Read Wancho Naga Zekaria 12 Bible Online

Zekaria 12 - Wancho Naga bible

Zekaria 12

¹Ija a Israel nok hanpakma JOWANPA tokhange kaxho tuita; JOWANPA owae zangding pünle akhaokya, chaxwannu zingle alaipuix, ilaxle khünak hanpakma tsün koxpuix. Chixe thüile:

²“Kue Jerusalem a jutsox lailaile zingüi; she akhople tüikya jatlibue lingüi ilaxle jutok mix lailaile huüi. Ilaxle chemtue hwome Jerusalem hwople kopüihex, Judah angkya tingnu mamabu chuwüi hwople kopüi.

³Ikoxlechu chemtue ija hanpak nguile hüiüihex, kue Jerusalem a lixkya longnu tuita ningle achangüi--owa jat-lie ija nwon ang azonglaxüihex hwome maklaxle changüi. Chaxwannu jat-li pangwüi athütlaxle she zan to kaüi.

⁴Ipongma kue hwom manbu chabüt-lasünle chang ang tomüi ilaxle ibu kho ma ngakya khünakbu ongat ningle changüi. Judah angkya khünaknu to kue nyele thomüi, ikoxlechu hwom zan-nok manbu ang kue mik apwom ang tomüi.

⁵Ipongma Judah angkya saxthombue hwom füi alüile akaxüi, ‘Jerusalem ma ngokyabu ang JOWANPA Khüthak Zang-e tsak-zong koxle changdaoa.’

⁶“Ipongma kue Judah angkya saxthombu faokha tokya wün lailaile achangüi chichangba puamünle ngokya zim angkya wün ningle achangüi--tomzi jat-libu pangwüi hwome amütüi. Jerusalem angkya khünaknu a tingnu mong ma khosün müile ngoüi.

⁷“JOWANPA, kue pongwang ma Judah angkya süpahibu ang zan to lüt ang tomüi, ile chang koxle Dawid sixli hia Jerusalem angkya khünaknue kop angkya münchong a mama Judah angkya khünakbue kopkya füi chongkya ang münchangüi.

⁸Ipongma JOWANPAe Jerusalem ma ngokya khünaknu kho-awale thomüi, ilaxle hwom khama anaikya mix ngaxchu Dawid lailaile tsak-zongle tüiüi. JOWANPA kaxtaimix, Zang chix lailaile Dawid sixli hwome ibu lom azuiüi.

⁹Ipongma Jerusalem amüt ang azongkya jat-li pangwüi kue amütüi.

¹⁰“Dawid sixli hia Jerusalem ma ngokya khünaknu kue chingcha hia zangjop chasae awangle chang ang tomüi. Owa hwome tople langdaopuix, hwome chix to hu, ilaxle sasün tuita wüi zikya nao mangtsakya lailaile hwome chix mangtsale changüi. Somwang nao zile paokya kako to mangtsapupu le hwome mongmaxle mangtsaüi.

¹¹Ipongma Jerusalem ma mangtsakya a Megido haxsha ma Hadad Rimon mangtsa pongkya lailaile tüle chongle tüikya.

¹²Chaxwan pangkhato wüi kako to tyale ija mangsop: Dawid-e sixli hwom, Nathan sixli hwom, Liwi sixli hwom, Shimei sixli hwom, ilaxle mama homkhabu pangwüi mahomkhakha to mangtsa, ilaxle lükabue shekobu füi süile mangtsa.