Read Wancho Naga Zafania 3 Bible Online

Zafania 3 - Wancho Naga bible

Zafania 3

¹Ikhama ngokya ma khünaknu to zothuple alün-alox ngokya Jerusalem tingnu a maxdaoa.

²Ijae JOWANPA kax to najao chitha ilaxle chix wanlombu pongle chikop. Ijae JOWANPA to mongong chalomkya chitüi chichangba chix ang asunhüile chithüi.

³Ikhama alixachongbu a ahungle ngokya mailangbu ningle; ikha angkya kaxfün mixbu a, müiza nyaxza chemchu ngainopkya zangngai thoma bang ang chitsukya, woknuak ma ngokya shwonbu ningle.

⁴Ajebu a hünlit ojao chilaxkyabu tamchu ong angkya kha chitüikyabu; nguapabue ikha angkya otsao chitsaokya ang achang, ilaxle ma fün amüi angkya hanpakma hwome Zang wanlom ajoajüi.

⁵Ikoxlechu JOWANPA a ija tingnu mawüi tüile ngo; Chixe chem supuix ija mok ikoxle chem chisupuix ija otuechu chimok. Nopfokya to chixe chix khünaknu ang sukya kaxfün fa. Ikoxlechu ikhama tüikya ochax khünakbue ojao chiazakle chisukya mwotbu mokle ngo.

⁶JOWANPAe thüi: “Kue jat-libu pangwüi hwotle amütdaoa; kue hwom tingnubu amadaoa ilaxle ibu pan katuk hia zanhunuibu amale toxdaoa. Tingnubu ma owachu münngo; tingjang lomnubu ahuasak--ikhato owachu chitox.

⁷Ile changkya zuma ku khünakbue ku achuak-achenle changüi ilaxle kue akox-akomkya kax ma laxle tüiüi, ilaxle hwom hama kue ahole fadaokyabu otuechu hwom münalaküi. Ikoxle janpüi ma hwome amipongkya füi ngaxchu sümale chang.

⁸“JOWANPAe thüi: ‘Nuibang!’ Kue jat-libu pangwüi ma tsaitox-kaxfele changkya nyix tanle nuilax. Kue ku mongtsik mongma tsak-zong atsangle hüikya hwome awanle laxle chang angkya hanpakma jat-li hia wangtingbu asox ang tom angkya ku mong ma zangwünle tsuakdaoa. Ku küntsik-mongmakya chaxwannu pangwüi max ang tomüi.

⁹“Ifüima kue jat-li angkya khünaknu mong alop ang tomüi, ilaxle hwome ku to jopkya boma mama baozangbu owa tochu chijop chitoüi. Hwome pangnusae ku kax ma laxle changüi.

¹⁰Tsailo nok Etheopia tokhange ngaxchu ku khünakbue ku hato töbu apüile koxüi.

¹¹Ipongma hünzom, ku khünakbu, hünzome ku zan to kale changdaokya bama azak angkya mwot müntüi. Ngamkya hia mix to asongle hukya khünakbu kue apaoüi, ifüima hünzome tamchatle ku otsao haxnu ma ku zan to kale münchangüi.

¹²Kue ikhama somdangkya hia hixkya ang achang tsuakkya khünak opang ku hato fong angkya lomle nguipuix, ibu thomüi.

¹³Ota toxle tüikya Israel khünakbue owa zongtochu thaikya mwot chimoküi, chichangba owawa dyen-nganle chang ang münazongüi. Hwom a owa thuachu za angkya chitüile ahak-aluale tamchu khosün ma ngoüi.”

¹⁴Israel khünaknu, mongmüi to tsaingaole akhong kox! Nang mongkha makhange abakle mongmüikox, Jerusalem!

¹⁵JOWANPAe hünzom sikngün azakdaoa; chixe hünzom zanpabu pangwüi apaodaoa. JOWANPA, Israel nok wanghom hünzom füi tüile; athaxpi hünzom zazyen angkya olom chemchu müntüi.

¹⁶Hwome Jerusalem füi ile akax angkya hanpak nguile ngole, “Ojao taxza, O Zaion! Nang chakbu shonai ang taxtom!

¹⁷JOWANPA nang Zang nang füi tüile; chixtsak chix ong makhange nange lüt ang tomüi. JOWANPAe nang füi mongzom müikya tüiüi, ilaxle chix mongkün makhange chixe nang ang tsün hozün koxüi. Chix ang nang füi mongmüile tsaingaoüi,

¹⁸pangpwon pongma khünaknu ang mongmüikya lailaile.” JOWANPAe thüi: “Kue thama apüi ang aza-ana ngokya ashukdaoa ilaxle nang mongma komle paodaoa.

¹⁹Hanpak a hüile ngole! Kue hünzom to zothuple ngokyabu to sikngün ang tomüi; chafai mixbu kue komle azünüi ilaxle zandabu hom to chatle apüiüi. Hwom zakkop kue münchong ang achangüi, ilaxle chaxwannu pangnue hwom achuaküi.

²⁰Hanpak a hüile ngole! Kue nang khünaknu afale sam ngokyabu hom to apüiüi; kue nang chaxwannu pangnu khato wüi zangle wün ang tomüi ilaxle nang a tamchatle ahak-aluale chang ang tomüi.” JOWANPAe akaxdaoa.