Read Wancho Naga Habakuk 1 Bible Online

Habakuk 1 - Wancho Naga bible

Habakuk 1

¹Ija a ajepa Habakuk hato JOWANPAe ngaile ahokya kaxho changle.

²O JOWANPA, nange atatüi thoma tamchu mix changnong-pünthom chak tokya kwom azünüi thoma, kue chemtukuxle fong angkya hanpakma nang se-lomle chang angkya?

³Nange ku ang iningkya sikngün büthüikoxle ngün ang tompu? Nange iningle achaxle mokkya to hu ang chemle ajongtho angkya? Thama hia changnong-pünthom ku akhople tüile, ilaxle pangnu khato achax-azankya hia ahe-atsikya tüingole.

⁴Wanlom ma zong müntüi tamchu laxli müntüi, ilaxle otuechu sukya mokle münchang. Otsao khünakbu füi ochax khünakbu fün sümüi, ikhoma sukya zangwün a anong-achangle changdaoa.

⁵Ifüima JOWANPAe chix khünaknu ang thüi: “Hünzom akhople tüikya jat-libu to hule ngolax; nange chem ngünpuix ija nang abütle changüi. Nange ija atat koxlechu chiong angkya oli tuita kue mok angkya changle.

⁶Za-adünkya hia chakjao chidangkya Babilon nok ang kue apün-awangle chang ang tompu. Hwom a chaxwannu akaile mama haxtokbu kop ang zan to ka ang laile.

⁷Hwome khomtsi angkya hia thama adün angkya khuapule, ilaxle hwom mongngam ma hwom a ma alüile wanlom ang changle.

⁸“Hwom manbu a mailangbu füi ngaxchu sümomle, howok anole ngokya shwon füi ngaxchu za-adünle. Hwom mankho ma azankya süpahi othom tsailo nok tokhange mankho ma nguile; hwom manbue haxkha nakle akhixle. Zangshop laxle olae o to shingkya ningle hwom zikle nguile.

⁹“Hwom süpahibue changnong-pünthomle tingtakle dong, ilaxle hwome single hüikya thoto pangnusa wüi zale abüt-aban. Hwome zanda ang kopkyabu a tsaxziak büta.

¹⁰Hwome wanghom hwom wanjai ilaxle nguakax-wangkhobu cha nyi. Tüta ningkya panechu hwom tsyenle tui ang chitho: hwome ija kho bünle hax thok ilaxle ija hwople kop.

¹¹Ibu zangwin ningle hüile tox ilaxle pao. Hwom baozang a ibu khünakbu tsak-zong changkya.”

¹²JOWANPA, nang a pongwang tokhange wüi Zang changle. Nang a, otsao tamchu oshuk chitüikya ku Zang changpu. JOWANPA, ku Zang üntoxle ku khosünpa, Babilon nok nange zünle kop ilaxle kwom to sikangün tang hwom tsak-zongle tüi ang tom.

¹³Ikoxle iningkya ong angkya ojao chitüikya ochax khünakbu to hule nang chemle ngothoüi? Nang a ochax to hu ang chithokya otsao changpu, idaile khünaknue ochax mokkya to hule nang ngo ang müntho. Jangchangba khünakbue hwom füi ngaxchu sütsaokya khünakbu to thama adünle changkya to nange büthüikoxle chitsapu?

¹⁴Owa wange chiapün owa püne chiada le ngokya nyax chichangba zünmok ozyembu ningle khünaknu to nange chemle hulanle ngo angkya?

¹⁵Babilon noke khünakbu nyax kop pupu le jankuix füi koptüi. Hwome ibu sha ma aman le mongmüile akhongtüi!

¹⁶Sha ibue hwom ang amüimüi apüile koxkoxle, hwome hwom shabu shwomle ibu hato töbu apüile koxtüi.

¹⁷Hwome chingcha jao chitüile jat-libu olithule amüt angkya hanpakma nang hwom changlobu twonüi hia?