Read Wancho Naga Mathi 11 Bible Online

Mathi 11 - Wancho Naga bible

Mathi 11

¹Ile Jisu-e chix wangshem bün anyi füi zünle akaxkya tsuak füima, hwom tingnu to hwom-ano le kaxho apuk ang pao.

²Otue Bapti fakya Juhan-e, chix kun kha to ngopongma, Jisu-e mokkyabu bama kaxzing atat ang koppuix, chixe ma wangshembu züizüi ile atüi ang tsanle apao:

³“Juhan-e hüiüi hexo le thüikya nang hia, hia kwome mama mix tamtan angkya? Kwom hama apua hüi.”

⁴Jisu-e hwom kax to lanle thüi: “Hünzom chatlax! Hünzome chempang atat tamchu ngün ang kop, kaxho ibu Juhan ang laxkox:

⁵Mikduakbue ngün ang kople; cha faikyabu aham ang tsuakle; angwonkyabu kak müile; naba mixe atat ang kople; zidaokyabu anaole zole; ilaxle mixshix-zasabu hato Kaxho Müikya apuk ang tomle.

⁶Ku to mongao chitüikyabu ang mong otukux müiüi hex!”

⁷Hwom chat füima Jisu-e khünaknu hama Juhan bama ile apua ang süt: “Hünzom Juhan hato faokha to pao pongma chem ngünüi le thüt? Zangwin to aloxle ngokya fumsa suisa ngünüi le thütpia?

⁸Hünzome chem tomta to hu ang paopu? Chemkülailai le nyi laxlaxle ngokya mixsün to hu ang paopia?

⁹Chichangba alixachong zapua laxlaxle ngokya mix to hu ang paopia? Chem tomta to hu ang paopuix ku hama wünhuki! Ajepa to hu ang paopia? Changle, kue hünzom füi akaxfang: Aje füi ngaxchu süthak hünzome ngün ang kopdaoa.

¹⁰“Hulax, kue kaxho mix tuita, nang thoma achale, hüi ang tsanüi le Otsao Lai kax ma akax ngokya mix a chix changle.

¹¹Otsingtsingma kue hünzom ang thüipu, sheko makhange puxkya khakha ma bapti fakya mix Juhan thakkaikya mix malai; ikoxlechu zangkangting to ahixkya ngaxchu chix füi süchongle tüile.

¹²Bapti fakya Juhan-e, chix kaxho apukkya tokhange owang wanglaxle anyix kopkya bama Zang Wangtinge huanuma fuxtsüi angkya laile ilaxle müishix-mixmabue ija kople thom ang azongle.

¹³Juhan din kople ajebu pangnusae wüi ilaxle wanlomechu wüi ija Wangting bama zangwünle hüile.

¹⁴Üntoxle hünzome jangong thüiningle, nguiüi hexo le akax thomkya Elija a Juhan changle.

¹⁵Hünzom ma na jangzaiba apahüi!

¹⁶“Athax, anyix ngainyixkya khünaknu kue chem füi apyenüi? Hwom a hat to thungle ngokya naosombu ningle. Thom tuitae mama thom füi azaxle akax:

¹⁷“Kwome hünzom ang aju-asom pongma, mütkya thuaput waxmai mütle fa; ikoxlechu hünzom chiazüi! Kwome mangzuk tsai ngao; ikoxlechu hünzom a chisop!

¹⁸Otue Juhan nguipuix, chixe ju-sax lingle chichang tamchu atsao alangle zangjopkya hanpak lax; ikoxle pangnue wüi chix ma bao tüile le akax.

¹⁹Khünak Hosa ngui ilaxle chixe sax-lingle chang, ikoxle noke thüi: ‘chix a sütbakmix; jutok saxngale ngokyabu hia süisai mixbu zuikhui changle!’ Zang je a mwot makhange tix awan ang koppu.”

²⁰Jisu Khrista-e ohünotün mwot huanuma mokkya tingnu tokya khünakbu mong chialüix koxle, chixe hwom to sa ang süt:

²¹“Maxsax Korazin! Maxsax Bethsaida! Hünzom ma mokkya ohünotün mwotbu Tair hia Sidon ma mokpuix thüikoxba, nyitsyen zahom awunlaxle labu khato wotle, amiba wüi mong chatkya ahodaose.

²²Kue hünzom füi otsingtsing akaxpu; kaxfünkya nyix Zange chix chingcha, hünzom füi Tair hia Sidon nyi hato wüi süchongle ahoüi!

²³Üntoxle nang Kaparnaum! Nang a zangkangting to nwonle thombae le texpuix nyi? Nang a haolum to tswonle awüt daoüi; chemthüikoxle nang hama mokkya ohünotün mwot Sodom nok ma mokpuix thüikoxba, ija anyix kople tüise.

²⁴Kue nang füi otsingtsing akaxpu, Kaxfün nyix Zange, nang füi Sodom nok hato wüi chingcha süchongle ahoüi!”

²⁵Iponge Jisu-e akax: “O Apa! Nang a zangkangting hia chaxwannu Jowanpa, kue nang ang münchong fapu! Chemthüikoxle nange hwontüi jelangkyabu tamchu man-ngünkyabu hato chiaho le pyenle thomkya ija naosombu thüntho ma nange kotok to ngai ang tomdaoa!

²⁶Changpu, Apa! Chemthüikoxle ile chang angkya a nang mongtex!

²⁷“Apae ku ang pangnu li wüi fadaoa. Hopa boma Hosa owaechu müntsing tamchu Hosa hia chixe angaile ahose le mongtsukyabu boma Hopa owaechu müntsing.

²⁸“Hünzom hünlix hünkya hia najuale maxkyabu pangnu, ku hato oman, kue hünzom ang nazak faüi.

²⁹Hünzome ku dang ma pailax, ilaxle ku angkya awanle koplax; chemthüikoxle ku a somdangkya mix tamchu chasa ma jonaikya mix changpu; ilaxle hünzome nazak atak ang thoüi.

³⁰Chemthüikoxle kue hünzom ang fakya dang a chwonpai tamchu ku hün a chazangkya changle.”