Read Wancho Naga Zekaria 14 Bible Online

Zekaria 14 - Wancho Naga bible

Zekaria 14

¹JOWANPA kaxfün nui ma thung angkya hanpak chwonle tüile. Ifüima Jerusalem a tsuiüi, ilaxle ibu tsuikya tuinabu a hünzom miksho ma ahanle laxüi.

²Jerusalem zan to ka angkya hanpakma JOWANPAe jat-libu pangwüi asüi ang tomüi. Ija tingnu a hwome kopüi, homhaxbu tsuiüi, ilaxle shekobu to shingnünle changüi. Khünaknu süifi a zanda ang kople paoüi, mamabu a tingnu angkya kople münpaoüi.

³Ifüima, amipongma chix azanle hüikya ningle JOWANPA a ibu jat-libu zan to kaüi.

⁴Ipongma chix, Jerusalem zong ma handünchi, Olip Haxnu ma ajongüi. Ifüima Olip haxnu a chongkya haxbang makhange handün hia hannop le ahanüi. Haxnu süifi a shuakux chito paoüi, ilaxle süifi a hannop chito paoüi.

⁵Hünzom a ija haxnu anyi ang achangle ahankya haxbang makhange azangle paoüi.

⁶Chemtue ija hanpak nguile hüiüihex, ikhato zangkong hia jun ang achangle adwonkya müntüiüi,

⁷chichangba zangnak chemchu müntüiüi. Zangnaknu khato ngaxchu jento anyixningkya zangngai tüile ngoüi. Ija hanpak chemtue changüihex ija JOWANPA chix tatae tix awan.

⁸Chemtue ija hanpak nguile hüiüihex, Jerusalem makhange tsaothakya tibu jenüi, ija angkya süifi Omang Tinu to ilaxle süifi a Mediterenian Tinu tole jenüi. Ija a zangwa hia tsonu chisüile zanglao atale jenüi.

⁹Ifüima JOWANPA a chaxwannu ma wanghompa ang changüi; noknusae chix a Zang changpule shwomüi ilaxle ija mün tuita mawüi chix tsingle laxdaoüi.

¹⁰Shuakuxchi ma Geba makhange shuathongchi ma Rimon alople, ija wankamkam bakle haxsha ang zingüi. Jerusalem a, she akhople tüikya haxtok ibu pangwüi thakma achuakle nwonüi; ija tingnu a, kaitanto zünkai tüikya, üntoxle Benjamin Zünkai makhange Ozong Zünkai alople tamchu Hananel Towar makhange wanghom hwom grepti-ju fyetnui alople tüiüi.

¹¹Ikhato khünaknu a chaza angkya chemchu chitüile ngoüi. Thamae tingtui adün ang aza-anakya chemchu müntüiüi.

¹²Jerusalem ma achax-azanle changkya jat-libu pangwüi JOWANPAe okak-olak ahüiüi. Hwom ozün ma tüitanto wüi hwom tsangtsa müibu shanle paoüi; hwom mik hia ibu shanle paoüi.

¹³Ipongma JOWANPAe hwom huanuma jepakya hia chazakya tüi ang tomüi ilaxle hwome ma zui ma tüikya khünak to soxle shingle tata zan to kakya tüiüi.

¹⁴Judah angkya khünaknu Jerusalem kho-awa ang azanüi. Mixjat mixlibu angkya tuina--hun, khop hia nyi-za, iningkyabu huanuma tsui kopüi.

¹⁵Zan nok thongnui ma tüikya müi, man, mansa, ut hia mantsak, ibu hato chisumüikya okak-olak hüiüi.

¹⁶Ilaxle Jerusalem zan to kale changdaokya jat-libu khama ota toxle tüikyabu pangwüi zangfokya to ikhato JOWANPA Khüthak Zang to shwom ang nguiüi ilaxle ikhato hwome Pomsa Pangpwon saxüi.

¹⁷Owa jat-lie, ikhato nguilaxle JOWANPA to wanghom changpule shwom ang angamle changpuix, ibu haxtok to zangwat ti mündütüi.

¹⁸Ija Pomsa pangpwon münsaxpu le Ijip nokbu angamle jangchang, hwom hato chuwüi chix to münshwompu le angamkya mama jat-libu hato ahüikya okak-olak füi JOWANPAe chakmokle changüi.

¹⁹Ija a Ijip nok hia mixnokbu opange Pomsa Pangpwon münsaxpu le angampuix ibu hato ahüi angkya sikngün changle.

²⁰Ipongma manbu ma laxkya züpakbu ma ngaxchu “JOWANPA hanpak ang atsaopu”, le zale jao apütle changüi. Zangshwom-Hom angkya tiklakbu pangwüi tö-tsap zui angkya khuatsum füi tomwüi otsao changüi.

²¹Jerusalem hia Judah ma tüikya fongkhat tiklak komle JOWANPA Khüthak Zang to shwompongma lax ang süile thomüi. Tö koxkya khünakbue ibu müi hia mama töbu lumle song-kha ang twonüi. Chemtue ija hanpak nguile hüiüihex, JOWANPA Khüthak Zang Zangshwom-Hom ma thalex-juataikya chemchu müntüiüi.