Read Wancho Naga Malaki 3 Bible Online

Malaki 3 - Wancho Naga bible

Malaki 3

¹Khüthak JOWANPAe lan: “Ku hanpakma lomtang achwon ang kue ku mwot-tsan mix tomle ajoüi. Ifüima hünzome lomle ngokya JOWANPA allele chix Zangshwom-Hom ma nguiüi. Hünzome sungle ngokya mwot-tsan mix nguilaxle ku Tsaotsüt apuküi.”

²Ikoxle chix nguikya nyi owae adule thoüi? Chix ngai pongma ozün ma owa ngoüi? Chix a tuita tsakkya sabon ningle, tamchu tu-hi-khop achukle atsaokya wün ningle changüi.

³Chix a, khop achuk üntoxle atsaole changkya ningle kaxfün fa ang nguiüi. Hun-hi-khop jaokyabue ibu atsaokya lailaile JOWANPA mwot-tsan mixe zompu-zangpabu atsaoüi, ikoxle tix hwome JOWANPA hato chem koxse hex ibu tö apüi ang thoüi.

⁴Ikoxtix amipongkya ningle, Judah hia Jerusalem angkya khünaknue JOWANPA hato apüikya tö chix zongto mongzom ma müikya ang changüi.

⁵JOWANPAe thüi: “Hünzom khato kaxfün fa-ang ku ngaiüi, ilaxle chajik muashem mwot mokkyabu, chinunchakkaikyabu, othai kaxkhi koxkyabu, mwotmok mixbu to hingchak mün ma sip-ba le changkyabu, zomnu-khaxsabu hia mixnok wünpa to jemle tüikyabu, Ibu opange ku chathua zakya chitüipuix, hwom pangnu hanpakma, ku mik füi ngündaokya kaxkhi kox ang kue hanhomle tanle münngoüi.

⁶“Ku a JOWANPA changpu ilaxle ku otuechu lüixchüix le müntüi. Ilaxle hünzom Jakop sixli hwomchu athax kople pangwüi maxdaoa le münchang.

⁷Hünzom a, hünzom tho tokya hünzom putong hwom lailaile ku wanlombu füi atsaile paodaoa, ibu kople thomkya ojao müntüi. Ku hato chat-hüi jangchangba ku hünzom hato chatüi. Ikoxlechu ‘Kwome nang hato chat ang chem-mok angkya?’ le hünzome atüitüi.

⁸Kue hünzom ma atüifang, khünake Zang dyenla angkya olom changcha? ‘Chemle?’ hünzome atüi. Ija a bünfong hia töbu koxkya ma changle.

⁹Hünzom jat-li pangnue ku dyenlale ngole, ikhoma hünzom pangwüi othuak-ozom ma tüile.

¹⁰Zangshwom-Hom to hünzome bünfong anguile apüihüi, ikoxtix ikhama süt okhonguile tüingoüi. Kue zangkangting fülom daplaxle müikya oli pangwüi okhonguile hünzom ang thokle chikox hia koxkox, ku to thwontsingle anohu.

¹¹Kue hünzom sax chong-lange sax ang müntom, ilaxle hünzom grep zubu a grep ziak füi awangle tüiüi.

¹²Ifüima pangnu jat-li angkya khünaknue hünzom ang mongmüi mixbu le nyaküi, chemthüikoxle hünzom haxtok a ngo ang amüikya haxtok ang changüi.

¹³“Hünzome ku hanpakma za-adünkya kax akaxdaoa. Ingale hünzome ‘Kwome nang bama chemle akax daopu?’ le thüitüi.

¹⁴Hünzome thüipu, ‘Zang thothakya ma olüi chemchu müntüi. Chixe akaxkax mokkya ma chemtüi chichangba kwome chem mokdaopuix ija bama kwom thaikya ngaipu le JOWANPA hato aho ang azongkya ma chemtüi?

¹⁵Keme ngünle ngopu, mongmüi mixbu a mongngam füikya khünakbu tix changpu. Ochax khünakbu a ahak-aluakya tata chichangle hwom ochax mwotbu füi Zang to thwontsingle changpu üntoxle ikha tokya hwom azangle pao tsuakpu’ le JOWANPAe thüi:”

¹⁶Ifüima JOWANPA thua zale ngokya khünakbue tata füi zangwün, ilaxle JOWANPAe hwom zangwün to apa üntoxle ija atatle lax. Chix mikngün ma, zale thomkya laipex tuita ma, JOWANPA chathua zale tüikya hia chix to achuak-achenle tüikyabu zale kop.

¹⁷JOWANPAe thüi: “Hwom a ku khünaknu ang changüi. Chemtue kue moküihex, ija nyix a hwom ku mamixbu ang changüi. Ma thothale tüikya su-sa hwome honu-hopae chingchale tüikya ningle kue chu hwom to chingchakya tüiüi.

¹⁸Otsao khünakbu hia ochax khünakbu chemle mali-mali changpuix, ku thothakya hia ku tho chithakya khünak to chemle mali-mali changpuix, ija nyi bama anaolechu kue süile awan ang kox.”