Read Wancho Naga Mathi 14 Bible Online

Mathi 14 - Wancho Naga bible

Mathi 14

¹Ipongma Galili apün le ngokya wanghompa Herod-e Jisu bama fuale wünkya zing atat.

²Ilaxle chixe nguakhobu ang thüi: “Ija a baptikya mix Juhan changle; chix ziünkya anaole zokya changle; ija daile chix ma ija ohünotün mwot mok angkya tsakzong tüipu.”

³Herod-e honao wangchanu Herodia füikya zangwün khoma Juhan a koplaxle khale kun ma shole thomkya;

⁴chemthüikoxle Juhan-e chix ang manao wangchanu ma wangchanu ang lax angkya oli münchangle akax.

⁵Ikhoma wanghome chix langse tsu, ikoxchu Jehudi khünakbu thua za; chemthüikoxle hwome Juhan a tuita ajepa changpule lax.

⁶Ikoxle Herod puxkya din shwomle nuikya nyix, Herodia sasün wangchasa noknu pomtho ma azüile aho; Herod ang mong tüle müi.

⁷Ikhoma she-e ajuju tütalichu chixe koxüile wanghompae tsao saxle akax.

⁸Ija wangchasae hotatüie anole fakya ningle akax: “Baptikya mix Juhan khang athax ile khua tuita ma ku ang laxhüi.”

⁹Wanghompa mongto tüle kak; ikoxlechu ibibi mixwünbu thüntho ma tsaosax le akax daokya khoma, she-e jukya kox angkya wüi lai.

¹⁰Ikhoma chixe kunkha tokya Juhan khang düt ang tom.

¹¹Ilaxle ija khang khua tuita ma apüilaxle wangchasa ang kox, ija she-e hotatüi hato apüi.

¹²Ifüima Juhan wangshembu nguilaxle ija zwoptho paole zu. Hwome ija bama Jisu hato nguilaxle wünle kox.

¹³Jisu-e ija atatkya zuma, khua ma ngalaxle mix dangkya khato pao; ikoxle khünaknue ija zing atatkya ma, tingkhua tokhange cha ma chix man to.

¹⁴Chix laikya zuma khünaknu othom chongkya tuita ngün. Hwom tokya chingchae chixe kakmixbu amüile kox.

¹⁵Hanasong koxle wangshembu chix hato nguilaxle thüi: “Ikha a chemchu chitüikya faokha changle tamchu zanghanchu wüi homdaoa; tingkhua to paolaxle hwome ma süt mo naxwünlax ang khünaknu fan ang tomkox.”

¹⁶Ikoxle Jisu-e hwom ang thüi: “Hwom pao angkya mwot münchang; hünzome hwom ang süt laxkox.”

¹⁷Hwome chix ang thüi: “Kwom chak ma an khao aga hia nyax jang anyi wüi.”

¹⁸Chixe hwom ang thüi: “Ijabu ku hato apüi hüi.”

¹⁹Chixe khünaknu hingzang ding to thung ang tom; an khao aga hia nyax jang anyi koplaxle chixe münchong fale mohiman. Chixe ibu akhixlaxle wangshembu chak to kox ilaxle hwome khünaknu ang ahanle kox.

²⁰Hwom pangnue wüi wokfwot müile sax. Ikoxle onüi ata-atuale toxkyabu wangshembue sang ma bün anyi awang le tswon.

²¹Sheko hia naosombu chie homtoxle, fongsüt ma womkya khünak huak hajat aga tukux tüikya.

²²Chixe khünaknu fan ang tomkya bama chix wangshembu a khua makhange, chix thoma acha le tachi to pao ang tom.

²³Khünaknu othom afan füima, chix a haxhua to chix tata zangjop ang dong. Hanhomkya füima chix ikhato chix tata ngo.

²⁴Ipongma thochi makhange zangcheie thule wangshembu a khua ma tinu sung to khokhokhe le ngo.

²⁵Ofüinop zangzunge chix a ti tok to ahamle hwom hato hüi.

²⁶Chix ti tok to ahamle hüikya ngünlaxle wangshembu abüt laxle thüi: “Ija a bao changüi.” Zalaxle hwom akhong.

²⁷Ima wüi thuile Jisu-e hwom füi akax: “Taxza, Ku changpu!”

²⁸Ikoxle Pitar-e lanle thüi: “Jowanpa, nang jangchangba kuchu nang hato titok to ahamle hüi ang tomhüi.”

²⁹Jisu-e chix ang thüi: “Oman.” Khua angkya thai laxle Pitar Jisu hato hüi ang titok to aham.

³⁰Ikoxchu chixe zangchei ngünkya zuma zalaxle monghix, ilaxle chix ti mongto düt ang azong. Chixe akhong: “Jowanpa ku azün hüi!”

³¹Ijama Jisu-e chix chak thui laxle chix kople thüi: “Nang mongong chitüikya muakya mix; nange büthüikoxle mongaopu?”

³²Okhi khua ma dongkya füi shemle zangchei zakle dang.

³³Ijama ikhama tüikya wangshembue chix shwomle thüi: “Otsingtsingma nang a Zang Hosa changpu.”

³⁴Tinu kai laxle hwom a Geneseret chaxwan to ngui.

³⁵Ikhato khünaknue chix süntsing. Ikhoma hwome ozui onam tingkhuabu tokya kakmixbu apüi ang tomle apao, ilaxle hwom chix hato apüi.

³⁶Kakmixbu ang chix nyitua to ngaxchu twon ang laxkoxle hwome chix tong shwom ilaxle chix to atwontwon pangwüi müi.