Read Wancho Naga Zekaria 6 Bible Online

Zekaria 6 - Wancho Naga bible

Zekaria 6

¹Kue mama Mikngün tuita ngün. Izuma kue man-kanlin ali khop haxnu anyi oba angkya laile ngün.

²Pongwang angkya man-kanlin a mankhibue lin, anyi lükya man-kanlin a mannakbue lin,

³azom lükya a manthobue lin, ilaxle ali lükya a münwan füikya manbue lin.

⁴Ifüima kue kaxtaimix ma atüi: “Alixachong, ibu man-kanlin a chem hanpak?”

⁵Chixe lan: “Ibu a zangchei ali changpu; hwom a athax ile, zangfang pangnu Jowanpa ngwotnui tokya nguikya changle.”

⁶Mannakbue linkya man-kanlin a shuakuxchi Babilon nok to dongle ngokya. Manthobu a hannop chito kale ngokya, ilaxle münwan füikya manbu a shuathongchi chaxwan to kale ngokya.

⁷Chemtue münwan füikya manbu laipuix, hwome paolaxle chaxwannu to hu ang mongzok. Kaxtaimix-e thüi: “Paokox üntoxle chaxwannu to hukox!.” Hwome ija ningle mok.

⁸Ifüima kaxtaimixe ku nyakle akhong: “Shuakuxchi Babilon nok to dongkya manbue JOWANPA mongtsik adang daoa.”

⁹JOWANPAe ku ang kaxho ija fa.

¹⁰Chixe thüi: “Zanda ang ngokya Heldai, Tobijah hia Jedaiah hwome koxkya hinghobu pongle koplax, ilaxle Zefaniah sasün Josiah hom to nonole paolax. Hwome pangwüi Babilon nok to zanda ang ngokya chatle tüile.

¹¹Hwome koxkya khop-jan hia hun makhange khohom tuita zinglax, ilaxle ija Jehozadak sasün Jihusua, Nguakho khang ma sünle laxkox.

¹²JOWANPA Khüthak Zang-e ‘Khünak owa ang Pünkang le nyakpuix, ija chixe JOWANPA Zangshwom-Hom zingle ngokya khama zaxzangle laiüi.

¹³Ija zingle alai angkya tamchu wanghompa münchong kop angkya mix a chix tix changpu. Chixe chix khünaknu thakma apün-awangle changüi. Nguapa tuita chix tüntong tunthoma ajongüi, ilaxle hokhie tumüi hia mongsom ma tomtomle moküi’ le chix hama wünkox.

¹⁴Ija khohom a Heldai hanpakma tuita JOWANPA Zangshwom-Hom ma chix münchong ngampai ang ngonuiüi, Tobijah, Jedaiah, üntoxle Josiah.”

¹⁵Tsailo to ngokya khünakbu nguilaxle JOWANPA Zangshwom-Hom zingkya to asunle changüi. Ilaxle chemtue ija tamchatle zingkya tsuaküihex, JOWANPA Khüthak Zang-e hünzom hato ku tsanle ahüikya awanle laxüi. Hünzome JOWANPA hünzom Zang kaxtombu kax ma laxle jangchang, ibu pangwüi changle hüiüi.