Read Wancho Naga Habakuk 3 Bible Online

Habakuk 3 - Wancho Naga bible

Habakuk 3

¹Ija a jepa Habakuk zangjop changle:

²O JOWANPA, nange chem mokdaopuix, ija zing kue atatdaoa, ilaxle ku huanuma abütle. Athax chatle kwom tsün ma anaole mok-hüi nang mok-homkya chongkya mwotbu a. Nang mongtsik-mongma pongma ngaxchu chingchajajale tüihüi.

³Edom makhange Zang tamchatle nguingole; otsao Zang a Paran haxnu makhange nguile ngole. Chix sünmüikyae zangdingkho awangle, ilaxle chaxwannu a chix achuakkyae awangle tüile.

⁴Zangchangjep fixfaxle nyankya füi chix nguile ngole; chix chak makhange wüne nyanle, chix tsak-zong pyenle tüikya khato.

⁵Chix thüntho ma chixe kaklakbu ahüile ilaxle zikmüt-mangkho ang chix füifüi ma azüi angkya kaxtom koxle.

⁶Chemtue chix zakpuix, chaxwannu aloxle; chix sün-ngün to jat-libu abünle. Oshuk chitüikya haxnubu sumle paole; otsün lole ngokya haxhuabu thomle dütle, kaitanto chix ahamkya haxhuabu a.

⁷Kushan khünaknu zakya kue ngün Midi angkya khünakbu zale abünkya a.

⁸O JOWANPA, nang mong atsikkya shuajenbu changchami? Nang mongma ang tomkya tinu shinthuk changchami? Zangfwombu kho to nang nga; zangchei füikya zangfwom nang zyen changkya, nange nang khünaknu ang zan to lüt ang tompong ma.

⁹Nange nang hapnu twon ang achwon, nang sanhapbu hap ang achwon. Nang zangchangjepe chaxwan thün afile dap.

¹⁰Chemtue haxhuabue nang ngünpuix, hwom abünle za; zangding tokhange ti thokle ajen. Chaxwan mong tokya tibu fuakle lai, ilaxle ibu tichap ding to dong.

¹¹Mom wüi momle pile leüi nang sanhapbu wün-nyan to tamchu nang paxlo füi jikjeple fakya thoto, lyetnu hia zanghan tangle ajong.

¹²Chaxwannu akaile nang mongtsik füi zan to ka; nang mongtsik füi nange jat-libu abün ang tom.

¹³Nang a nang khünaknu khosün ang laile pao, nange zünle kopkya wanghompa khosün ang a. Chichangchizangle tüikya lompabu to nange hongle anguak ilaxle chix füito azüikyabu komkaile amüt.

¹⁴Chix süpahi lompa to nang sanhapbue apak laxle asüt kwom jwonle asam angkya hanpakma cheinu-watnu ningle hüipongma, chitüi-chinang to zuile zothupkyabu ningle ngadong khangkhi le a.

¹⁵Nange nang manbu füi tinu to ting, ilaxle tüpong chongkya tinu ma thuakbuak lai.

¹⁶Ijabu pangwüi kue atat, ilaxle ku zale abün; zakyae ku tunpün abün. Ku tsangtsa ma jao-jao zong chitüile chang, ilaxle ku chitong ma chikho thu. Hanpak nguile hüikya thatanle ku dangjale ngoüi kem to single hüikyabu to Zang-e sikangünle changpongma.

¹⁷Fupsa pün ma ngaxchu oziak müntüi ilaxle grep zu ma grep ziakkya chitüi, olip manzai ngaxchu puamün ang chikop ilaxle haxtok ma saxziak chemchu chidün, chunbu to lünle pangwüi zile pao üntoxle maihu kunbu chu ahuasakle dantox,

¹⁸Ikoxlechu ku a mongmüi atungle ngoüi, chemthüikoxle JOWAN Zang chix a ku khosünpa changle.

¹⁹JOWANPA Khüthak Zang-e ku ang tsak-zong koxle. Chixe chemtuechu ku cha müikhi sok lailaile atingting khama süt ang tom ilaxle haxnukho to ku khosünle thom.