Read Wancho Naga Zekaria 11 Bible Online

Zekaria 11 - Wancho Naga bible

Zekaria 11

¹Hünzom kabu dapkox, Lebanon, hünzom sedar pünbu wün füi shunle naxchang ang!

²Soplax tamchu jualax, hünzom saipres pünbu: sedar pünbu a nguakdaoa; ipong fuazangle ngokya pünbu asumdaoa! Soplax tamchu jualax, hünzom Bashan angkya zak pünnubu: ipongpongkya shonak-lingnu shale tsuakdaoa!

³Mongmax laxle wanghombu sop; hwom fuazang athax samdaoa! Mailangbu ahungkya zing apalax; Jordan shuanu achole tüikya, hwom hom ang ngokya faonu amütdaoa!

⁴JOWANPA, ku Zang-e ku füi akax: “Lang ang pao angkya chunbu nyekya chunnyetpa tuita ningle achanglax

⁵Hwome hopu hwome ibu lang ikoxle ikhoma sikngün fakya chitüi. Hwome omüi hang ilaxle thüi: ‘JOWANPA achuak kox! Kem a ahak-aluale tüile!’ Hwome nyele ngopupa ang ngaxchu hwom to chingchakya chemchu chitüi.” (

⁶JOWANPAe thüi: “Kue chaxwan tok angkya owatochu athax chingchakya müntüiüi. Kujaoe khünaknu pangwüi hwom thakma apünle ngokya chak to danüi. Apün-awangkya ibue chaxwannu thomjole changüi, ilaxle kue ija hwom chak tokya khosünle münchang.”)

⁷Opange chun apüi ilaxle hangle changpuix, ibue ku hingchak shak, ilaxle ku a lang angkya chunbu nyetmix ang achangpao. Kue kiathox anyi lax: Tuita ang kue “Mongtsu” ilaxle ata ang “Notom”, le nyak. Ilaxle kue chunzyembu nyele ngo.

⁸Kue mama chunnyetmix sün azom, opange ku to miktsakle tüipuix, hwom füi adu ang chitho, ilaxle lyet tuita bama wüi kue ibu füi atsaile pao.

⁹Ifüima kue chunzyem füi akax: “Ku a athax pi hünzom nyetmix ang münchang. Opang zikshua hex naxzikox. Opang müt-shua hex naxmax kox. Ota toxkyabuechu tata lüile amütüi.”

¹⁰Ifüima kue “Mongtsu”, le nyakkya kiathox lax ilaxle ija apak; ija a jat-li pangnusa hanpakma tüikya JOWANPA füikya tsaotsüt amüt angkya hanpakma.

¹¹Ikhoma ija nyix ija tsaotsüt maxkya ang achang. Chunbu apüi üntoxle hangle changkya khünakbue ku to hule ngo, ilaxle, kue chem mokpuix ija makhange JOWANPAe zangwünkya hwome tikle ngo.

¹²Kue hwom ang thüi: “Hünzom ang mong jangtsu, ku hingchak mün fahüi. Ikoxlechu hünzom mong chitsu, ibu thomlax.” Ikhoma hwome ku ang hingchak mün hex-ole khop ngunkhix huak tsübün kox.

¹³JOWANPAe ku füi akax: “Ibu Zangshwom-Hom ngun-thünnui to sholax.” Ikhoma kue khop ngunkhix tsübün kop---hwom zongzong to kue kopkya huanu---ilaxle ibu Zangshwom-Hom ngun thünnui to dan.

¹⁴Ifüima kue anyi lükya kiathox “Notom”, le nyakkya apak ilaxle Judah hia Israel nyi notom ajan ang tom.

¹⁵Ifüima JOWANPAe ku ang thüi: “Anaole chu chunnyetpa ningle tammokkox. Izuma a laxli chitüikya chunnyetpa ang changkox.

¹⁶Kue ku chunzyembu to hu ang chun nye angkya mwot koxle thompu, ikoxle chixe azik-amüt ang aza-anale ngokya chunbu to chemchu münthüitho; chichangba chixe maxsamkyabu to hupu lechu münchang, chichangba maklaxkya humele amüikoxpu lechu münchang, chichangba osüt koxle tuxpu lechu münchang. Itülüi, chixe sünutkya chun omüi sax ilaxle chisokbu thuple asyep le.

¹⁷Eja laxli chitüikya chunnyetmix a maxdaoa! Chixe chix chunzyem danle toxdaoa. Achax-azankyae chix tsak-zong komkaile olithu angkya changle. Chix chak faishokle maüi, ilaxle chix tsaxchi mik asutle paoüi.”