Read Wancho Naga Malaki 1 Bible Online

Malaki 1 - Wancho Naga bible

Malaki 1

¹Ija a, Israel khünaknu füi akax angkya hanpakma Malaki ang JOWANPAe koxkya kaxho changpu.

²JOWANPAe chix khünaknu füi akax: “Kue hünzom to othuithuima mongkün daoa.” Ikoxle hwome lan: “Nange kwom tokya nang mongkün chemle aho daopu?” JOWANPAe lan: “Esau hia Jakop nyi a tüi-hi-nao nyi changkya, ikoxlechu kue Jakop hia chix sixli hwom to mongkünpu,

³ikoxle Esau hia chix sixli hwom to a miktsakpu. Esau haxtok haxhuabu a kue chemchu chitüikya haxtok ang achang laxle shwonbu ngwotnui ang toxpu.”

⁴“Kwom tingnubu a amadaokya changpu, ikoxlechu ibu kwome zingle laxüi”, le Esau sixli Edom noke jang akax, JOWANPAe hwom kax to lanüi: “Hwome ibu tamchatlechu naxzingkox--kue ibu anaole chuwüi pünle ama angkya changle. Khünaknue hwom ang ‘Othuithuima hwom füi JOWANPA ang mongtsikle ngokya ochax chaxwan’ le nyaküi.”

⁵Israel khünaknue ija hwom mike jao ngünle laxüi, ilaxle hwome thüiüi: “JOWANPA a Israel haxtok longzi akaile ngaxchu huanuma chongle tüikya changle!”

⁶JOWANPA Khüthak Zang-e zompu-zangpabu ang thüi: “Naosombue manu-mapa hwom achuak-achenle, ilaxle dabue ma hopupa hwom achuak-achenle. Ku a hünzom hopa changle--ikoxle hünzome ku achuak-achenle büthüikoxle chitüi? Ku a hünzom hopupa changle--ikoxle hünzome chathua büthüikoxle chiza? Hünzome ku wünhaile ilaxle hünzome atüitüi, ‘Kwome nang-wün chemle haidaopu?’

⁷Hünzome ku tö-tsap ma laxli chitüikya sütli tö koxkya makhange changle. Inganga le hünzome, ‘Kwome nang achuak-achenle chichangle ongai alyet daopu?’ le atüitüi. Kue hünzom ang thüipu--ija a ku tö-tsap ajaokya tuita changpu.

⁸Nange ku ang tö kox ang apüi pongma, omik madaokya, okak füikya, ocha faikya, iningkyabu müi apüi pongma, nange ile mokkya ojao thaikya chitüikhato le thütpia? Nange iningkya müi tuita gowarnor hato apüile koxnohu! Ikhoma nang füi chix ang mongzom müikya tüi ang cha chichangba nange jukya chixe kox mokle kox ang cha?”

⁹Athax, zompu-zangpabu, Zang ang kem füi müile tüihüi-ole thüiwanhu. Chixe nang zangjop to otuechu münlax, ilaxle ija a nang thaikya changüi.

¹⁰JOWANPA Khüthak Zang-e thüile: “Hünzome ku tö-tsap ma chilaxli wün atsople changkya füi, ija abax angkya hanpakma owawae Zangshwom-Hom kahakle namchangbae le kue thütle. Ku hünzom füi mong münmüi; nange ku hato apüikya tö kue pongle münkop.

¹¹Zangfang tüchikao makhange ata-chikao kople khünaknue ku achuakle. Pangnu chito wüi hwome ku ang ongan müikya sobu zokle kue pongle koptsuak tangkya töbu koxle. Hwom pangnusae ku chathua zale.

¹²Ikoxle ku tö-tsap ma olüi chemchu müntüile akax ilaxle nange chisaxle awüt daokya süt apüile tö koxle changkya makhange hünzome ku ajaodaoa.

¹³‘Ibu mokle ngokyae kem müimamale na-juale max ang tomle!’ le hünzome thüitüi ilaxle ku füi mongtsik-mongmale changtüi, ikoxle nange ku hato tö ang kox ang ahuxkya müi hia ocha faikya müi apüitüi. Ija kue nang chak angkya pongle kopüile nange thütpia?

¹⁴Chixe ku ang koxüihex-ole tsaokya amüikya müi tüingale, ku dyenlale chilaxli müi apüilaxle tö koxkya mix a othuak-ozom ang naxchang! Chemthüikoxle ku a wanghom achongkya changle, ilaxle pangnu jat-li tokya khünaknue ku-thua zapu.”