabu pangwüi achangle zingüi. Chixe kem zangngai to alaiüi; chixe kem khosünle kopkya ngün ang kem ozün ma ngoüi.

¹⁰Ikoxle kem zanpabu opange kem chanyi laxle “JOWANPA hünzom Zang a omaxün?”, le akaxpuix, keme ibu to lomtang angkya haxthom to tingpupu le nakle tingle lütkya ngün ang kopüi.

¹¹Jerusalem angkya khünaknu, Tingnu pan-katukbu chatle zing angkya hanpak nguile hüingole. Ija pongma hünzom haxsüt-longzi wankam chongüi.

¹²Handünchi Asiria tokya, shuathongchi Ijip nok tokya, Eufrat shuanu tui tokya, ochu to tinu kha tokyabu ilaxle tsailonu haxhua tokyabu, pangnu chitokya nang khünaknu nang hato chat angkya changle.

¹³Ikoxlechu ikhama ngole tüikya khünaknu khoma haxtok a sak-hax ang achangüi.

¹⁴Nange zünle kopkya, nang khünaknu thakma chunnyetpa ang changle, JOWANPA. Hwom faokha to süile ngokoxle chu, hwom akhople haxzao füikya haxtok tüile. Kaitokya ningle hwome, Bashan hia Gilid angkya fumtsütnui to paolaxle fum asütle naxchang kox.

¹⁵Kwom hanpakma ohünotün mwotbu mokle fahüi, JOWANPA, nange kwom Ijip haxtok tokya apüi pongma mokpupu lea.

¹⁶Jat-libue ija ngünle laxüi ilaxle hwom tsak-zong ipongle tüikya khato hwom ang mongmale thütüi. Mongmakya khosame hwome hwom tunbu huxüi ilaxle hwom nabu zimüi.

¹⁷Haxbu khato hwom pu lailaile wokzutle alyangüi; hwome tüle abünle zakya füi zanhunui tokyabu nguiüi. Za laxle hwom a JOWANPA kem Zang hato mong alople hüiüi.

¹⁸O JOWANPA, nang lailaikya Zang mama owachu müntüi; atale tüikya nang khünaknu thaikyabu nange alak-hüi. Nang othuithuima mongtsik-mongmale taxngo, ikoxle kwom hato chizakkya mongkün ahokya ma nang ang mongmüi.

¹⁹Nange tamchatle kwom to chingcha-jajaüi. Nange kwom ochaxbu to hax ma cha füi naküi ilaxle ibu tinu jithong to apaoüi!

²⁰Nange nang khünaknu, Abraham hia Jakop sixlibu, kwom putong hwom füi nange tsaole thomdaokya ningle, kwom hato chialekya mongong hia chizakkya nang mongkün aho angkya changle.