Read Wancho Naga Zekaria 13 Bible Online

Zekaria 13 - Wancho Naga bible

Zekaria 13

¹“JOWANPA Khüthak Zang-e thüi: ‘Chemtue hanpak nguile hüiüihex, Dawid sixli hia Jerusalem angkya khünaknu, hwom ochaxbu hia chapa shwomkyabu tokya atsao angkya hanpakma shuasa tuita fuakle lai angkya changle.

²Hepongma kue chaxwan angkya chapabu mün jaojao apaoüi, ilaxle owaechu ibu texle atak ang müntom. Owawae aje changpule akaxkyabu kue amütüi ilaxle chapa to shwomse le tsukya mong kue apaoüi.

³Ifüimachu owawae aje angkya wüi changle le zongpankya mix jangtüi, honu hia hopa nyie chix a mik max ang tom angkya wüi akax angkya changle, chemthüikoxle chixe JOWANPA kax akaxpu le thüilaxle othai kax taile. Chemtue chixe ajele ngopuix ipongma honu hia hopa nyie chix tople langüi.

⁴Ija tunu nguile hüisheme, aje owachu mae ngünkya bama tsaichong-kaxbongle chang angkya müntüi. Chixe aje ningle mokle aho tamchu khünaknu dyen angkya hanpakma ajepa hwom za-pua laxle chang angkya mwot chemchu müntüi.’

⁵Itülüi, chixe thüiüi: ‘Ku a ajepa münchang. Ku a manzai mix tuita changpu--tsünjang masule kue haxtok ma manzaile ngopu.’

⁶Ifüima owawae ‘Idu nang thünkhux angkya chemthüikya makman?’ le atüile jangchang, chixe lan angkya a ‘Kue ibu zuikhui hom to maklax le changpu.’”

⁷JOWANPA Khüthak Zang-e thüile: “Changlo, zolax ilaxle chunnyetpa to singkox Chix a ku mwot mokkya mix changle! Chix lang kox, ikoxtix chunbu afale paoüi. Kue ku khünaknu to singüi

⁸ilaxle chaxwan tok angkya khünaknu othom azom kha angkya othom anyi a zile paoüi.

⁹Ilaxle othom tuita atale tüikyabu to kue wanle anoüi ilaxle wün füi khop atsaokya lailaile kue hwom atsaoüi. Kue hwom to hun to wanle anokya ningle wanle anoüi. Ifüima hwome ku to zangjopüi, ilaxle kue hwom zangjop to lanüi. Kue hwom hama hwom a ku khünakbu changle le akaxüi, ilaxle hwomechu ku a hwom Zang changpule ngaiüi.”