Read Wancho Naga Zekaria 5 Bible Online

Zekaria 5 - Wancho Naga bible

Zekaria 5

¹Kue tamchatle hu, ikoxle izuma a müikhwon laiza zangwin to pile ngokya kue ngünlelax.

²Kaxtaimix-e ku ma kue chem ngünpu le atüi. Kue lan: “Zangwin to müikhwon laiza pile ngokya ngünle; ija a sok 14 ojang üntoxle okhao ma sok anüt le tüile”,

³Ifüima chixe ku ang thüi: “Ija ma chaxwannu haxtok pangkha towüile angkya othuak-ozom zalaxle tüile. Ija laiza kaochima haxtok angkya ahuxmixbu amüt angkya zale tüile; ilaxle ata kaoma a tsaosax lejao kaxthai zang wünkya khünak pangwüi tswonle paoüi.

⁴JOWANPA Khüthak Zang-e thüile, chixe chix othuak-ozom apaoüi, ilaxle ija a ahuxmixbu hia tsaosax lejao atsele zangwünkya pangwüi hom to nopüi. Ija a hwom hombu ma ngoüi ilaxle hwom hombu pünpakle dantoxüi.”

⁵Kaxtaimix anaolechu ngai ilaxle akax: “Hulax! Tüli-jali hüile ngole!”

⁶Kue atüi: “Ija a chemli?” Chixe lan: “Ija a tsong tuita, ilaxle ija a haxtok pangnu tokya ochax hanpak ang changle.”

⁷Ija tsong ma tu makhange zingkya ohux tüikya. Kue hule ngopongma, ija ohux a daple nwon, ilaxle ija tsong khama shekonu tuita thung.

⁸Kaxtaimix-e hüi: “Ija a chichang-chizangkya münwan changpu.” Ilaxle chixe she a tsong khato thwomle adüt üntoxle okahux a anaole danle hux.

⁹Kue angakle hukoxle sheko anyi tüle janzüi füikya olo zang ningkya füi pile ku hato hüile ngokya ngünle lax. Ibue ija tsong tswonle kop ilaxle ija füi pile pao.

¹⁰Kue kaxtaimix ma atüi: “Hwome ija ojongto paoüihex?”

¹¹Chixe lan: “Babilon nok to, Hwome ija hanpak ang ikhato zangshwom-hom zaiüi. Chemtue ija zangshwom-hom tsuakle changüihex, tsong a ikhama shwom angkya hanpakma danüi.”