Read Wancho Naga Zekaria 9 Bible Online

Zekaria 9 - Wancho Naga bible

Zekaria 9

¹Ija a JOWANPA kaxho changle: Hadrak chaxwan hia Damaska tingnu bama chixe sikngün ang tom angkya kaxfün tsuakdaoa. Israel nok homjenbu tata le chichangle Siria angkya pongwün tingnu ngaxchu JOWANPA kux changpu.

²Hadrak longzipong angkya Hamath ngaxchu chix kux wüi changpu. Ija lailaile Tair hia Sidon tingnubu tamchu ima tüikya mwot mankya khünakbu pangwüi chix kux changpu.

³Tair-e she hanpakma long katuk swonle ziakop tsuakdaoa ilaxle pangtsa-zuaha ningle khop-jan hia hun huanuma athünle thomdaoa!

⁴Ikoxlechu she ma tüikya oli pangwüi Jowanpa-e tsui paoüi. Chixe she ma tüikya tuina komle tinu mongto tswonle awütdaoüi, ilaxle tingnu a kotho ang achangle zokle ashundaoüi.

⁵Ashkelon tingnue ija ngünle laxüi ilaxle tüle zaüi. Gaza tingnue ija ngünle laxüi ilaxle huanuma mongto kakle changüi. Ija ningle Ekron-e chuwüi, ilaxle she mongtex athole changüi. Gaza-e she wanghom amütüi, ilaxle Ashkelon a khünak owachu chingole dantoxüi.

⁶Ashdod ma lüsüi ating-anokle ngoüi. JOWANPAe thüile: “Ngam le ngokya Filistia nok ibu kue adangüi.

⁷Hwome müi aji füi otuechu chisaxüi, mama chisax li sütling chemchu chisaxle changüi. Ota toxkya khünakbu pangwüi ku khünakbu füi tuita ang achangüi ilaxle Judah homjen ma saxthom tuita ang ngoüi. Jebu nokbu ningle Ekron a ku khünakbu ang achangüi.

⁸Kue ku haxtok nyele ngoüi ilaxle süpahibu ija akaile le ang müntomüi. Kue mixtsak-naomüibu ang ku khünakbu to afangle thom ang müntomüi. Kue ku khünakbue chemle sikngün apongle changpuix ngündaoa.”

⁹Mongmüikox, mongmüikox, Zaion angkya khünaknu! Mongmüi to akhong kox, hünzom Jerusalem angkya khünakbu! Hulax, hünzom wanghompa hünzom hato nguile ngole! Chix a zanbu to lütlaxle chuak-chongle nguingole, ikoxlechu mantsak kun kha angkya mantsaksa kho ma ngalaxle somdangle.

¹⁰JOWANPAe thüile, “Israel angkya zankat man-kanlinbu kue awütüi ilaxle Jerusalem angkya manbu laxlaxtoxüi; azan pongma twonkya hapnubu amale awütüi. Hünzom wanghompa-e jat-libu füi tumüi lomzingüi; chixe tinu makhange tinu to o-le apünüi, Eufrat shuanu makhange haxtua-zangnam alople.”

¹¹JOWANPAe thüi: “Hünzom füikya ku tsaotsüt oja tö koxkya aji füi shintople tüipuix, kue hünzom khünaknu danle panüi: zuazoxle zanda ang thomkya tüküi khatokya a.

¹²Zanda ang ngokyabu, hünzom opang ma monghom tüilaxpuix, chatlax; chem chazakya chitüile ngo angkya nang ngwotnui to chatlax. Athax kue akaxpu, hünzome sikngün apongdaokya to othom anyie nüile kue mohimanüi.

¹³Süpahibu chak angkya hapnubu ningle kue Judah twonüi ilaxle Israel a sanjunbu ningle twonüi. Zaion angkya khünakbu kue tuita changlo ningle twonüi, ija füi Grik nok füi azan angkya hanpakma.”

¹⁴Chix khünaknu tunthoma JOWANPA ngaiüi; zangchangjep lailaile chixe chix sanbu haple apaoüi. JOWANPA Khüthak Zang-e nyazong mütle azingüi; shuathongchi makhange chix zangchei-zangwat ma zan to kaüi.

¹⁵JOWANPA Khüthak Zang-e chix khünaknu kho-awale kopüi, ilaxle hwome zanpabu olithule amütüi. Hwome zanhok ma jutokmixbu lailaile akhongüi ilaxle hwom zanpabu aji ajenüi; ija aji a tö koxpongkya aji, khua angkya tö-tsap ding ma thokle ajenkya lailaile jenüi.

¹⁶Chemtue ija nyix nguile hüiüihex, JOWANPAe chix khünakbu khosünüi. Ija a thama chak tokya chunnyetpae chunbu khosünle kopkya lailaile changüi. Khohom angkya liknubu lailaile chix haxtok ma hwome fixfaxle nyanüi.

¹⁷Ija chaxwan chemtukux müi tamchu chemsa ningle osün müile changüihex! Ija ma tüikya saxziak hia grepti-ju füi tsünzün hwom tüle tsak-zongle changüi.