Read Wancho Naga Zekaria 10 Bible Online

Zekaria 10 - Wancho Naga bible

Zekaria 10

¹JOWANPA ma tsosa zangwat julax. Zangwat angkya zangfwom hia nyenti ajo laxle noknusa hanpakma chaxwan thün hingshüile achangkya a JOWANPA tix changle.

²Khünaknue jenu-shipa hia chapabu ma tiktole changtüia, ikoxle hwome kopkya kaxlan a chemchu chichangkya othaibu. Züizüie wünmang taile ikoxlechu ija a othai lom to nang zun angkya hanpak zaza; hwome koxkya mongsom ma laxli chemchu müntüi. Ikhoma khünaknu a chun samkya lailaile samle aham ngopu. Hwom a thama ma tüile chemthüikoxle hwom ang lompa müntüi.

³JOWANPAe thüi: “Ku khünaknu to apün-adale ngokya mixnokbu füi ku ang mongtsikle, ilaxle kue hwom to sikangün angkya changle. Judah angkya khünaknu a ku kux changpu, ilaxle ku, JOWANPA Khüthak Zang-e hwom to hume thomüi. Hwom a tsak-zong füikya ku zankat manbu changpu.

⁴Khünaknu to apün-ada angkya hanpakma hwomkha angkya wüi wanghombu, lompabu tamchu kaxtompabu laihu angkya changle.

⁵Hwom zanpabu to lomnutang angkya haxthom khato zutle akhünle anaokya süpahibu ningle Judah angkya khünaknu a zan to anaokyabu ang changüi. JOWANPA hwom füi tüikoxle hwom chizale azanüi, ilaxle hwome mankho makhange azankya zan pangnu to anao angkya changle.

⁶“Kue Judah angkya khünaknu tüle tsak-zongle chang ang tomüi; Kue Israel khünaknu kho-awale kopüi. Kue hwom to chingchajajakya tüiüi ilaxle hwom pangwüi ma haxtok to chat ang tomüi. Hwom a kue chilaxle awüt daokya ningle jao chitüile changüi. Ku a JOWANPA, hwom Zang changpu; kue hwom zangjop to lanüi.

⁷Israel angkya khünaknu a süpahibu lailaile tsak-zong füi tüiüi, grepti-ju lingdaokyabu ningle hwom ang mongmüiüi. Hwom su-sabue ija zan to lütkya jento texle ataküi ilaxle JOWANPAe chem mokdaopuix ija khoma hwom ang mongmüikya tüiüi.

⁸“Kue ku khünaknu nyaküi ilaxle hwom ta ma asüi ang tomüi. Kue hwom kho-awale kopüi ilaxle tüihomkya ningle hwom huanuma pu-tsale chang ang tomüi.

⁹Kue hwom chaxwan tok to chiakle sam ang tomdaobachu, ibachu ochuchu tokhange hwome ku texle ataküi. Hwom tamchu hwom su-sa hwom chimaxle azangüi ilaxle tomle ma chaxwan to chatüi.

¹⁰Ijip nok hia Asiria nok tokhange kue hwom ma tingtok to chat ang tomüi ilaxle hwom haxtok ma hwom ngo ang tomüi. Kue hwom Gilid hia Lebanon to chuwüi ngo ang tomüi; haxtok pangkhato wüi khünake awangle changüi.

¹¹Chemtue hwome hwom sikngün tinu akaile tsuaküihex, JOWANPA kue tichap to fitüi, ilaxle Nail jinu zukyabu zople paoüi. Tüle ngamle ngokya Asiria puinaile chang ang tomüi, ilaxle tüle zaxzangle ngokya Ijip noke ma tsak-zong amütüi.

¹²Kue ku khünaknu tsak-zongle chang ang tomüi; hwome ku to shwomüi ilaxle ku kax ma laxle tüiüi.” JOWANPAe akaxdaoa.