Read Wancho Naga Nahum 3 Bible Online

Nahum 3 - Wancho Naga bible

Nahum 3

¹Atsekya maxsax, mix mik amütkya tingnu, tsuile paolaxle ama tox angkya tuina huanuma tüile!

²Apalax! Zu füi fitkya zing, ochabu anguixkya zing, manbu fütkya zing, man-kanlinbu lekya zing!

³Man süpahibue man jwon, changlobu ajep, paxfuabu alop! Khünak mangbu tüle athün, zikyabu a okiak chitho: khünakbu ibu ma asua!

⁴Tsangtsa hangkya Ninewi to sikangünle. Mongzaoze üntoxle mikmüt chajik-muashembue awangle, she-e jat-libu jikle lax üntoxle ibu da ang achang

⁵JOWANPA Khüthak Zang-e thüile, “Ninewi, kue nang to sikangünüi! Kue nang to kokolan le fitüi ilaxle jatlibue hünzom ngün ang tomüi, hünzom zakmax thünbakya pangwüi ngün ang koxüi.

⁶Kue nang to anukya aho ang kue thuak füi thuaküi ilaxle nang to oma-oshix füi chwopüi. Khünaknue nang to khomtsile huüi.

⁷Nang angün-ngün pangwüi atsutle chatüi. Hwome thüiüi, ‘Ninewi a madaoa! She to chingcha angkya owa tüi? Owae she mong asomse tsuüi?’”

⁸Ninewi, nang a Ijip nok pongwün tingnu Thebe füi sümüipule hia? She ang ngaxchu she khosün ang tuita katuk lailaile Nail shuanu tüile.

⁹She-e Etheopia hia Ijip nok to apün, she-e apünkya tsak-zong ma chem othüt chitüi.

¹⁰Ikoxlechu Thebe angkya khünakbu a zanda ang kople pao. Tingjang lomnu pangnu chito hwom su-sabu to fitle lang. Hwom lompabu to janbüi füi khale kople pao ilaxle hwom kople paokyabue ahanle lax.

¹¹Ninewi, nang chuwüi jutok-saxngat mix ang achangle paodaoüi! Hünzome chuwüi ma zanpabu chak tokya azangle pao ang azongüi.

¹²Hünzom zanhunuibu a fupziak ojum füikya fupsa pün tuita ningle changüi; pün to sikox, ilaxle pünziak a küithole nang wikha ma dütüi!

¹³Hünzom süpahibu a chingcha ashukle, ilaxle hünzom chaxwan a zanpabu tunthoma ziakopkya chemchu chitüile ajong. Hünzom zünbu akaile wüne panbu komkaile zokle ashunüi.

¹⁴Zyakop angkya hanpakma achwonle ti kholax, ilaxle hünzom zanhunuibu shingmongle zinglax! Huaklong ang lax ang haxtikbu akhixlax, ilaxle haxhuak longbu huakle achwonlax!

¹⁵Hünzome tüta ningle mokkoxle chu, hünzom a wün to zokle ashunüi chichangba zan to max ang tomüi. Kuknubue saxziak saxle awütpupu le hünzom a tsaotsik le max ang tomüi. Hünzom kuknubu ningle tsalax!

¹⁶Ding angkya lyettsibu füi ngaxchu süluile hünzome thalex mixbu chu alaile changdaoa! Ikoxlechu athax ibu a, ozang pünlaxle kuknubu pile paokya lailaile samdaoa.

¹⁷Hünzom nguakax-wangkhobu a zangkongtu ma long katuk kho to athople ngokya kuknubu ningle. Chemtue zanghan laiüihex, ibu pile pao, ilaxle ibu ojongto paopuix owaechu chitik!

¹⁸nok wanghompa, nang gowarnorbu zidaoa, ilaxle nang nguakax-wangkho khünakbu a othuithui hanpak ang jipüna! Nang khünakbu a haxhuabu to chiakle samdaoa, ilaxle hwom tamchatle hom to sele apüi angkya mix owa müntüi.

¹⁹Nang thomzün müi angkya olom chemchu müntüi, ilaxle nang mak ang müi angkya fang münchang. Nange thama apongkya zing atatkya pangnue mongmüi laxle hwom chak akhaoüi. Chibak toxkya nang mongtsik chak tokya owangaxchu azangtsuak hexcha?