Read Wancho Naga Zekaria 7 Bible Online

Zekaria 7 - Wancho Naga bible

Zekaria 7

¹Dairas wanghom ang ngokya zanglao ali lükya to, lyetnu kua aku ma nyix ali lükya to (Kislef-lyetnu ma), JOWANPAe ku ang kaxho fale.

²JOWANPA mohiman hanpakma zangjop ang Bethel angkya khünaknue Sharezar hia Regemelek üntoxle hwom khünakbu Khüthak JOWANPA Zangshwom-Hom to tsanle apao.

³Ilaxle nguapang hwom hia ajebu ma ija kax atüi ang tom: “Kwome zanglao obibi hex mokle hüidaokya ningle, Zangshwom-Hom atsunle amakya bama atsaole zangjop sopkya hanpak laxle hüikya kwome thuithuile mokle le angkya hia chemle changüi?”

⁴Ija a JOWANPA tokhange ku hato hüikya kaxho changpu.

⁵Chixe thüi: “Haxtok angkya khünaknu üntoxle nguapabu hama, zanglao 70 bama chemtue hwome atsaole zangjop tamchu sople changpuix, ija a ku achuak-achenle mokkya chichang khato le thüikox.

⁶Ilaxle chemtue hwome sax-hi-lingle changpuix, ija a hwom mongzom ma müi angkya hanpak changkya.”

⁷Ija a pongwang angkya nguapabu makhange JOWANPAe akaxkya kax. Hepongma Jerusalem ahak-aluale tamchu khünaknue awang laxle tüikya. Tingnu akhople tüikya ting-nok to tata le chichangle shuathongchi angkya haxnu chabu to lünle khünaknu huanuma tüikya.

⁸JOWANPAe Zekariah hato chix kaxho apüi:

⁹“Kue ku khünaknu ang kaxtom ibu kaiwüi koxle thomdaoa: ‘Hünzome sukya kaxfün fa angkya wüi changle, ilaxle tata hato chingcha mongkün aho angkya wüi changle.

¹⁰Hünzom füi tomwüi ngokya zomnu hia khaxsa tamchu mixnok, tamchu owawa asun angkya lomle changkya mix, ibu to adix-adale taxtüi. Ilaxle tata to maklax ang tom angkya mwottho taxzing.’

¹¹“Ikoxlechu ku khünaknue ibu ku kax to kheba chithüi. Hwome hwom khangkabu zim

¹²ilaxle hwom mongtsangbu longnu büta tsakle chang ang tom. Kaitanto ngokya ku aje makhange kue anwot-anole fakya ibu to hwome ojao na chitha, ikhoma ku ang huanuma mongtsik.

¹³Kue akax pongma hwome ku kax to na chitha, ikhoma hwome zangjop pongma kue chilan.

¹⁴Zangchei ningle kue hwom mixnok chaxwan to ngo ang jeple pao. Ipong müikya haxtok ija a, ngo angkya mix owachu chitüile awütle tox.”