Read Wancho Naga Mathi 10 Bible Online

Mathi 10 - Wancho Naga bible

Mathi 10

¹Ijama chixe chix wangshem bün anyi chix hato nyak; haxshix chasa jwon angkya; kaklak pangwüi amüi angkya; ibu tsakzong hwom ang kox.

²Ibu bün anyi mün a ile changpu: Owang angkya Simon, owa ang Pitar lechu wüi nyak; chix honao Andriw; Zebedi sasün Jakop hia honao Juhan nyi;

³Filip hia Bartholomew nyi; Thoma hia chaxwan süisai mix Mathi nyi; Alfas sasün Jakop hia Thadia nyi;

⁴Kanan nok Simon tamchu zan chak to Jisu hangkya mix Juda Iskariot; ibibile changle.

⁵Jisu-e ibu kax adangle koxlaxle hwom mixhuak bün anyi tsanle apao: “Mixnok haxtok hia Samaria tingkhuabu to taxnop.

⁶Ikoxle Israel kako samle ngokya chunbu hato paokox.

⁷Hünzome paolaxle Zang Wangting soxle hüiüna le apukkox.

⁸Kakmixbu amüikox; faikyabu amüikox; zidaokyabu azünkox; haxshix chasabu jwonle apaokox; hünzome amuale koppu, amuamua le laxkox.

⁹Hünzom nyitsong thong to hun, syen chichangba ngun taxkop;

¹⁰Hünzome lomba hanpak ang saxtsom nyitsong chichangba nyipong anyi, chichangba chisox, chichangba kaithox, ibu chemchu onüi taxkop; chemthüikoxle mwot mokkya mix ang ibu a kox angkya changle.

¹¹“Otue hünzom tingkhua hia tinglong tuita to nguiüi hex, ikhama hünzom pongle kopse tsukya khünak lomkox; ilaxle ikha angkya mapao-mapaole ikhama ngokox.

¹²Ikoxle kako to nguikya zuma, ‘Hünzom ma mongsom tüikox’ le thüilax.

¹³Ija homkha angkya khünakbue hünzom pongle jangkop thüiningle, hünzome hwom ang fakya salam hwom ma wüi naxngo kox; ikoxle hwome hünzom pongle chikop thüikoxle, ija salam hünzome wüi chatle laxdao.

¹⁴Üntoxle owa kakoe chichangba tingshoe hünzom pongle chikop tamchu hünzom kax to na chitha le tüiüi hex, ikha dantoxdao ilaxle hünzom cha angkya labu ngaxchu hongle toxkox.

¹⁵Otsingtsingma kue hünzom ang thüipu, Zange kaxfün nyix ija tingkhua angkya khünaknu füi Sodom hia Gomorah nok hato wüi chingcha chongle ahoüi.

¹⁶“Apalax, shwon tham khato chun hosabu ningle kue hünzom tsanle apaopu. Pu ningle atsinglax, osu ningle nonai le tüilax.

¹⁷Khünzailax, chemthüikoxle koplaxle kaxfün ang hünzom khwa to apüi angkya tamchu hwom zangshwom hombu to hünzom to fit-müi angkya khünakbu tüi angkya changle.

¹⁸Ku khokhoma hexle, nguakhobu hia apün-awangkyabu tamchu mixnokbu hato koplaxle, ku bama Kaxho Müikya apuk ang hünzom pao angkya changle.

¹⁹Kax atwon ang hünzom apüikya zuma chem akaxüi le kho taxsam; kaxtsing akax ang ija ma wüi hünzom ang koxüi.

²⁰Chemthüikoxle ija kax akaxkya mix a hünzom münchang; ikoxle hünzom Hopa Chasae hünzom mong ma zangwünle fakya changüi.

²¹“Hotüie honao, hopae sasün lang angkya hanpakma owüiole koxüi; tamchu sasün hwome honu hia hopa hwom füi alünle ajong laxle hwom lang ang owüiole kox angkya changle.

²²Ile ku mün khoma hexle khünaknu pangnue hünzom thua anuüi; ikoxchu oshuk kople adukya mixe khosünkya ataküi.

²³Otue hwome hünzom to tingkhua tuita ma zothupüi hex, mama ting to paokox. Kue hünzom füi otsingtsing akaxpu, hünzome Israel haxtok akhople matsuakba wüi Khünak Hosa nguiüi.

²⁴“Lainao owachu Nwotmix füi achongkya münchang; hopunu füi da wüi achongkya münchang.

²⁵Lai nao tuita nwotmix ningle tamchu da tuita hopunu ningle achang angkya mongtex sha angkya oli changle. Homkha ma akhokya ang Belzebul le jangnyakba, homkha angkya khünakbu ang tamtaikya mün oma fa angkya changle.

²⁶“Idaile hünzom a khünak thua taxza; chemthüikoxle kotok to chingaikya lima chemchu alumle münthomüi, chitsingkya lima mwot chemchu huxsa ma pyenle münthomüi.

²⁷Kue zangnak khato hünzom hama wünkya pangnu hünzome tamchatle zangngai ma wün angkya changle. Na ma thap laxle chem wündaopuix ija a homkho tokhange tinglyet angkya changle.

²⁸Tsangtsa amüt ang tho koxchu chasa lang ang chitsuak angkyabu thua taxza; itülüi, Zang owae tsangtsa hia chasa pangnyi haolum to amüt ang thopuix, chix thua zalax.

²⁹Nange otsak osa anyi ngunkhao anyi füi shak ang thole, ikoxlechu hünzom Hopae chitsing toxle tuitachu hax to chidütüi.

³⁰Hünzom khang angkya khopa ngaxchu komkaile e thompu.

³¹Idaile taxza, chemthüikoxle otsak osa ozyem füi ngaxchu hünzom wüi thanu changpu.

³²“Owawae noknu thüntho ma chix ku kux hex le jangngai thüiba, zangkangting to ngokya Apa pomtho ma kuechu chix pongle kop angkya changle.

³³Ikoxle khünak thüntho ma owawae ku pongle chikop thüikoxle kuechu zangkangting to ngokya Apa thüntho ma chix pongle münkop.

³⁴“Ku chaxwannu hato tumüi apüi ang nguipu le taxthüi. Tumüi fa ang chichangle chang fa ang nguipu.

³⁵“Hosae hopa füi, nomchae honyenu füi, sangmütpae hohopa füi le, alün aloxle naxchang ang, ku nguikya changpu.

³⁶Khünak zongto zan amakya, ma kako homkha changüi.

³⁷“Owae manu hia mapa to ku khüthak le mongkünüi hex, chix a ku wangshem ang achang koxle münasu; üntoxlechu owae masu masa to ku khüthak le mongkünüi hex, chix ku wangshem ang changkoxle münasu.

³⁸Ma pünsak koplaxle ku füito chihüikya mix ku wangshem ang changkoxle münasu.

³⁹Owae ma tsün sünle kop ang azongüi hex, chixe ija amütüi; ikoxle owae ku hanpakma ma tsün koxlaxüi hex, chixe itolyem le ataküi.

⁴⁰“Owae hünzom pongle koppuix, chixe ku pongle koppu; üntoxle owae ku pongle koppuix, chixe ku tsanle ajokya mix pongle koppu.

⁴¹Owae Zang kaxho mix Zang kaxho mix ningle pongle koppuix, hwom ang Zang kaxho mixe kopkya hingho ma süntom tüiüi. Tamchu otsao khünak tuita owae otsao khünak ningle pongle koppuix, chix angchu ija otsao khünak hingho ma süntom tüiüi.

⁴²Üntoxle owae ijabu hixkya khama tuita ang ngax thüichu wangshem mün ma tihing peta alingkya mix jangtüi, otsingtsing ma kue hünzom ang thüipu, chixe otuechu ma hingho münamütüi.”