Read Wancho Naga Zafania 1 Bible Online

Zafania 1 - Wancho Naga bible

Zafania 1

¹Ija a, Amon sasün Josiah Judah ma wanghom ang ngopongma, JOWANPA tokhange Zefaniah hato hüikya kaxho. (Wanghompa Hezekiah a wanghompa Amariah, Gedaliah, üntoxle Kushi hwom makhange hüikya changle.)

²JOWANPAe thüi: “Chaxwannu ma atüitüi komkaile kue amütüi,

³müi-hi-mix pangwüi, o hia nyax pangwüi. Kue chichangchizangle tüikya khünakbu hato düt angkya hanpak apüile faüi. Kue noknusa amütüi, ota tuita chu müntoxüi. Ija JOWANPA kue akaxdaoa.

⁴“Jerusalem hia Judah angkya khünaknu pangwüi to kue sikangünüi. Ikha tokya Bal baozang to shwomkya olom oshuk kople kue amaüi, ilaxle ikhama zomzingle hüikya zompu-zangpabu owaechu texle münataküi.

⁵Homkho to donglaxle lyetnu, zanghan, hia lyettsibu to shwomkyabu kue amaüi. Ku to shwomtole tamchu kutsai-kukax ma laxle tüiüihex le tsao laxle Molek baozang mün ma tsaotsütle changkyabu chuwüi kue amaüi.

⁶Opange ku hato tok ahopuix ilaxle ku füito azuile chichangpuix, opang ku hato chihüipuix tamchu ku ang lom azuihüi le chithüipuix, ibu pangwüi kue amaüi.”

⁷Kaxfün nui ma JOWANPA thung angkya hanpak chwonüna; ikhoma chix tüipongma taxpu-taxzua. JOWANPAe chix khünaknu tö koxle chang angkya hanpak achwon ngole ilaxle Judah nok pünpakle chang angkya hanpakma zanpabu ahyenle changdaoa.

⁸JOWANPAe thüi: “Ija lang-huakle changkya nyix, alixachongbu hia wanghom sasün hwom tamchu mixnok zanglombu tole hüikyabu to kue sikngün ang tomüi.

⁹Mixnokbu zangshwom ma shwomkyabu ilaxle ahuxkyabu ilaxle hwom hopupa hom awangle naxchang ang lang-huak laxle tuina tsui apüikyabu pangwüi to kue sikangünüi.

¹⁰“JOWANPAe thüile: Ija nyix Jerusalem angkya Nyax Zünkai ma hünzome sopkya zing atatüi. Tingnu nokzün chima hünzome sop-juakya zing atatüi ilaxle haxhuabu to thuple akhixkya zing tüle chongle atatüi.

¹¹Thalex-juatai khünakbu komkaile zile paokya khoma akhongkya hia sop-juakya zing, hünzom tingnu ma shuathong chikao ma ngokya thome chemtue atatle laxüihex;

¹²“Ipongma kue wüntik tuita laxüi ilaxle Jerusalem lomüi. Khünak ma füi alüile mongzom ma müile tamchu mongchong laxle opange hwom füi alüile ‘JOWANPAe chemtuechu tütalichu münmok’ le thütle tüilaxpuix, hwom to sikngünüi.

¹³Hwom tuina tsui paoüi ilaxle hwom homhaxbu amaüi. Hwome zingle ngokya homhaxbu ma hwom chemtuechu münngo chichangba hwome küi-thwomle ngokya grep haxtok angkya grepti-ju münlingüi.”

¹⁴JOWANPA hanpak chongkya hüitu nguiüna: müimama lejao ngangle soxüna tamchu mom-momle nguile ngole! Ija nyix a khaxkya nyix ang changüi, chemthüikoxle tüle chachen mongchen füikya naomüibu ngaxchu jemax-hwonsamle akhongüi!

¹⁵Ija a chabüt-lasün nyix tuita changüi, sikngün hia thangnak apongkya nyix a. Ija nyix a thamakya nyix, haxshix zangnakkya nyix, zangfwom atyenkya nyix,

¹⁶süpahibue ziakople thomkya tingnubu hia dingkho to zaile tüikya zanhunuibu to sing akhongkya chax-hi-zan zinge awangle azingkya nyix ang changüi.

¹⁷JOWANPAe thüile: “Ile khünak pangnusa wüi miksutbu lailaile akhwomle aham angkya thama khünaknüsa hato apüile koxüi. Hwome ku zongto ochax lyenle changdaoa, ilaxle athax a hwom ajibu a tijenkya ningle thokle awütüi, ilaxle hwom mangbu a kothofa to shanle za-ngoüi.”

¹⁸JOWANPAe chix chabüt-lasün ngünle laxkya nyix, hwom ma tüikya hun hia khopbue ngaxchu hwom khose ang müntho. Chaxwannu komkaile chix mongtsik wün füi bakle amütüi. Chixe chaxwan tok ma ngokya noknusa hato sünto ashuk angkya chaxwan zanghan apüile faüi.